TALATUU O FAGALOA

14 June 2016, 12:00AM

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer

E tusa ai ma Su’esu’ega ma Faamaumauga a Papalagi-fai mai o Fagaloa e aofia ai nuu o Samamea, Lona, Maasina (Salimu), Musumusu, Ta’elefaga ma nuu laiti o Sauano ma Saletele ia e taoto i le itu i sisifo  e lata i se moana loloto.

O Fagaloa poo se “Faga umi” e foliga e matomato e pei lava o Pago Pago i Tutuila.

O atu-mauga e maualuluga ma e mamao ese ma le sami, ae o loo lava ma totoe le vaega-eleele o loo i sasa’e, sa lava ma totoe mo le faavaeina o ni nuu se tolu.

O luga a’e o Lona-o loo pa’ū ifo ai se afu e sili atu i le 100 mita le umi mai luga o se aupa-papa e tu-sa’o i luga. O lalo ifo o loo taoto ai se matafaga o loo i ai Ta’elefaga i le gutu o se vaitafe i luga o i luga o se faga oneone ma le palapala.

O le itu i sisifo- o le mauga o Fao, o lona maualuga e tusa ma le 750 mita, ma ona pau lea o le avanoa mo le nuu o Musumusu lea o loo taoto ai le nuu o Salimu.

O papa ma’ama’ai la o le mauga o Fao e tifatō i lalo i le tolotolo papa e igoa o “Utuloa.” E pei lava o le itu i sisifo o Fao lea e lautele, ae tu matilatila mai ai lava Malata i le itu i sasa’e; ma o iinei sa faamautu ai tagata Tonga i le tele o tausaga ua mavae, ao latou pulea lea vaega o le atunuu. E latalata i le itu i sisifo- le anoano o ana ia e fati i ai galu.

O le aga’i itiiti atu i sasa’e- o loo i ai se faga itiiti o loo taoto ai Uafato i le ‘auvae mauga i sasa’e o le ‘auvae-mauga o Malata, lea o loo i ai le anoano o aupa malepelepe ma ni laau lanu siliva. O le aga’i i le sami-o loo i ai se piramita e tasi o papa o loo tutū pea.

O le laufanua iinei e uiga ese le manaia. E i ai le manatu o Uafato o se nuu itiiti lea o Fagaloa, ae a tuu i mau ua faaalia i lalo ma ona upu taoto- ona mautinoa ai lea- o Uafato o se nuu e tutoatasi.

O Fagaloa la- sa avea muamua ma nofoga o tagata Tonga-ma o se nuu e faasino i le Aiga Salevalasi- e tusa ai ma le mea moni -o Fagaloa sa i ai lana ‘Fua o Vaa Tau’ e uiga ese-ma e tusa ai ma faamaumauga a Misi Sitea- fai mai e “alu le Fua Tau lenei a Fagaloa i taua ma se pusa e faapea sa teu ai le atua o taua o “Tuiopulotu.”

O Upu Taoto la o Fagaloa e faapea:- “Tulouna Oe Sa Ulualo; “Tulouna le Vaa o Fonoti-o le Malu o Lalogafu’afu’a; “Afio mai lau Afioga Mata’utia o le Sa’o o Papā; “Tulouna Aumua ma Oloatua; “Tulouna le Foe Tautino; “Tulouna Atua Le Fauono; “Tulouna Fea ma le Fanauga; “Tulouna le To’afa a le Matua o Talamaivao; “Afio mai Lau Afioga Ulualofaigā; “Tulouna a Salevalasi o loo Afifio ai.”!

UAFATO: O se nuu itiiti lea sa i lalo muamua o le pule a Falefa, ae o lea ua soofaatasi ma Fagaloa i aso nei. O lona tulaga tonu faale-aganuu ua uma ona talanoaina i tusitusiga ua mavae; ae fai mai- ‘sa ta’ua muamua foi i talatuu o Manu’a- fai mai o ‘Uafato o le aiga o Lu”- ma lana “Pa-moa” lea sa faasa ona fasi e se tasi- e mafua mai i le igoa o “Samoa”. O Upu Taoto la o Uafato e faapea:-“Tulouna le Ituala Sa; Tulouna Lau Afioga Tuimalatu ma le To’afia o ou Alo; Tulouna le Faasisina o Lau Susuga Togia’i ma le suafa o Aumua; Tulouna le Sagapolu ma Vaifale ma le Ati Faasau ia Noga.”

14 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>