Ia ola fiafia ma fai mea fiafia

By Sarafina Sanerivi 08 December 2016, 12:00AM

“Po’o a lava fa’afitauli ma suiga o le olaga, e taua lava le fai fiafia ma ia ola finafinau.” 

O le finagalo lea o le tama ia Laumua Pualau, e 32 tausaga mai le afioaga o Afega. 

“O lo’o sologa lelei lava le olaga i Samoa i le vaitau lenei, e leai lava se mea o fa’aletonu ai le atina’e o Samoa. 

“O la’u va’ai iai, a fai fiafia lava galuega a le tagata ia, e leai lava se mea e tomumu ai fua. E leai lava se mea e faigofie ona maua i le olaga lenei. 

“E mana’omia ai lava le galue malosi ina ia maua ni olaga fiafia ma le saogalemu.

“O le tulaga foi ua iai le olaga o Samoa i le vaitau lenei, o lo’o aga’i pea i luma le olaga. O lona uiga, ua tele suiga o lo’o iai. 

“Ae leai la se mea o le a tatou faitioina ai le tele o suiga. Tatou fai mea fiafia ma tuli mata’i le va’ai i le lumana’i.”

Na ta’ua foi e le tama ia Laumua, o le tele o suiga ua iai i Samoa i le vaitau lenei, e tatau ona tatou fiafia ma fa’afetai i ia suiga foi. 

“O le fa’ata’ita’iga o aoga a le fanau.

“Ua le toe tutusa e pei o aoaoga i la aso. Ua tele vave le atamai ua iai i lenei vaitau. Ae e aoga foi ina ia tutusa ai tulaga o a’oa’oga a fanau i Samoa ma isi atunu’u. 

“A va’ai foi i le taulaga o Apia, ua tele suiga tetele ua iai ma atina’e tetele a le malo.

“Fa’afetai foi i le malo i le fa’amuamua i le atina’e o a’oga a le fanau, aua a lelei lava ona fa’afailele fanau, e manuia foi le lumana’i o aiga, nu’u ma le malo. 

“Ua tele lava faleaoga fou ma poloketi e fa’aleleia ai aoga a le fanau.”

Ao iai foi la i le vaitau o laugatogi a le fanau, o le finagalo o le tama ia Laumua, o se vaitau lelei lava lenei e va’ava’ai ai taumafaiga a i latou o le a avea ma ta’ita’i o aiga, nu’u ma le malo.

“E manaia lava i le matamata le fa’aiuga o galuega a le fanau. 

“O i tatou te iloa ai i latou o le a matutua a’e fai ma ta’ita’i o le nu’u, aiga ma le malo.

“A fa’apea foi la e fa’atumauina pea le atina’e pea o aoga ma fa’amuamua pea aoga a le fanau, o le a le taumate foi le manuia o aiga i le lumana’i.”

By Sarafina Sanerivi 08 December 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>