Tauaveina tiute uma e lua faaletina ma le faatama i le taimi lenei

By Lizzy Hunt 08 September 2017, 12:00AM

Olo’o lelei meauma lava, e fai mai lava isi ole tau ole soifuaga ole tau ole lima ma le vae ae ia te au lava ia ole fofo lava mo lea fa’afitauli ole galue malosi.

Ole manatu lea olo’o talitonu iai le tama 60 tausaga le matua o Alatasi Tuimalu mai le nuu o Aleisa. Na leaga lona taavale ma ole ala lea sa ia savali ai i le aasa ole la ina ia mafai ai ona ia faaooina ofu a si ona fanau e su’i.

Ole tiute lea a le tina e tatau ona fai ae ole fa’anoanoaga ile aiga o Alatasi ua leo toe soifua si ona ava.

“Ua savali nei ma le tolu vaiaso talu ona maliu si ou toalua ma e ui sa tau fa’afaigata meauma ae na ou iloa lava e tatau ona ou tauaveina tiute uma e lua faaletina ma le faatama i le taimi lenei.”

O se tama e to’alima si ona fanau ma o lona fa’anaunauga ole faia lea o meauma ina ia mafai ai ona ia lagolagoina si ona fanau i itu uma olo’o latou mana’omia ai le fesoasoani, o lona lava lea fa’amoemoega ina ia galue mo si ona aiga.

“E faigata meauma pe a tatou le galulue. Mo au ma si ou fanau, e ui ua leai le fatu a si o matou aiga ae ele avea lea itu ma mea e fa’avaivaia ai i matou ma matou nonofo ai fa’apea eleai ai ni galuega e faia,

“Ole olaga ole taimi, e tuana’iloa mea na tutupu ona va’ava’ai lea i mea ua i le lumana’i.

O lona mafaufau ele’o fa’apopolegia i ni mea e tausi ai si ona fanau aua ua ia silafia meauma e tatau ona faia.

O Alatasi e ui o ia ose faifa’atoaga ile ao ae e faigaluega foi o ia faasikulati i le faleoloa o Greig i le po, E le’o ia o se tagata e pisi vale ma fa’apopolegia i se mea aemaise i le itu tau soifuaga ma isi.

“Ou te le’o amana’ia le tau ole soifuaga, olo’o ou iloa ua taugata le soifuaga ae e faamoemoe o tatou soifua i mea tatou te faia, tatou te le nonofo ma faatali, e le maua se fua se mea ma le filemu e tatau ona tatou galulue ina ia tatou mauaina,” ole saunoaga lea a Alatasi 

“E mafai ona tatou totoina talo, fai, ta’amu, fuala’au aina ma isi, ole faigaluega i galuega ele na’o le pau lea ole auala e maua ai tupe ma mea’ai ole ele’ele o fa’amanuiaga ia mai le Atua e galue ai le tagata ma fesoasoani iai latou i le tausiga ole soifuaga.

Ole atali’i matua o lenei tama e faigaluega ile fale oti ulu i Vaitele, ma o i laua ia toalua olo’o fa’amoemoe ai pili, meaai, fanua ma meauma a si o latou aiga.

Ole fa’ata’ita’iga a Alatasi e fa’asino atu ile galue malosi ma ona tausaga e mafai ona avea ma se fa’amalosi ‘au mo tupulaga ma tagata uma ele’o galulue ae fa’amoemoe i isi

E ui i le leai o sona soa i aso uma, ae na ia mafaia lava ona tauaveina tiute uma e lua ole faatinā toe fa’atamā mo si ona fanau.

By Lizzy Hunt 08 September 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>