E tele fa’afitauli ua maitauina i le tele o olaga o le fanau aemaise o tupulaga talavou e pei ona ua maitauina nei, ma o se itu  e ao ona galulue fa’atasi ai.

O lea le aotelega o le finagalo o le tamā i a Tomanogi Lene, 67 le matua o le soifua o Lufilufi i le Fofoga o Samoa i le aso ananafi.

“Ia e muamua lava la’u ia tala aua ua le toe tau fa’ailo le tele o tupulaga le usita’i i matua i le mea lea o i ai nei.

“O so’o se olaga lava o se tamaititi e amata mai lava i totonu o lona aiga, ma o lona faleaoga muamua lava lea.

“Afai ae ola ane le tamaititi i totonu o lona aiga, ae fafaga i matua i upu fa’avi’ivi’i, leai se fa’atonuga lelei e ave ai ma ua galo ona fa’atonu.

“O le olaga lena o le a ola ane  ai, o le alu fo’i le tamaititi ma vivi’i o ia i so’o se tagata e talanoa ai, ma o ina o le a tupu ai lona loto fa’amaualuga.

“Aua o lea ua iloa e ia, o le manatu fo’i lea o ona matua i a te ia, e leai se isi e sili atu i a te ia.

“Ona alu ai lava lea se’ia pogisa lana va’ai i isi tagata ma leiloa ai lava se olaga fa’aaloalo i isi tagata ma fa’atonutonu lelei lona mafaufau.

“O lea e mafua ai aga nei ua tatou va’ai ai, ua le mafaufau , ua ola fa’asausili, ua ola ua leiloa le Atua, ua ola le usiusita’i i isi tagata, o se upu i le fa’aaloalo ua matua’i misi atoa.

Na ia ta’ua e ave lava lana fa’aseā i matua.

“E moemoenoa loa matua , ua tupu le fa’alavelave, e galo loa e matua lo la tiute ua tutupu mala.

“O fanau o le tofi, o le meaalofa mai le Atua, afai o i latou o meaalofa , o lona uiga e foa’i fua mai le alofa tunoa a matua.

“Ua na ona tausisi o le Atua, le Atua le mea lea e i ai ae mamao lava ni fa’atinoga.

“O laugutu e latalata i ai ae o le loto e pei o le vava mamao o sasa’e ma sisifo lea tulaga i le tele o le o matua ma o latou tiute i le mea lea ua i ai.

“Ia tu’u mai i fanau o lena le ata  ua molimauina le taimi lenei, o ai o iloa le isi lima i le sefulu tausaga.

“Afai o le alu lea o le a alu ai pea le tele o fanau ma tupulaga talavou e le a’oa’oina lelei e matua o le a se tali o a taeao.

“O se itu e ao ona toe galulue uma ai tagata uma o Samoa amata mai lava i matua, o matai o aiga, o le malo o ekalesia ta’itasi.

“Ia vave ona fo’ia le fa’afitauli lenei ua alia’e mai tupulaga talavou.

“E lelei lava le puipuia nai lo le tautogafitia.