Fesoasoani le nu’u o Vaimoso i le sa’iliga o se tasi o pagota

Tusia Deidre Tautua-Fanene ,

44 Hits

Uili Manuleleua

Uili Manuleleua

Ua tu’umai nei tauau o alii ma faipule fa’apea ai ma matai o le afioaga o Vaimoso e galulue fa’atasi ai ma le Mataglauega o Leoleo fa’apea ai ma le Matagaluega o Falepuipui e sa’ilia ai le ali’i pagota o Uili Manuleleua lea sa sola ese mai Tafaigata i le tausaga ua mavae a’o lumana’i ai le Kerisimasi.

O lenei fesoaosani sa fa’amaonia mai e le Ta’ita’ifono o le Komiti o Tulafono o le nuu le afioga i a Aulavemai Asiata Tafito. 

“O lenei pagota o se atali’i e fa’asino i le afioaga o Vaimoso,” o lana saunoaga lea i le Samoa Observer.

“Afai ae i ai se tasi o le nu’u o lo’o latou silafia se nofoaga o lo’o iai Uili e tatau ona sau e logoina mai.

 “O le a i ai fo’i fa’asalaga o le a tu’uina atu i so’o se tasi lava o lo’o iloa se nofoaga o lo’o i iai lenei ali’i ae le sau e ta’u mai.”

O Uili o lo’o tuli lona fa’asalaga i le toese i moliaga o le gaoi ma le talepe fale ae sa sola ese mai i Tafa’igata a’o loma ai le kerisimasi e o’o mai lava i le taimi nei e le’i maua lava.

 “Matou te mana’o e toe fa’afo’i le pagota lenei,” o le saunoaga lea a Aulavemai.

“Ma o lea ua tonu ai i le afioaga o Vaimoso e tatau ona fai se matou galuega ina ia sa’ilia mai ai lenei taule’ale’a ma o lea fo’i o lo’o ua fai nei le galuega a alii ma faipule o le nuu i le tau sa’ilia ai o Uili.”

Sa ta’ua e le so’oupu a le matagaluega o leoleo, Auapa’au Logoitino Filipo e fa’apea o lo’o fa’amoemoe lava le sa’iliga o lenei ali’i i luga o fa’amatalaga o lo’o tu’uina atu e le mamalu o le atunuu.

“O lo’o matou tali atu lava i fa’amatalaga o lo’o tu’uina mai e le mamalu o le atunuu ae peita’i o lea ua toe fo’i lava su’esu’ega i le mea na amata mai ai.

“O le matou fautuaga i le mamalu o le atunuu e aua nei sōsō i ai pe a va’ai iai ona e fai lava si fa’aletonu o le tagat.

“Ae ia logoina mai le ofisa o leoleo i le numera 22222.”

© Samoa Observer 2016

Developed by Samoa Observer in Apia