Ua tele lava suiga ua o’o iai Samoa i lenei vaitau ma ua maitauina lava ua o’o i se tulaga lē manuia.

O lea manatu sa faailoa e le susuga ia Matua Uili, 58 tausaga le matua mai le afioaga o Salamumu ina ua afea e le Fofoga o Samoa i le aso ananafi.

Ou te talitonu ua tele lava suiga i Samoa nei.

O le suiga pito sili lava ona maoa’e ua ou vaaia i Samoa nei o le taugata o le soifuaga faatusatusa atu lea i tausaga ua mavae atu ma tua atu.

“E aofia ai le tau o oloa i faleoloa.”

“E le gata i lea ua maitauina foi le faatuatuanai e le pulega a alii ma faipule le taua o a latou matafaioi e ala lea i le taitaiina o afioaga. Ma o ia suiga e ala lea i le taofia o Sā i afiafi ae ua avea lea ma ala lea ua maitauina ai le tele o faafitauli ua feagai ma tupulaga talavou .”

“O le taugata o le soifuaga ua mafua ai le toatele o i latou o loo i Tafaigata.”

“Ou te talitonu foi o le ala lea o le toatele o i latou ua fai ma a latou galuega tumau le faatauina lea o fualaau faasaina.”

Taua e Uili “O lā aso sa māmūlu se mea ina ua e faamolemole ae peitai o lenei vaitau ua salasala lava ona toe faaaoga le faamolemole .”

“O nei suiga uma ua tutupu ua atagia mai ua amata ona o’o Samoa i se tulaga ua lē toe saogalemu i lenei vaitau aua o lea ua maitauina le tele o nei suiga.”