O le tala pito i luma o lenei aso, o se fa’ata’ita’iga lea o finauga i le va o le tulafono ma aia-tatau a tagata-nu’u Samoa ma le Ofisa o Leoleo, lea e taumafai e tausisia le tulafono i totonu o le atunu’u nei. 

O lo’o aofia fa’atasi i totonu o ia finauga, tu’ua’iga o le fa’aletonu o leoleo i le le-mulimulita’ia lea o ‘auala tonu e ao ona faia ae maise le feoa’i ma fe’avea’i la’au-malolosi a’o pupula iai fanau i le taimi ma’ale’ale o le taufai vevesi ma le fa’aosoosoina o le mafaufau. 

O’o ane loa lea i le ripoti o le ulua’i osofa’iga o lea aiga ia Setema talu ai, lea na lokaina ai Tupito ona o le umia o la’au-fa’asaina o le mariuana. E le o natia e le faletua o Silafa’i lea tulaga, pe fa’apea mai fo’i e sa’o lona to’alua. A’o le osofa’iga lona lua la i nai aso mulimuli ane – lea e fa’apea sa fa’aa’upegaina ai susuga a ali’i-mamalu o le malo, lea fo’i e ta’ua e leai se pemita fa’ataga na tu’uina atu i le aiga ma ta’ua ai e le faletua, e le gata na matua fa’amata’uina ai si ana fanau-laiti e to’alua, a ua matua fa’alumaina ai fo’i o ia ma le aiga.  A’o ai a le-tu’ufesili, pe mafua  lava i se a ona fa’aa’upegaina o Leoleo i le osofa’iga loa lua a’o lea latou te lokaina le tama o lea aiga?  Lea ua ta’utino e Silafa’i le fa’alumaluma a’o le tusitusilima o ia ma le fanau, e isi tagata o lona nu’u i Si’umu.

O le taimi nei la, o lo’o fa’atalitali pea i se ripoti mai le Ofisa o Sulufa’iga, lea sa fa’ao’o iai lana fa’asea i le tausaga talu ai. O le mea moni, o lo’o fa’asea ona  o le ‘umi o fa’atali mo se tali e ‘aumai. Ina ua fa’afeso’ota’i atu e le Samoa Observer, ae fa’apea mai se tasi o le ‘aufaigaluega, e fai lava si ‘umi o fa’agasolo su’esu’ega ma e mafua le tuai, ona o le leai o ni tali mai molimau. E mautinoa fo’i, e le na o Silafa’i o lo’o talia se tali o lana mata’upu mai lea Ofisa. 

Moni la e le’i maua se avanoa o le Ali’i Komesina o Fuiavailili Egon Keil mo se tala lata mai o lea mata’upu, ae sa ia fa’ailoa muamua lava i tusitala ma le vaega fa’asalalau ina ua tula’i mai lea fa’afitauli i le tausaga ua mavae, sa fa’a’aupega le vasega o leoleo i le taimi o le latou osofa’iga peita’i, na te le’i ta’ua, le fa’alala ma fa’ata o ia fana i fanau a lea ‘olomatua. 

Moni la e le o matua atoatoa fa’amatalaga o lea mata’upu, ae iai nisi vaega ua silafia nei.

Muamua lava, pe afai ua e soli le tulafono – o le umia lea o la’au-fa’asaina - i le mata’upu lea, e ono su’esu’e ‘Oe, molia ma taofia e Leoleo.

Lona lua; moni sa faia se galuega e tu’uina atu ai la’au-malosi uma e le’i resitalaina, ae o lo’o anoanoa’i lava isi la’au-malosi o lo’o salalau i tua. I le mata’upu lava lenei o fa’atinoga fa’asolitulafono e pei o la’au-fa’asaina, e mautinoa lava, e maua ai ma la’au-malosi le-fa’atagaina i Samoa nei. 

O le fesili tala la mo lenei aso, sa tatau ona fa’a’aupegaina Leoleo i le osofa’iga lea? 

Lona tolu, afai e moni tu’ua’iga fa’apea e le’i fa’atinoina e Leoleo ‘auala tonus a tatau ona uia – o le iai o se pemita e faia ai lea su’esu’ega, lona uiga, o fai lava si ogaoga o lea sasi. O amioga le-fa’aporofesa ia a Leoleo e le taitai talia e le mamalu lautele o le atunu’u. Pei lava ona naunau mai ina ia tatou tausisi i le tulafono, e fa’apena fo’i ona tatou manana’o tatou, ina ia latou tausi ma usita’ia tulafono ma fa’atinoga maioio o lo’o tusi-matamata-tetele i a latou ta’iala ma fa’atonuga fa’aLeoleo. Ae iai fo’i se isi mata’upu fa’apea na matua faitio ai le Ofisa o le Komesina o Sulufa’iga, ina ua le-mulimulita’i Leoleo i ‘auala ma fa’agasologa tonu o galuega, a ua taumafai e fa’ata’ita’i i se polokalame TV a leoleo Amerika. 

O le lona fa, lea na ta’ua e Silafa’i Tupito, sa matua gatete ma mata’u ona o le mea na tupu ma ua matua fa’alumaina ai o ia, lana fanau ma lo latou aiga atoa, ona o le va’ai a tagata o le nu’u, o ia o se tagata solitulafono. E ui lava na te le’i solia le tulafono, e leai fo’i se mafuaga e ono tutupu ai ni lagona fa’apea ia te ia. Ae afai ua soli e lona to’alua le tulafono, po’o le a lava sona le-fiafia i le mea na tupu i lona fale, e ao a ona tu’ua’ia pea lona to’alua ona o ia ua mafua ai ona a’afia fua lona aiga.