Faigata le Sailiga o le seleni

By Ulimasao Fata 09 December 2017, 12:00AM

O le meaai ua le’o se fa’afitauli ae o le taumafaiga i le sailiga o se seleni ua matua faigata lava.

O le saunoaga lea o le taule’ale’a ia Toetu Matai’a Tuloto 23 tausaga o lona soifua mai le afioaga o Matafa’a Falelatai.

Na maua le avanoa e feiloa’i atu iai ma le Fofoga o Samoa a’o taliu atu o ia I lona aiga mai lana galuega le aso ananafi.

Na saunoa foi le taule’ale’a ia Toetu I fa’afitauli o lo’o fegai nei ma lona aiga.

“O le vaega ele’ele lea o lo’o matou nonofo ai nei na’o le lua lava aiga o lo’o iai ae o le faigata o le leai o se auala feso’otaiga I lea itu, e le o’o atu le pasi I le matou fale, ona e le au mai I luga iinei, e savavali lava I lalo e pu’e ai le pasi toe svali mai I luga iinei pe a tu’u matou I lalo I o.

“O le olaga lea ua iai nei le matou aiga I lenei foi itu o le atunu’u ua matua faigata lava le sailiga o le seleni ona na’o a’u o lo’o maua ai se seleni a le matou aiga.

“O le galuega o lo’o ou faia nei o le galuega I se tasi o Tama a le matou nu’u nei I lana ma’umaga ma maua ai se $50 I le aso.

“A’o le faigata o le galuega lea iai nei e le’o aso uma e faia ai galuega ma o le tulaga fa’aletonu lena o lo’o iai nei.”

Saunoa foi le taule’ale’a ia Toetu o le meaai e le’o se tulaga faigata lea I le latou aiga.

“O lo’o lava le matou ma’umaga o lo’o iai nei ma o lo’u uso laititi o lo’o maua mai ai le meaai I le sami.

Ua fia maua sa’u galuega e tausi ai le matou aiga ona ua faigata lava nei aso.

By Ulimasao Fata 09 December 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>