Manatu o le Fa'atonu

By Faaliliu e Seagaitumua Tupuola 10 April 2016, 12:00AM

Na filifilia Pope Faranisisi e avea ma pope lona 226 o le Ekalesia Katoliko Roma ia Mati 2013. Ona o le pope muamua lea mai Amerika, na soifua mai ma faaigoa o Mario Bergoglio.

Talu mai le filifilia o ia, o le tele o mea e faapea e afua mai ia te ia sa avea ma mea e lu’i ai le mafaufau, e tele lona taua ma e pele i le tagata masani i luga o le alatele. 

Mo se faata’ita’iga, na ta’ua o ia ma lana saunoga e faapea:

 “E sili ia te a’u se Ekalesia ua mafo’efo’e, pagatia ma palapalā-ona ua leva ona i luga o ala tetele; i lo se Ekalesia e le soifua maloloina mai lona nofo pea ma mai lona taupe pea i lona lava puipuiga malu.Ou te le mana’o i se Ekalesia e mamafi tele i lona avea ma totonugalemu ae i’u ane ua maua i totonu o se ofaga o mea tiga ma taualumaga.”

—Pope Faranisisi

I le faagasologa o taimi ua mavae, o tala na tusia pe na faailoa atu e uiga ia te ia ua avea ai o ia ma tagata e tamaoaiga i le alofa ma ua teu mau ai le silasila mamao lea e talitonu le toatele-o loo faatūtū i le puipuiga o le aia tatau a soo se tagata.

O se tasi o ia tala fai mai o se Pelepitelo e pulea se Vaega o le Ekalesia Katoliko i totonu o se atunuu i le Pasefika i Saute na malaga artu i Roma, ma i le faagasologa o le taimi sa i ai o ia –sa la feiloa’i ma le pope.

I le faagasologa o le la fono e le tagata na asiasi atu lona mana’o e faatau se taavale fou pe a toe taliu atu i fanua. O le tali, fai mai o le upu a pope i lana malo e le tatau i le Ekalesia ona tuu atu se avega i le fanau a le Atua. I lea taimi-e aliali mai sa faaaoga e le pope se taavale tuai.

 Mulimuli ane ina ua toe taliu lana malo faaaloalogia i lona atunuu, na te le’i tuliloaina lana miti o le maua o se taavale fou. Sa na taofi pea i lana taavale tuai.

O le isi tala fai mai sa tula’i le pope i totonu o se laina e aga’i atu i le faitoto’a o se fale tifaga-ae ofo ane ia te ia e se tasi le mea sa tu ai i totonu o le laina. O le tali-sa teena e le pope i se faiga faaaloalo lea ofo ma fai atu faafetai tele, ma toe fai atu e faapea e le afaina ia te ia le faatali pea e pei o isi lava tagata.

O le tala lona tolu fai mai na talosaga se ulugalii i lo la pelepitelo e papitema le la tama pepe ae na teena e le pelepitelo; o le faafitauli e faapea e le’i faaipoipo lea ulugalii ma o lea na faailoa atu ai e le pelepitelo ia i la’ua e tatau ona la faaipoipo muamua.

Ae peitai, na maua e le pope se tala e uiga i lenei mataupu itiiti ma o lea na alu ai o ia i le vaega o le ekalesia o loo ta’ua-e aunoa ma le iloa e le pelepitelo-ma papitema le pepe a lea ulugalii.

O le aoaoga o le tala e matua manino lava lona faigofie,fai mai o le pepe o le aia tatau lea mai le Atua e tuuina atu ai i le tulaga mamā atoatoa faale-agaga-ma e le tatau ona teena talu ai le faatalale o ona matua.

I lana fe’au o le Eseta na tuuina atu i le Vatikana i le aso 27 o Mati, sa lapata’ia e Pope Faranisisi  e uiga i le faateleina pea o le faamata’u i le soifuaga tau le aiga talu ai le faateleina pea o tiga o faafeagai a ii soo se atunuu i aso nei.

