Tatalo Matai i le Fa’amasinoga

By Fa’aliliu e Maiava 15 April 2016, 12:00AM

O ananafi, na tatalo ai matai mai le Alataua i Sisifo, i lē sa avea talu ai ma Faipule o le Itumalo, o Lafaitele Patrick Lei’ataualesa, ina ia toe fa’aui i tua lana talosaga fa’asaga i le faipule fou ua filifilia nei.  

“’Ou te talosaga atu i lau afioga, toe fetu’una’i muniao i le tofa,” o le ‘ai’oi atu lea a Ta’atiti Manoa o Neiafu.

Na saunoa fo’i Ali’imalemanu Faleupolu o Neiafu, e le iloa e le tagata ua matua mo’omia se fesoasoani, ona ma.

 “E uia lava lenei tulaga, e so’o se tasi ua mo’omia se fesoasoani,” o lana saunoaga lea. “Ua le ‘alo lava i le fa’alumaluma. A ua tatalo atu, lafo le tofi ia Ali’imalemanu aua o le mea moni, e le uma le fai-aso o Le Ali’i.”

O le talosaga lea sa faia i le Fa’amasinoga Maualuga, a’o fa’agasolo le fofogaina o le talosaga fa’asaga ia Ali’imalemanu Alofa Tu’u’au, lea e tu’ua’ia ai e Lafaitele, ona o ana faiga fa’atosina ma faiga-fa’aalatua i le taimi o Faiga Palota Tele a le atunu’u. 

Le talosaga lea sa fuafua e fofogaina ananafi, i luma o Fa’amasino sa ta’ita’ia e le Fa’amasino Sili, Patu Tiava’asu’e Falefatu Sapolu. O le Afioa a Lesatele Rapi Va’ai, le isi fa’amasino sa ‘auai.

Na fa’atumulia le potu-fa’amasino i sui o le afio’aga, o faletua ma tausi ma le ‘au-matutua o le nu’u ma le Itumalo Fa’aAlalafaga o Alataua i Sisifo. 

O le taimi o le malologa i le taeao, na tula’i ai le matai Neiafu o Ta’atiti Manoa ma talosagaina Lafaitele, ia toe fetu’una’i le tofa. 

Na ta’ua, talu lava le aso o le palota, sa taumafai lava e tau-sa’ili atu o ia i lona fale peita’i, e le’i maua, e le-iloa fo’i po’o fea a sa’ili iai. 

“’Ou te malamalama lelei, e iai lau aia-tatau i lalo o le tulafono,” o le fetalaiga lea a Ta’atiti. “Peita’i, e iai lava mata’upu sa fa’atamali’i le filifiliga.

“E sefulu tausaga o tu’u-atu atoa la matou lagolago i lau afioga. Atonu ‘ai ua galo ia ‘Oe lena fa’aaloalo?” 

Na ta’ua fo’i, o se tulaga mataga le fa’atasina o le itumalo i luma o le Fa’amasinoga ma tatalo ai ia Lafaitele, ia toe silasila i lana fa’ai’uga ua fai.

“’Ou te tatalo atu,” o lana fa’aaliga lea. 

Na talosaga fo’i Ali’imalemanu Faleupolu i le mata’upu lea. 

“Moni o le aso lenei e fa’asaga tonu ia a’u le mata’upu, a ua le taofia ai lava a’u i le fia malamalama,” o lana saunoaga lea. 

“O le tulaga lava lenei e uia e so’o se tasi ua mo’omia se fesoasoani. E le ma e tula’i e ui ina fa’alumaluma. Tu’u le tofi ia Ali’imalemanu aua e le o le i’uga lea o le lalolagi.” 

“E toe oso le la taeao ma maua pea avanoa. ‘Ou te fa’amanatu atu fo’i, e uma taualumaga o le Fa’amasinoga lenei, a’o le tatou nu’u ma ana pulega, e fa’avavau ma tumau. ‘Ou te tatalo fo’i, ia fa’aauau pea ma ‘aua ne’i muta pulega a le nu’u ma le itumalo. 

“Ua ‘ou tigaina ma mafatia, fa’amolemole, alofa mai i lou nu’u.”  

Na tali-fuaitau Lafaitele ma fa’apea, o ia fa’atoa taunu’u mai Hawai’i ma lona tuafafine.

Na fa’ailoa i sui o le nu’u, na te le’i faia se talosaga i le Fa’amasinoga ae o lona tuafafine sa una’ia malosi lea tulaga. 

“Ua ‘outou silafia uma, e le-fiafia Lafaitele i nei mea,” o le fa’aaliga lea a le sa avea ma faipule o le itumalo.

“Ta’atia mai, talu ai, tou te le-silafia pe fa’apei ona o’o mai le mata’upu i’inei. O ‘ou tuafafine ma le loia ae ta’atia mai, se’i matou talanoa.” 

Ina ua toe amata le fa’amasinoga, na tula’i Amelia Fa’asau, le loia a Ali’imalemanu e talosaga le toe tolopoina o le mata’upu, ona e mo’omia se feutaga’iga fa’atopetope ma fa’ailo atu ai fo’i se suiga ua va’aia ma lagona i lea taimi.

Ae na mana’o Unasa Iuni Sapolu – le loia a Lafaiatele, e talosaga se talanoaga fa’alilolilo e faia.

E moni o le mata’upu o lo’o tulimata’ia e le to’atele, ae na fa’amamafa lava e Unasa, e le tatau fo’i ona so’ona una’ai fa’atopetope Lafaitele, mo sana fa’ai’uga. 

Na tolopo ai loa e le Fa’amasino Sili le mata’upu a’o alo itu uma e talanoa se tonu mo se feutaga’iga mulimuli. 

By Fa’aliliu e Maiava 15 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>