E tatau i le malo ona galulue
O lo’o ua fa’amanatu mai e Samuelu Tinoifili e fa’apea ‘ e ao lava e le malo ona fa’atino o latou tiute’
I le fa’atalatalanoaga ma le Fofoga o Samoa na ia saunoa ai e fa’apea e ao ona manatua e le malo le mafua’aga na tofia ai i latou e o latou sui palota.
“Ia o nei aso o tupe mea uma ua leai se toe la’ala’a ma moemoenoa o i ai ona ua matuai taugata lava le soifuaga o lo’o ua tatou ola ma soifua ai nei.
“O le itu mautinoa e nofonofo loa fia’a’i loa.
“O le uiga o la’u tala afai ua sii i luga le tele o le tau o oloa ma auaunaga e ao ona silasila le malo e tu’u i luga totogi o tagata fai galuega.
“E le mafai ona fai lea tulaga pe a va’ai atu ai le tele o le avanoa o lo’o ua tu’u mai ae leaga totogi.
“E le gata i lea o totogi ua laiti ae o le tau o le soifuaga ua matua’i maualuga lava o se itu e ao ona silasila lelei i ai letaimi lenei.
“E pei o la’u ia lea fa’amuamua, ia o le tausiaina lava o lo’u aiga, ona o le tele o vaega o lo’o vaega o lo’o mana’omia ai le fesoasoani o le tupe lava.
“Ia o le taimi lenei o galuega uma lava e mo le lelei alu i luma o aiga aemaise o fanau.
“E mo le silafia ai, ia e le’o se itu e tau fa’amalamalamaina le tatau ai lava lea ona galulue fa’atasi aua le lelei o aiga.
“Ua le toe faigofie lava nei aso.
“O lea lava le una’i malosi i le taimi lenei, ina ia aua ne’i ola falolo aiga, ia e mo le silafia ai, o le a le tupe e maua , ia e matua’i faigata lava ona tau fa’asoasoa.
“Ia o le taimi lenei, ia e fai o aoga a fanau o le a toe a’e, o fa’alavelave i aiga, o mea e fai le lotu, ia e pei o lea le una’i malosi lava lea i le taimi lenei.
“O lo’o ua tatou tau fai molimauina uma lava le faigata i le mai lea aso i lea aso, o le a le tupe tatou te maua , e matu’ai tau leiloa e le mafaufau fa’asoasoa.
“A talanoa i le $100 i le taimi lenei, o le matua’i lava o se tupe ma o lo’o tatou tau fai molimauina uma lea tulaga.
“Ia e pei o lea lava le tulaga e le tau fesiligia i le taimi lenei, e talanoa mai lava o tupe i taimi uma ae o le matua’i leai se oloa o toe taugofie mai sona tau.
“Ua le’o toe faigofie nei aso, ma ua tele lava suiga e pei ona ou fa’ailoa muamua atu ua i ai nei.
Na ia fa’ailoa o le lotu ma nisi o mea fai o le nu’u o nisi nei o vaega taugata o le soifuaga o lo’o ua i ai nei.
“Ia e pei o lea lava le tulaga i le taimi lenei , e pei e o’o mai loa le mau fa’alavelave ia ona taumafai loa lea e su’e oti ia tupe ae le gata i lena , o lae fai isi mau fa’alavelave ae o le mafaufau lae alu pe fa’afefea ona totogi le pili o le paipa ma le eletise.
“O le tele ia o vaega e ao ona fa’ataunu’uina i aso uma.
E ui lava la i le tele o suiga ma vaega o lo’o molimauina i lenei vaitau ae na ia ta’ua o lo’o ave lana fa’amuamua i lana fanau.
“E ui lava i le faigata ae pei o lo’o ave lava la’u ia va’ai i la’u fanau, ina ia ola lelei.
“Aua e pei ona ou ta’ua muamua, ua ese la aso ma nei aso, ua taugata mea uma lava.
“Ua fa’apea ona taugofie mea uma ma faigofie la aso, ia o le taimi lava o le una’ia lava o fanau i le aoga, a matutua ane ia ua mautinoa fo’i le ola lelei.