Na ia tusia: “I le tele lava o itu, e fo’i mai matua i le aiga ua vaivai, ua le fia tautala, ma o le tele o aiga ua le o toe auai faatasi i se taumafataga e masani ai.” Na ia faamatalaina “o le faatiga ogaoga” i aiga “ia e foliga mai ua sili ona noatia i le faamautuina o lo latou lumana’i i lo le faafiafiaina i le taimi nei.

“O se faafitauli lautele lenei tau le aganuu ua faatetele ai le fefe e uiga ia latou galuega tumau, tupe ma le lumana’i o tamaiti,: o lana tusi lea.

O lona igoa “O le Fiafia o le Alofa,” o lana faaaliga faalaua’itele lea na una’ia ai le Ekalesia Katoliko Roma ina ia sili atu ona agalelei ma ia itiiti ona faamasino atu, a’o ia faailoa atu se ala tau le tausi mo tagata Katoliko ua tete’a ma toe faaipoipo ina ia latou talia le komunioga.”

Na vala’auina foi e ia pelepitelo ina ia “talia matua ta’ito’atasi, tagata faafafine ma i latou e le’i faaipoipo-ua nonofo faatasi.” Na ia tusia: “O se faife’au na te le lagona e faapea ua lava pe a faafaigofie tulafono faale-agaga ia i latou o loo nonofo i totonu “o tulaga e le masani ai, e peiseai o i latou o ni ma’a e tau’ai atu i olaga o tagata.”

Ma –ae mo “faaipoipoga a ni tagata tutusa se to’alua,” e le o faavaivaia Pope Faranisisi i lona talitonuga e faapea “e tatau pea ona tapuni le “faitoto’a” i lea tulaga ma fai mai e le mafai lava ona vaaia e avea ma mea tutusa tau sootaga a ituaiga o tagata.”

Ae ui o lea-na ia ta’utino e faapea ua uma ona fai e le ekalesia mea sese tau le aveeseina o aiga ma tuuina atu le tele o tusitusiga e faamatala ai malosi ua mafua ai ona matitiva aiga ma fia’a’ai, malaga ese, faaaoga sese o fualaau faasaina ma sauaga.”

Ma o lea tulaga ua aumai ai tatou i lalo i le fefe e aliali mai e le mfai ona uma ona o taua i Sasa’e Tutotonu, lea fai mai lipoti e toatele o loo faaauau pea ona fasiotia i aso nei ma le isi toatele ua aveese mai o latou nofoaga.

O lea tala e tau faamata’u, ma ioe-o le mea moni lava. E ui lava ina o sauaga ua le mafai ona tineia na faatupu e le inoino o le tagata ua saeluaina ai olaga o le faitau afe ma afe –pe afai e le faitau miliona ma miliona –o tagata e leai se sala i lea vaega o le lalolagi i aso nei, ae foliga mai e peiseai o lo tatou tulaga ma le tulimanu o le lalolagi o loo tatou nonofo ai iinei i le Pasefika  e peiseai o loo malu puipuia ma tatou te le o iloa lava pe aisea.

Poo le a lava, e le o sa tatou mea lea o le taumafai e saili  pe aisea, ae, ia tatou maua le loto faafetai a’o tatou teuina pea lenei filemu uiga ese lea ua loa ona tatou manatu māmā i ai i le tele o tausaga, ina ia mafai ai poo fea lava o loo tatou i ai i le asŏ-pe o tatou i le aiga poo i le falesaga-ia tatou taofi mau pea i ai ma ia ‘aua lava nei tuuina atu e alu.

Ma i le taimi nei, ia tatou tatalo mo tina ma teineiti o loo nonofo i le fefe i nofoaga e pei o Nigeria, lea o loo faamalosia ai i latou e avea ma tagata faapa-pomu e pule i le ola tusa lava pe mumusu ai, ma le iloa lelei e ono mafai ona fasiotia i latou i soo se taimi. 

