“E faaaogaina e le Atua tagata taitoatasi uma”

10 April 2016, 12:00AM

O upu a le Atua i lona nuu e ala atu i lana perofeta o Isaia, “….o o’u manatu e le o outou manatu, o o’u ala e le o outou ala.” (Isaia.55:8,9). E ese la tatou vaai, auā ua faamasino e lau vaai le tagata i fafo.

A o le Atua e silasila i le loto, ma na faatulagaina lea tagata ma lea tagata i lana fuafuaga paia ua finagalo lava ia iai. Ua tatou vaai faatauvaa ma manatu maulalo i nisi uso a tagata (Iakopo.2:1,9) but God has a plan for every individual.

Fai mai le fomai, ua tupu le finauga i soo; i aposetolo; i faifeau; i ositaulaga; i tiakono; o faresaio. O finauga fai mai Iakopo e pogai mai i o outou manao leaga o loo faataugaina o outou tino uma (Iakopo.4:1-2).

E afua i le loto ua leaga ma ua faaoloatauaina e le loto faamaualuga ma le olaga fia sili ma le manatu faapito ia te ia lava, lea fai mai Peteru, ia aveese mai ia te outou (I Pet.2:1).

Ua faailoa mai e Luka, ua iloa mamao atu lava e Iesu nei ituaiga loto, oka, se matautia! A o faifeau tofia! O faigaluega filifilia mo le feau o le faaolataga! O le silasila a Iesu, e mamao lava i luga le mea o loo felelei ane ai loto o le au uso ia.

Ua manatu lava le tagata ia ia te ia. Ua manatu o ia o le soo o Keriso! O ia o le lupe na fā’ia mai le fuifui! O ia na valaauina faapitoa e Iesu! Ua faumalo le manatu; i le ua taufaatauvaaina ai nisi tagata  uma!

A o le tamaititi, e le amana’ia e le vaai; e le ano’anoa e se isi; e le faitaulia i sou manatu, ae na faasilisili i le plan a le Atua (47,48).

Ua le o se tino lelei poo se aulelei o le tamaititi, a o le loto o i ai i lea laasaga tonu o le soifua o le tagata (infant), ua fai ma faamanatu, ma fafagu mai ai pea ia te oe ma a’u le sini o lo tatou faaolaina, o le loto.

A sa’o le loto, ua tonu lau faaiuga (Ruta.1:16,17). A mamā le loto, e te vaaia le mamalu o le Atua (Mata.5:8). A salamō e faamagaloina (II Sam.12:13); o le loto talitonu, e faaolaina ia (Rom.10:9).

Afai la e talia e oe ma a’u le faatusa lea, ua tatou talia foi e le gata o Iesu, a o lona Tamā na auina maia o ia. 

Le au uso e, e tofotofoina pea i tatou i taimi uma ma aso uma. O loo lu’iina pea foi i tatou e le vaai ma le faalogo e le aunoa. Tele foi taimi ua tatou manatu faamaualuga ai na o tatou lava.

Ona tatou nonofo lea ma faamasino olaga o lea ma lea. Ua tatou faitau o mea lelei uma ma faaliga e faia e le Atua, e tatau ona faaalia mai ia i tatou. Ae leai (Is.55:8); e faaaogaina e le Atua le faavalevalea ma le taugaeleelea.

E faaaoga e le Atua le mativa ma le sauāina; le tagata puapuagatia ma le tagata ua faalēamana’ia. Auā ua faapea mai Iesu, Ou te faafetai ia te oe lo’u Tamā e, le Alii o le lagi ma le lalolagi, ina ua e nanā ia mea i ē popoto ma ē atamamai, a ua faaalia atu ia mea i tamavalevale…auā o lou finagalo lava lea (Mata.11:25-26). Ioe, auā ua i le poto ma le atamai i tulaga faapea, le logovii ma le faasausili.

Uso, e poto tele le Tofa Faasoa a lo tatou Atua. 

I le fuaiupu e 49, o loo aliali manino mai ai le manatu faapito o soo o Iesu i le galuega. E ‘ū e faasoa. E manatu o le mea patino lea na ’o latou. Ua le ’i iai se faauuga i la ’ia tagata latou te tulia ai temoni ma fai faamalologa.

I le, ua latou pule e taofi, ona ua le o so latou. Tasi lea oti o le talitonuga kerisiano i o tatou tagata lotu. Ua tatou nonofo ma faatulaga lea lotu ma lea lotu. Ona agiga loa lea o le taulagiga a le ola faafoliga, o lotu faaolaina??

Po ua e le iloa ea o loo i mea uma lava le Atua? E faaolaina oe i le vao, i le sami, i le alatele, i le umukuka, i le falepuipui, i le falema’i, i le fale kalapu, Aisea? O loo i mea uma lava le Atua. O le plan a le Atua i lou olaga o le alofa faaola.

Poo fea lava e te tapuai ai, ia sa’o ma faamaoni lou loto i le Alii lou Atua. Salamō ma faatuatua i lona suafa, ma talia Iesu Keriso e fai ma Alii ma Faaola i lou olaga. Ona e iloa lea liliu ese mai lou olaga tuai, ae faasaga a’e i le Atua i lou tagata fou ua suia atoatoa e le alofa tunoa o le Atua.

