O Samoa e ola i le alofa
“E leai lave se nofoaga e sili atu na’i lo’o Samoa.”
O lea le finagalo o le tama ia Taualeo’o Emele Su’a, e 49 tausaga mai le afioaga o Lealaoali’i i Faleasi’u.
Na ta’ua e Taualeo’o, o le itu e sili ai le olaga i Samoa, o le tulaga lea i le lelei o le ava fatafata ma le loto foa’i o tagata uma.
“O le olaga lenei, o aso ua lelei, o aso foi ua fa’alelei. Ae o le mea e tatau ona fai, o le talia o mea lelei ma mea leaga.
“O si o matou aiga, e fa’apena lava ma ou te iloa e faapena uma lava isi aiga i Samoa.
“Ae o la’u va’ai ai ile olaga i tua lava ia i nu’u i tua, o lo’o sologa lelei pea lava ma filemu.
“O lo’o alofagia pea e le Atua si o tatou atunu’u.
“A o’o atu foi i le taulaga ma tilotilo atu i le olaga o lo’o iai i Apia, e tele lava le ese’esega o le olaga i nu’u i tua nei ma le taulaga.
“E manaia lava le ea o tua iinei ma ua masani ai foi le olaga ia.”
Na ta’ua foi e Taualeoo, ua tele lava le suiga i totonu o Samoa i le vaitau lenei.
“Ua tele le mau atina’e tetele ma ua le toe tutusa lava Samoa i le vaitau lenei e fa’atusatusa atu i aso ua mavae.
“O se tulaga lelei lea auā o lo’o alualu pea i luma le olaga.
“O le anoanoa’i foi o suiga ua iai i le taimi nei, e omai fa’atasi lava mea lelei ma mea fa’alēlelei. Ae pau lava le mea e tatau ona fai, o le talia ma fa’amasani iai.”
E le gata i lea, ae na ia toe ta’ua foi, po’o fea lava le fe’ilafi mai o mea fa’atosina o le olaga o isi atunu’u, e le taitai ona aveesea Samoa mai lona loto.
“O Samoa, e ola lava i luga o le alofa.
“Ua masani ai lava Samoa i le ola fefa’asoaa’i ma le ola fetausia’i. E ola fa’alagolago foi i le laufanua ma le lauele’ele.
“E le pei o atunu’u i fafo, a le faigaluega a le tagata, e le maua foi se manuia. Ae o iinei, e ola sa’oloto ma ola fiafia tagata uma.
“A feasiasi solo foi i uo ma isi aiga, e fa’aali lava le talimalo o nai o tatou tagata ona o le fa’aaloalo ma le alofa.
“O se tasi lea vaega e ese lou fiafia ai.”