O LA’U TALA FO’I

11 June 2016, 12:00AM

1. Ua toetoe lava o aso uma o lenei vaiaso o le a fano atu- e aumai ai lava faamatalaga o lea taumafaiga ma lea taumafaiga e uiga i le tau togafitia o faiga pi’opi’o lea ua pipisi e pei o le faama’i oti i totonu o Samoa! O le pine o se manatu- o lea foi faatoa uma atu taumafaiga a se vaega o Malo Aufaatasi-na o’o mai i Samoa nei- e tau titina le afi lea ua mu-saesae o faiga pi’opi’o a le faigamalo o loo i ai nei-faatasi ai ma tapulepulega leaga a tagata faigaluega o le Malo!

O le fesili la-“O ai na tutuina le afi lea ua mu-saesae nei i totonu o Samoa –tau faiga pi’opi’o ma taupulepulega leaga ? O le tali-o le faigamalo a le HRPP ma tagata faigaluega o le Malo! O le fesili taua la-“E mafai ona fo’ia nei faiga pi’opi’o pe afai o loo tu-totonu ai le faigamalo?

Afai o le tali-‘e mafai’-o le fesili la-“E mafai la  faapefea? Afai ua leva ona taofiofi e le faigamalo le faamaoniga o nei faiga pi’opi’o ae le tuuina atu i le Faamasinoga e fai i ai le amiotonu ma le faamasinoga—faamata la e i ai se paoa o Malo Aufaatasi e tuuina atu ai lenei mataupu i le Faamasinoga-pe afai e le faatagaina e Malo Aufaatasi faiga pi’opi’o i totonu o faigamalo o loo avea ma sui auai o Malo Aufaatasi?

O le isi fesili-e faapefea pe a musu le Palemia e fausia se faaiuga a Malo Aufaatasi? O le a sou taofi?

2. Matauina iTala Fou e faapea o le Fale Tele o le Faalapotopotoga o Eleele a Samoa  lea o loo i Tuana’imato-ma sa faaigoaina o le ‘Fale o Agaga Leaga’-o lea o le a avea ma nofoaga o le ‘Hoipe for Cancer.’O lona uiga la-o lea fale tele i Tuana’imato- o le a avea ma nofoaga mo togafitiga tau le Gasegase o le Kanesa.

O le Pule Faatonu la o le Faalapotopotoga o le ‘Hope for Cancer’ i Mexico o Dr. Antonio Jimenez-o ia lea sa feiloa’i ma le Minisita o le Soifua Maloloina ma sui o le atunuu- e uiga i lea faamoemoe-ma fai mai Dr Jimenez -o lo latou faamoemoe atoa mo Samoa-o le togafitia lea o gasegase tau le kanesa ina ia faatosina mai turisi mo togafitiga faa-foma’i. O le latou matafaioi la- o le fo’ia lea o mataupu ogaoga tau le soifua maloloina o loo feagai ma Samoa….!

Ia afai la ua maua lenei fesoasoani tele mo togafitiga o le atunuu-o ai la na manatu e ono mafai ona maua e Samoa ni foma’i faapenei mo togafitiga e sili ona faigata ma taugata? O le a sou taofi?

3. Matauina i se tasi o ulutala o Tala Fou fai mai ua selesele le aufaifaatoaga i se tupe e $2.5 miliona o le taui…..! O lea la polokalame-o le toe una’ia lea o le totoina o toganiu, kofe ma le koko….! Afai la o lea ua toe tau faaolaola ia alamanuia masani a le atunuu-o le fesili-“o le a le pogai na lafoa’ina ai nei alamanuia mo le atunuu?

Faamata o manatua e le faigamalo-o oloa e pei o le koko, popo, fa’i, talo ma isi lava faaeleeleaga a le atunuu-sa la’u uma i fafo-ma o le pogai lea sa leai ai se mativa i totonu o le atunuu-e pei o le tulaga ua i ai nei! O le tulaga na i ai le atunuu- e matua leai lava se mativa masaesae e pei o le tulaga ua i ai nei! O le fesili la-o le a le pogai na faamuta ai ona la’u ia oloa i fafo-ae o le faigamalo a ai na faamutaina le auina atu o nei oloa i fafo?

Afai la o lea o le a toe faaolaola le toe totoina o nei laau uma-o lona uiga-o lea foi o le a tatou toe fo’io i le sitepu tasi e toe amata mai ai-talu ai le faatautala ma le le kea i le manuia lautele o le atunuu! O le fesili la mo le Minisita ma le Matagaluega o Faatoaga-“O i ai ni maketi i fafo e faamoemoe e avatu i ai nei oloa pe leai?

Pe ua mafua ona toe lalaga nei mataupu-ona o lea ua aga’i sa’o mai tagata mai fafo-e faatau atu i tagata faifaatoaga a latou oloa tau koko, poo ma isi lava fua o faatoaga?  Afai e leai-ailoga la e tatau ona toe faamaumau lena $2.5 miliona aua e le toe ola mai-ae ave e fai ai se isi mea aoga! O le a sou taofi? 

4. Matauina foi i Tala Fou-o lea foi ua toe tuuina mai e le Faletupe o le Lalolagi i le Malo o Samoa le isi aitalafu e $38 miliona mo le toe faaleleia o galuega tau femalagaiga i vaalele…..! O lea la ua mautinoa nei-o mea uma tau galuega tetele-o aitalafu lava ma faaunegatupe mai fafo-e faamoemoe i ai!

O le fesili la-Aisea ua le mafai ai ona faatupe e le faigamalo ia galuega tetele? O le mea lava lea o le a tatou alu ai-o le aitalafu ma le faaunegatupe-ae o le fesili-e totogi e ai?

Ana faapea la e le maumau le faitau miliona ma miliona o tupe a le atunuu i faiga pi’opi’o a le faigamalo-faamata la o se amiotonu le faaaoga sese ma fai faiga pi’opi’o i tupe a le atunuu-ae toe totogi e le atunuu nei faaunegatupe o loo soona fai faatautala e le Malo? O le a sou taofi?

11 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>