Fa’alauiloa le ‘Samoa Whiskey’
O le maua ai o le fa’atalatalanoaga a le Samoa Observer ma le Ofisa Sili o le Vaega Su’esu’e Fa’asaienisi i i le atunu’u, Dr. Seuseu Tauati na ia fa’ailoa ai o le taimi lenei o lo’o ua i le vaega mulimuli e fa’agaioia ai le atoaga o le whiskey lea ua o latou gaosia mai le talo.
Na ia fa’ailoa o se tasi lea o la’asaga tele o lo latou fa’alapotopotoga i le taimi lenei aua lava le aga’i atu ai le lumana’i.
E tusa ai ma ripoti na tu’uina atu muamua, o se fiafiaga tele e pei ona ua fa’ailoa mai e le Minisita o Fa’atoaga, Lopao'o Natanielu Mu'a le fiafiaga a le malo ona o le tino mai o lea fa’amoemoe.
O se galuega sa galulue punouai ai le SROS mo le taumafaiga o lea atina’e taua mo le atunu’u.
O le vaiaso ua mavae na taumamafa ma tofoina ai e Minisita o le Kapeneta, taumafa ‘ese’ese ma vai taumafa na gaosi fa’apitoa e le Fa’alapotopotoga o Su’esu’ega Fa’asaienisi a Samoa (SROS).
O ia taumafa na gaosia mai i laau e ola a’e i totonu o lo tatou atunuu.
O nei taumafa e gaosia, o se matati’a lelei lea mo le ta’uleleia o le SROS ma ana galuega fa’atino.
E tusa ai ma ripoti, na saunoa le Afioga i le Palemia ia Tuilaepa Dr Sailele Malielegaoi, ua leva ona naunau le Malo ina ia i ai ni oloa fa’apenei, o ava malosi ma faaigoa o le Samoa Whiskey, po’o le Samoa Rum, e fa’alauiloa ai ua gafatia e o tatou tagata e i ai le tomai fa’apitoa, ona gaosi oloa tu’ufagu mo fefa’ataua’iga.
“O le fagu la lea, o le fagu na gaosi mai le talo, e i ai le ‘ava la e i totonu o le talo, e i ai a le ‘ava i so’o se mea a fa’apala loa, puga ae loa le ‘ava, lea la e i ai le fagu Whiskey o la e fautuaina, ia i ai a se tatou Samoa Rum, tai pei o le Jamaica Rum, ma se tatou Samoa liquor,” na saunoa ai Tuilaepa.
Na fa’afetaia e Tuilaepa le tᾱua o le fausia o lenei Ofisa fa’apitoa mo su’esu’ega, aua laau o le natura mo le gaosia o oloa ma taumafa, ina ia fa’afaigaluegaina ai Samoa ua i ai lo latou poto fa’apitoa i ia matᾱta, ma ia mautinoa le itiiti o le avanoa e toe malaga atu ai i latou e saili galuega i isi atunuu.
Ua valoia e le Afioga i le Palemia ma le Malo, le si’itia o a tatou oloa gaosi mai lo tatou si’osi’omaga ma le tamaoaiga pe a mae’a le tele o nisi o fuafuaga o lo o fa’agasolo a le Ofisa o Fa’alapotopotoga o Su’esu’ega Fa’asaienisi a Samoa.