Fa’aalia le fa’anoanoa o se samaria na fesoasoani i se tama’ita’i

Tusia Deidre Tautua-Fanene ,

119 Hits

Fesoaosani: Lemalu Mathew Mualia.

Fesoaosani: Lemalu Mathew Mualia.

O le gaioiga vave a se taule’ale’a atonu na sefe mai ai le soifua o le tama’ita’i lea na fa’ao’olima ai se ali’i e ala i lona tatuiina i se naifi.

O le taimi muamua lea ua mafai ai e lea taule’ale’a ona saunoa mai e uiga I le fa’alavelave.

O le susuga ia Lemalu Mathew Mualia o se tasi lea o samaria na fesoaosani i lea tama’ta’i ma sa ia saunoa i le tulaga mata’utia sa ia va’aia i lea aso.

I lana imeli i le Samoa Observer sa ia ta’ua ai ni vaega se lua sa ia va’aia ma le fa’anoanoa i le taimi na tula’i mai ai le fa’alavelave.

 “O se va’aiga fa’anoanoa sa o’u maitauina i lea mafine,” o lana saunoaga lea.

“I le aso na tupu ai le fa’alavelave sa ou tamo’e ai i lo’u faletalavai e aumai se fesoaosani mo manu’aga o lea mafine.

“Ina ua ou fo’i mai sa ou va’aia le to’atele o tagata o lo’o laulaututū ma si’omiaina lenei tama’ita’i.

“Sa na’o le tutu lava ma pu’e a latou ata. O nisi o lo’o pu’eina latou videos e tusa ai ma le mea na tupu, ao lenei e fa’aletonu lenei mafine.”

Pe tusa ma le tolu lenei o vaiaso talu ona tupu le fa’alavelave lea, ae sa ta’ua e Lemalu lona le talitonu i uiga fa’aalia o tagata.

Ua liua mai i se atunu’u alolofa ma loto fesoaosoani a lea ua atagia mai ua na’o ni tagata le alolofa ma le faitatala e aunoa ma se magafagafa e fesoasoani i se tasi o lo’o mana’mia se fesoaoani.

  “Sa ou taumafai lava i lea taimi e fa’afilemu lenei mafine a’o talitali ai le taunu’u ane ale ta’avale a le falema’i.

“O ona manuaga sa fai si mata’utia. Sa ou aveina i totonu o le ta’avale a le falema’i ma ou fai ai e fai se ma tatalo, ae na ia musumusu mai i lo’u taliga ma fa’apea mai, “O lo’o i ai Iesu ma a’u.”

“O se fesoaosani sa ou fa’aalia ina ia mafai ai ona ou taumafai e togafiti ona manuaga, a’o talitali ai le ta’avale a le falema’i.

“O ata o lo’o silaisla e ta’u atu ai le tulaga sa i ai lea tinā i lea taimi o ona mafatiaga.

“O lenei tina sa fa’aiva ona tatui e aofia ai lona tua ma lona ua ma isi itu o lona tino atoa.”

O lea ua mafai ona te’a lenei mafine i tua, e o’o fo’i i le na fa’ao’olima i le tinā nei ua mafai ona alu i tua ma le falema’i.

Sa fa’aalia fo’i e Lemalu e le tatau i so’o se tinā po’o se tama’ita’i ona avea ma tagata e a’afia i ia ituaiga manuaga fa’apea.

 “Afai o mafai e le itupa o tama’ita’i ona faitau lenei itulau ma o lo’o a’afia i nei sauaga fa’apenei o la’u lu’i mo oe ua tatau ona e aluese mai loa.

“E ono sefe mai ai lou soifua pe a e filifili e te alu ese.

“E le’o i ai se saogalemu o oe i totonu o lena mafutaga fa’apena.”

Sa fa’afetaia fo’i e Lemalu le tali atu a le matagaluega a le soifua maloloina.

© Samoa Observer 2016

Developed by Samoa Observer in Apia