Samoa e, e faaaogaina e le Atua tagata uma taitoatasi. ‘Aua le faailoga tagata. Soia le tusitusi lima o ai ua lelei a o ai ua leaga. ‘Aua tatou te  faamasinoina le fuafuaga a le Atua i lea tagata ma lea tagata.

Ua ou faalogo i le tele o faitioga ma le tetee o o tatou tagata i le auala sa faaaoga ai e le Atua sia afafine i Falelatai. Viia le Alii! Muamua, maifea le agaga na mafua ai ona faaigoa lenei tamaitai ia Toaipuapuaga i lona fanau mai?

O lona uiga, ua o se valoaga mo a taeao. Ua uma ona tapena e le Atua se feau e ala mai i lenei afafine a o le i fanau mai. O se vaega o le plan a le Atua. Faafetai o loo faaaogaina o tatou tagata.

Ae faigata ona tatou talia ona o le Samoa, a ea. Pe ana o se palagi e leai se faatautee. Lona Lua, ona e le o se member o lotu ia o loo taulagi nei o lotu faaolaina, a ea? Tolu, ona o le afafine o se faifeau o lotu ia ua ta’ua Main Line Churches, e le tatau iai, a ea?

Fa, ona o le teineititi fai mai isi e le o se teineititi lelei, a ea? O a ma isi faitioga? O lona uiga, e te le taliaina le plan a le Atua i le olaga o lea afafine? O le a le ituaiga faaolataga ma le faaolaina o tagata o loo molimauina e le ekalesia?

Ua le eseese lo tatou faigata ma loto o ositaulaga ma faresaio. Ae sa’o lava Ioane, “ua pupula mai foi le malamalama i le pouliuli ae le i talia e le pouliuli” (Ioane.1:5,10,11). E te iloa, na maliu mai Iesu ina ia salamō le tagata agasala (Mata.9:13).

Ou te fautua ma le alofa moni i le aufaigaluega ma le au molimau, e le mafai ona e iloa le mamalu o le Atua, e le mafai foi ona faaalia lona mamalu ia te oe pe afai e te loto masalovale, ma eleelea lou loto, ma ua le faamamaina lou tagata.

Fai mai Tavita, “na o le tagata ua iai lima mama, ma le loto mama; o lē ua le naunau lona loto i le mea faatauvaa, ma ua le tauto faa’ole’ole….” (Sala.24:3-6). Valaau I le Atua mo sou faafouga (Sala.51:10).

Samoa, o le plan a le Atua mo lana faaolataga sa faaaogaina ai le tele o tagata sauā ma le toto lima; tagata faitaaga ma mulilua. O pulega ma faigamalo faapaupau.

Tatou te le fia faalogo iai; tatou te teena ma le ofo; peitai, e le mafai ona tatou suia se fuafuaga tonu a le Atua i lea tagata ma lea tagata; i lea pulega ma sea faiga malo. Fai mai Iesu, ‘aua tou te vaoia.

Ioe, ua tele ina  tatou fia pule ma tatou fia faamasinoina tagata uma. Uso e, o le mea lena a le Atua. ‘Aua e te nofo ile nofoa o le faamasino. Tuu i le Atua lana galuega ua le o tatou o ni faamasino. E faaaoga e le Atua tagata uma e tusa ma lona lava finagalo.

Masalo poo le valu sefulu pasene o faifeau Samoa o loo faitio ma tetee i le faaalia mai o le mamalu ma le silisili ese o le Atua i lea afafine o Samoa. E musu tele tatou e toilalo la tatou lauga ma ta’ufaatauvaa 

la tatou molimau i ni faaaliga faapea! Fai mai Iesu, ’Aua, auā o lē  le ‘au ese ia te i tatou, e ‘au faatasi lea ma i tatou. O loo galulue foi latou e tusa ma le valaauina ua faaaogaina ai e le Atua.

Tatou talia faaaliga a le Atua ua auala mai i le afafine, ma tatalo i le Atua e saga faamalamalama mai ia i tatou uma se feau taūa mo tatou e ala i le afafine ma lona faaaogaina e le Atua. 

Samoa, tatou manatua le afafine i le tatalo ma le anapogi. Le au uso e, ia Keriso, ‘aua ne’i positive le lauga ae oti le taunuuga. Ne’i suamălie ma lologo au upu, ae solomua oe i le olo ma le mulu.

E tāua i le Atua tagata uma. Fai mai Paulo, “ae peitai ua filifilia e le Atua mea vālea a le lalolagi, ina ia faamāina e popoto, ma mea vaivai a le lalolagi, ua filifilia ia e le Atua e faamāina ai mea malolosi; ma mea faatauvaa a le lalolagi, ua filifilia ia e le Atua, atoa ma mea e leai, ina ia faaleaogaina e ia mea o iai” (I Kori.1:27,28).

O le pese a Tavita, “Ieova e, …ua e faatumauina le viiga i gutu o tama meamea ma tama fesusui, ona o e faasauā ia te oe, ina ia faanofosa’oina lē ua ita ma le ua taui ma sui. (Sala.8:1-2).

Le au uso e, nofo i lalo ma mafaufau faaleagaga. Tootuli ma tatalo. Faatuatua ma galue, seia e iloa fuafuaga mamana a le Atua i lou tagata ma lou siomaga.

Amene

7737063

10 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>