Fesoasoani muamua i a te oe
Na fa’ailoa e Mailo Peteru le le faigofie o le olaga o lo’o ua i ai nei le olaga o le to’atele o le atunu’u.
Na ia fa’ailoa o le taimi lenei ua le toe aoga ai se fa’anofonofo ma e ao lava ona fa’atino vaega uma aua le aga’i ai le lumana’i.
“O le olaga lenei a e le fesoasoani muamua lava oe i a te oe e leiloa le mea e ono o’o ai le olaga.
“O a’u o le taimi lenei ua matua’i o’u alofa lava i lo’u aiga, aua o lo’u iloa i ai o faamanuiaga nei e ao lava ona tausi lelei i ai, aua e tua i ai le lumana’i.
Ia o lea lava le olaga o lo’o ua i ai nei, e faigata ma tele fa’afitauli ae a o tatou le fa’amalolosi o lona uiga e afaina i tatou i mea uma tatou te faia.
“E pei mo le silafia, o le alofa lava e ta’ita’ina aim ea uma, i totonu o aiga ma le atunu’u lenei.
“O a lava fa’afitauli e o’o mai, e le mafai ona tu’u ai le tulaga o le taumafai pea ina ia atia’e aiga, aua fanau o lalovaoa i’i ma o le lalolagi.
Na ia fa’ailoa le taumafai ai pea lea ina ia atia’e aiga i le mafai .
“O le ola e fa’alagolago i isi tagata i lo’u iloa i ai e le taitai lava ona lelei lea, o le ola fa’alagolago e le’o se itu lelei lea i lo’u iloa i ai.
“O lo’o taumafai atu lava e fau le fale ia ona va’ava’ai atu ai lea i se isi tulaga mo le lelei alu i luma o tagata.
“O se itu e ao lava e nai o tatou tagata ona galulue i ai, o le uiga o la’u tala, a le aunoa ma le galue e leiloa pe fa’afefea ona ola aiga.
“I a te a’u o lea lava le mafua’aga e ao ona o tatou va’ava’ai i ai le aga’i ai le lumana’i o nai o tatou tagata aemaise lava o nai o tatou fanau aua le aga’i le lumana’i.
“O le ola fa’amoemoe i isi tagata i lo’u iloa i ai e le’o o se itu lelei, ae ao lava ona o tatou iloa o lo’o i ai lava vaega e ao ona silafia lelei aua le aga’i atu ai le lumana’i.
“O le ola e atia’e lelei ai tagata , o se itu lelei ma taua mo le aga’i atu ai le lumana’i.