“Ua taugatā lava le tau soifuaga o lo’o ua i ai nei.” Le tamā i a Mua Kerisiano, 60 le matua o le soifua mai le afioaga o Apolima.

O le fa’atalatalanoaga i le aso ananafi ma  le Fofoga o Samoa, na ia fa’ailoa ai le tele o suiga i lenei vaitau pe ā fa’atusatusa i aso ua alu.

 “Ia o aso la, o le tau o le mamoe po’o sa’u pasese ou te alu ai i Apia, ia na’o nai sene lava, ae o le taimi lenei , ia tepa i ai, ua e talanoa i le $100 e te alu ma oe, ae na o sau mea’ai lava ma lou pasese uma.

“Ua matua’i ese le faigata lea ua feagai nei ma si o tatou atunu’u.

 “O le mea lea ua i ai,e  mana’omia lou alu ma le $1000 e fai ai sau fa’atauga aua ou te leiloa fa’amatala le taugata o lo’o ua i ai le tau o lavalava, mea’ai ma mea uma…e mata’utia le mea lea ua i ai.

Na ia fa’ailoa o lona aiga e to’atele  o lo’o faigaluega ae o lenā tulaga , e le’o mafai ona gafatia le tele o le mau mea ma le tau o le soifuaga o lo’o ua i ai nei.

O lona talitonuga ‘Ia o le malo lava ua mafua ai ona fa’apea i tatou nei ma pologa. “E le’o i ai ma se mea e tasi o  latou fa’atinoina se’i tau fesoasoani mai ai le mativa ma le lē tagolima o lo’o ua i ai nei tatou.“O la aso, ia sa tau leai ni fa’aleaganu’u ma le mau fa’alavelave, ia o lae ta’imua lava le malo i le faia o nei tulaga uma.

 “E tatau lava i le malo ona tau fesoasoani i nai isi o vaega o lo’o o tatou pagatia ai i le tele o aso.

“E o’o lava i penisione, ia e le taitai ona lava mo le tele o nai o tatou tagata matutua.“O Niu Sila, ia e amata mai lava le tamaititi pepe se’ia o’o le tagata matua – e maua tupe aemaise o le tele o fa’amanuiaga e maua e le ‘au penisione.

“O Samoa, ia e misi atoa!