Ua faigata nei aso
E leai se fa’amama avega i le taimi lenei i le soifuaga o lo’o ua tatou i ai.
O lea le talitonuga o Filisi Sa’u 27 le matua o Apolima i le fa’atalatalanoaga ma le Fofoga o Samoa i le aso ananafi.
“Ia o le taimi lenei o se itu e fa’afetai ai ona o le tamaoaiga o fanua aemaise o le sami lea o lo’o tele ina fa’alagolago ai le tele o nai o tatou tagata.
“Ae o le itu mautinoa lava ia, ua matua’i taugata lava le tau o le soifuaga ua o tatou i ai nei.
Na ia ta’ua e le’o mafai ona fesoasoani pisinisi a Saina i le taugata o le soifuaga o lo’o i ai nei.
“O le itu mautinoa lava ia i lo’u ia iloa i ai le taimi lenei, e tutusa uma lava tau o oloa a Saina ma pisinisi o lo’o ua i ai o tatou tagata.
“Ae ona o tatou e tele a tatou fa’alavelave ma le aganu’u o mea i le lotu e pei o lea le tulaga o lo’o ua ave ai lava le faamuamua o nai o tatou tagata.
“E pei o le isi mafuaaga lea e faigata ai lava ona maua se penefiti lelei o pisinisi aemaise laa pisinisi laiti i nu’u i tua.
O le isi tulaga na ia fa’aalia o le tele o aiga ua faigata lava ona maua se tupe maua.
“Ae ua o tatou iloa uma lava le olaga nei, e pei o tupe mea uma, ae o le to’atele o nai o tatou tagata o lo’o ua fa’alagolago i le sami.
“E le fa’apea la o le a maua ai tupe taimi uma, aua o le tele lava o vaega nei e fa’aaoga mo mea’ai a aiga.
“O le mafatiaga tele lavalea o nai o tatou tagata o lo’o ua i ai le taimi lenei o le taugata o le tau o le soifuaga.
“Ua tele nai aiga ua o’o lava i isi tulaga e pei o le le avea o tamaiti le aoga ona o le lava o le fa’asoa ona ua faigata ona maua se tupe fa’asili mo le aiga.
E ese mai le taugata o le tau o le soifuaga, na fa’ailoa e Filisi o lo’o sologa lelei mea uma i lo latou afioaga.
“Ia e pei o le mamalu lava a pulega a ali’i ma faipule o lo’o mafai ai lava ona maua le to’afilemu o vaega uma i aso uma.