Vae ma lima e tautua ai le aiga

By Vatapuia Maiava 12 September 2016, 12:00AM

O le Aso Sa i vaiaso uma ua filifilia e Opetaia Opetaia o Aleisa e galue ai aua se tupe maua e  tausi ai lona aiga.

O le aso ananafi na fa’atalatalanoa ai e le Fofoga o Samoa Opetaia i luma o le Maota o Samoa i Vaitele a’o ia fa’atau atu ai i le mamalu o le atunu’u mea’ai taumafa vela.

O le fa o masina talu ai na amata ai ona ia faia lea galuega ina ua ia iloa ua amata ona o’o lona aiga i se olaga faigata ona o lē leai o se isi e faigaluega.

“O a’u, na o le Aso Sa lava ou te sau ai, o lo’u mana’oga ia mafai ona ou tausi i o’u matua, aemaise o’u tuafafine e to’alua o lo’o a’o’oga lava i le taimi lenei.  “Ua ala ona ou filifilia le Aso Sa ona ou te iloa e telē la’u tupe e maua ai nai lo aso o le vaiaso.

 “E le gata i lea, ou te iloa e le’o toe faigofie le olaga o lo’o ua  tatou i ai nei.

Na ia fa’ailoa, o le tausiga o lona aiga le ‘auga o galuega o lo’o ia fa’atinoina.

“Ia o le tele lava o taimi ua leai se tupe, e moni fo’i e maua atu tupe iinei, ia ae le taitai ona lava ai le fa’asoa i le vaiaso.

“O a’u e ulumatua, o na’i o’u tei, ia ma ou matua lo matou aiga, o le taimi lenei o lo’o a’o’oga o’u tuafafine e to’alua.

“O la’u ia tilotilo atu ai ma le alofa i le tau fa’asoasoa, ia e pei o lea lava le mafua’aga ua una’ia ai lava lo’u sau. “Sa faigata lava i le taimi muamua, lagona le matamuli , ae fa’afetai i le Atua ua alu alu lava lea ua masani.

“O le isi faigata, ia o lo’o tatou iloa lava le Aso Sa, e tatau ona malolo lelei ai ma o ai le lotu.

“O lo’u ia va’ai atu ai, e sili ai i a te a’u ona ou sau e fa’atau, ulu, luau i le Aso Sa…ma maua ai le tupe nai lo le va’ai atu ua tupu mai se fa’alavelave i lo matou aiga ona o le fia ‘a’ai.

 “Ou te iloa fo’i o lo’o silasila mai le Atua ma malamalama i nei mea uma. O lona talitonuga, o lo’o i ai i Samoa se olaga faigata.

 “Ia o lena, a ē le alu lava e te faigaluega, ia aua e te masalosalo e fesoasoani atu se isi i a te a’u, pau lava le mea e fai o le to’aga e tatalo ma galue.

 “O le tele o taimi e sau ai le musu…ae e una’i lava ita ina ia fa’amalosi e tausi le aiga, aemaise o matua.

E $100 i le $150 le tupe e mafai ona maua e Opetaia i le vaiaso.

“O le taimi nei, ia e manaia fo’i ae maua nai faleoloa e kiliva atu ai a’u ulu nei ma lu’au vela e fa’atau ai i Aso Sa ae maua se taimi lelei e mafuta ai i le aiga ma alu ai i le lotu.

“Ae talosia o i ai se isi , o lo’o mana’o i lea tulaga o lo’o o’u momo’o i ai.

O lo’o auai Opetaia Opetaia i le Fa’apotopotoga a le Atua i Aleisa.

By Vatapuia Maiava 12 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>