Foma’i-fa’ata’ita’i: Molia i le fa’ao’olima i se tui

By Fa’aliliu e Maiava 12 May 2016, 12:00AM

Ua molia nei i le tulafono se ali’i sa fa’ailoa atu fa’apea, o ia o se foma’i, ona o lona fa’ao’oina lea o ni manu’a i se tasi e ala i se tui, a’o ia fa’atinoina ni ‘au’aunaga fa’aFoma’i.

Sa tala’i atu i tagata e le ali’i o Christopher William Savage - ua 53 tausaga o le soifua, o ia o se foma’i ma ia ofoina atu ai loa ni ‘au’aunaga fa’aFoma’i i totonu o le a’ai o Hawke’s Bay i Niu Sila. Peita’i e le o ia o se foma’i-resitalaina i le Fono a Foma’i a Niu Sila, ma ua tu’uina atu ai nei e le Komiti Fa’atonu o le Falema’i Fa’aItumalo a Hawke’s Bay lea ali’i i a’ao o leoleo ma le Matagaluega o le Soifua Maloloina. 

O le masina ua mavae, na tu’uina atu ai e le Komiti Fa’atonu o le Falema’i i Hawke’s Bay, se fa’aaliga e lapata’ia ai tagata o le itumalo, ia ‘aua le talia so’o se togafitiga a’o ni ‘au’aunaga  fa’aFoma’i masani, mai le foma’i-fa’ata’ita’i lea.

Na fa’amaonia fo’i e le nusipepa o le NZ Herald, ua molia nei lea ali’i i moliaga fa’asolitulafono peita’i, e le’i o’o atu i le Fa’amasinoga Fa’aItumalo i Hastings i le vaiaso talu ai.

O lo’o molia Savage i le solitulafono o le fa’ao’olima, e fa’aaogaina ai se tui e avea ma a’upega, i le va o le Aso 09 ma le Aso 23 o Aperila.

Na ta’ua e John Brans,o se Leoleo-nana o le Ofisa o Leoleo i Hawke’s Bay, o lo’o fia maua nisi fa’amatalaga mai nisi sa iai ni o latou so’otaga ma Savage, i le fa i le ono vaiaso talu ai. 

A fa’amaonia moliaga, e ono fa’asalaina lana susuga lea i le falepuipui mo le lima tausaga.

O lo’o fa’alauiloaina e le Fono a Foma’i a Niu Sila i upega-tafa’iLagi, o foma’i uma i Niu Sila, e tatau lava ona resitalaina fa’aleTulafono ma iai se tusi-fa’amaonia e fa’atino ai lea ‘au’aunaga.

O se solitulafono le fa’atinoina o ‘au’aunaga fa’aFoma’i i Niu Sila e aunoa se fa’atagana fa’aleTulafono. O le Tusi Fa’amaonia e fa’amautuina ai le agava’a o se foma’i e fa’atinoina galuega fa’aFoma’i e tusa o aiaiga ua mae’a ona fa’ata’oto i totonu o lea Tusi Fa’amaonia.

By Fa’aliliu e Maiava 12 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>