Polokalame ua fuafua mo le malu-puipuia o fanau

09 February 2016, 12:00AM

Fa’aliliu e Maiava

 

E amata i le Aso Gafua 15 o Fepuari 2016, ona fa’alauiloa fa’alaua’itele e le Vaega o le To’omaga mo e Puapuagatia (SVSG) polokalame fa’aleA’oa’oga e fa’alauiloa ai i afio’aga ma alalafaga fa’apea a’oga uma i Upolu ma Savai’i.

O ia polokalame o lo’o lagolagoina e le Vaega a le UNICEF a Malo ‘Aufa’atasi.

O le fa’alauiloaina lava o mata’upu ma fa’afitauli tau-puipuiga o fanau, lea sa fa’amamafaina i le su’esu’ega sa faia mo le puipuiga o fanau i le 2013. 

O le a vala’aulia fa’apitoa lava matua ma le atunu’u o lo’o tausia ma va’aia fanau mo lea fa’alauiloa, ina ia una’ia ai ma fa’asoa tomai ma silafia aua le sa’ilia o ni fofo talafeagai mo le fa’afitauli ua fa’ateteleina i Samoa. 

O le maua o se malamalama’aga o le Tulafono mo le Saogalemu o Aiga 2013, o le  tasi o vaega ‘autu o lea polokalame.

Ua fuafuaina, o nei polokalame fa’aleA’oa’oga, ua fa’amoemoe mo fanau a’oga e o’o atu i le 14 tausaga le matutua, lea sa maua i su’esu’ega sa faia, le leai o so latou malamalama’aga, i amioga le-talafeagai. 

 “O le tomai o le Vaega a le To’omaga na maua mai galuega sa latou fa’atino e pei o mata’upu e to’ai taunu’u iai ae maise le ‘au’aunaga o le tausia lelei o fanau-sauaina, ua fausia ai se manatu ma se iloa i ‘auala e ao ona momoli ai le fe’au ma le polokalame i fanau,” o se fa’asilasilaga lea mai le Vaega a le To’omaga. 

“O le fa’amoemoe ‘autu lava, o le si’itia lea o le malamalama i tulaga ma amioga talafeagai e talia lelei fa’apea fo’i amioga le-talafeagai ma lelei, ma ia fa’amalosia fanau e tautino mai fa’afitauli ma vaega tonu e ao ona puipuia mai ai latou.” 

O le Vaega o le a gata ma lenei fa’amoemoe, e aofia ai le Peresetene o le Vaega a le To’omaga ma le ‘Aufaigaluega, o se sui mai le Ofisa o le Loia Sili, o Ekalesia, ta’ita’i o nu’u ma nisi o fanau ua i le To’omaga, lea o le a fa’asoa mai ona lagona ma ni fautuaga, e fa’amalosia ai fanau o le a ‘auai, ina ia fa’amasani e ta’u ma fa’ailoa o latou lagona ae maise o mea e tutupu ia latou.  

O lo’o fesoasoani le Matagaluega o Tina ma Tama’ita’i, Atina’e o Nu’u ma Agafeso’ota’i i le tu’u-fa’atasia o mana’oga mo’omia mo nei polokalame e ala i se fesoasoani tau-seleni mai Malo ‘Aufa’atasi a le Pasefika (UNICEF).

O le a fa’atinoina lava e fanau o lo’o i le To’omaga a latou lava polokalame toe-fa’alelei i le tausaga atoa, e lagolagoina e le fesoasoani tau selei lea.

O le fa’amoemoe maualuga lava, ina ia mafai ona toe ‘auai fanau nei mea-fai a afio’aga ma alalafaga i so’o se taumafaiga. E fa’afetaia ai pea le lagolago taua a le UNICEF ona o le agalelei aua fanau a Samoa. 

09 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>