I totonu o le New Yorki Times o le aso 7 o Aperila 2016, o le tala na tusia e Dionne Searcey sa faamatalaina ai le faiga sa aoaoina ai ia tamaitai, fai mai na ta’u atu ia i latou” “Taofi le pomu i lalo o lou lima e mau lelei ai.

 “Aveese le ulu o lou fili mai tua, ia faaitiitia le tauiviga.”

 “Afai e te tipia mai tua o le ua, e vave ona latou feoti.” 

O mea tau Faa-fefe ae o mea moni lava. 

 O le Long War Journal lea na te tuliloaina gaoioiga a le ‘au-faatupu faalavelave, fai mai o le vaega faatupu faalavelave, o le Boko Haram, “ua uma ona ia faaaogaina a itiiti mai o le 105 o fafine ma teineiti i osofaiga pule i le ola talu mai Iuni 2014, lea na faapa ai e se fafine se pomu i le nofoaga o le fitafita i  Nigeria.”

O le taimi lena na amata ai ona faaaoga fafine e avea ma faa-pa pomu. Na amata ina ua latou aveina se 300 teineiti ma o le toatele o i latou e le’i toe maua. Fai mai Lipoti e faitau selau ma selau isi lava tamaitai ma teineiti na pu’e faamalosi, faa-falepuipui, toso ma i nisi taimi una’ia ma le loto i ai e fai feusuaiga e le talafeagai ai, masalo  ma le faamoemoe ia maau ai se tupulaga fou o tagata tau. 

Talu mai lena taimi, o fafine ma teineiti, ia e masani ona o ma pomu e nanā i totonu o ‘ato poo i totonu o latou ofu, ua uma ona latou fasiotia le faitau selau ma selau o tagata e ala i osofaiga faasaga i maketi tau i’a ma fualaau fai mea’ai, a’oga, fale tetele, falesa ma e oo lava i togalauapi mo tagata ia ua sosola esi mai o latou aiga ina ia ‘alofia sauaga. 

E le o se mea lenei e mafai ona e faato’ilaloina pe aveeseina i se taimi vave,” o le faaaliga lea a Issa Tchiroma Bakary-le minisita o fesootaiga i Cameroon, lea ua faamaonia ai le 22 o tamaitai faapa-pomu talu mai le amataga o le tausaga.

Fai mai a ia: “Tou te le iloa pe o ai lea. A e vaaia se teineitiiti o aga’i mai ia te oe , e te le o iloa pe o ona nanaina se pomu.”Ma na ia toe ta’ua: “Ae peitai, e le mafai e fitafita ona tafana fafine uma poo teine e foliga mai e masalomia.”

O se tasi tamaitai, o se Kerisiano, lea na sola ese ina ua fai o ia ma tagata faapa-pomu e pule i le ola-o lona igoa e le o faalaua’iteleina-ae fai mai o le isi taeao na o atu ai fitafita i lona nuu ma faapāpā fana a’o latou tuua vave a latou taavale ma faapotopoto fafine ma teineiti.

Mulimuli ane-sa faamalosia ona tusi lona igoa i totonu o vasega a le Boko Haram e uiga i tusitusiga faa-Isalama, o le laasaga muamua o lona ala  i le aoaoina i le poto o le faapa pomu pule i le ola.

Ina ua mavae ni nai masina o koleniga, sa mafai ona sola ese mai e o taofia o ia i le tasi aso a’o latou potopoto mo lauga i le afiafi. Sa faamuli o ia, ma faamaopoopo lana fanau e to’alua ma se tama a lana fanau, ona latou sosola ai lea i le tuaoi i Cameroon “Ou te le’i mana’o e ave se pomu,” o lana faaaliga lea. I le taimi nei- o lea ua na faamatala mai le faiga na ia sola ese ai a’o nofo i totonu o se togalauapi mo tagata sulufa’i i totonu o le Cameroon-lea e o’o atu i se laufanua e matua tele o loo tūtū solo ai fale’ie ma fale e fai i le palapala.”

Ia outou maua Samoa se Aso Sa to’afimalie, ma ia faamanuia atu le Atua 

By Faaliliu e Seagaitumua Tupuola 10 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>