O LE TALA FAA-SALEMULIAGA I LE POGAI O NISI O NUU O LE FAASALELEAGA-O SAFOTULAFAI MA PALAULI

By Fuimaono Na'oia Fasavalu Touli F. Tupua - Suaga a le Vaatele 15 July 2016, 12:00AM

Fai mai o le toea’ina Faga e suafa ia Leaifaleava- na malaga i se tasi aso ma lona afafine o Leauta-i le tama o Taemanutava’e- lea sa faufau tane i ai lea teine. Ina ua taunuu ane i le nofoaga ua ta’ua nei o Tuasivi, sa la faalogoina le pisapisaō o tagata o loo tumutumu ai.

Ona o Leaifaleava e taulagi-(tauaso) -o lea na fesili ai i lona afafine pe aisea e tapisa ai tagata. Sa fai atu Leāuta-o tagata la e matamata i le tuasivi o le i’a.  Ona faapea lea o le toea’ina-“Ia faaigoa la le mea lenei o “Tuasivi” e faamanatu ai le matamataga ma le pisapisaō o tagata i le tuasivi o le i’a.

Ua sōsō atu teisi le malaga a le toeaina ma lona afafine i le aga’i i sasa’e. Ua la faalogoina le manogi popo-a-tai, ona faapea lea o le toea’ina i lona afafine, ia faaigoa le mea lenei o “Fogapoa” e faamanatu ai le manogi popo-a-tai. Ua alu pea le malaga aga’i i sasa’e. Ua la toe faalogoina foi le tapisa o tagata. Ona fesili lea o le toea’ina- pe o le a lea pisa?  Tali Leauta-“o tagata ia e fata mai le aufa’i o le usi, ma le tamaloa umī lava lale e sau ai -toeitiiti a tuia ai le Lagi i lona tumua’i.”

Ona faapea lea o le toea’ina-ia faaigoa la le mea lenei o “Fatausi,” ae faaigoa le tamaloa lale ia “Tuilagi.”Ona faaafe lea o le malaga. Ua alu ane le tama o Vae’au ma le taisi, e tatala atu o le a tausami, ua mu -toe namu lau’ulu. Ona faapea lea o le toeaina-ia faaigoa le tama lea ia “Namulauulu.”

Ona maua ai lea o Tuilagi ma Namulauulu. Ua toe alu le malaga. Ina ua latalata i le Tupua o Fuifafu, lea e i ai ma’a e lua, o tagi mai ai le aitu o Vave, o le ‘aitu tau’ lea o le Faasaleleaga anamua. Ona faapea lea o le toeaina-“ia faaigoa le mea lenei o “Fuifatu.” Ua toe faaauau le malaga. Ina ua taunuu atu i le vai lea na taunuu i ai le Lotu o “Mataniufeagaimaleata”-o iina na moe ai le malaga i lalo o le niu- i tala ane o le vai.

Ua o’o i le taeao po, ae alu ane le ve’a o Vave fafagu le malaga. Sa faalogo le teine- o tagi le ve’a, tagi le ve’a. Ona te’i lea o le teine ina ua tafa ata-ae vaai atu i le taufui niu. Ona ta’u foi lea e le teine i lona tama.

Fai mai le toeaina-“ia faaigoa le mea lenei o “Mataniufeagaimaleata.” Ona laga’i foi lea o le malaga. E ao ane ae taunuu loa i le mea ua igoa nei o Iva. Ona faapea lea o le teine-‘Vaai i le nuu lele- e moe loloa lava -a ua ao.” Ona faapea lea o le toeaina-“aua e te pisa leaga e Sa le “Lologa Pule” ma le “Lologa Faitoaga.” Ua alu pea le malaga ma ua sopo’ia le Itu Palauli. Ua taunuu i le pitonuu e igoa o Vaitoomuli. E taunuu atu-o tauvalaau ai le tagata ma tau alaga ia Palauli- e o ane (tulou lo’u gutu ma le afi) e fufulu le muli pe ta le ufa o Lilomaiava.

Ona fai ane lea o le teine i lona tamā- e- vaai le tamaloa lale e tootoo mai e le tagata lona muli i luga o le vai. Ona faapea lea o le toeaina-“ia faaigoa le mea lenei o “Vaitoomuli.” O le pogai foi lea- e ala ai ona igoa Le’avaiseeta o le “Fofoga o le Taufa.”

O ia lea sa tauvalaau ia Palauli -e o ane i le vai. Ua alu pea le malaga, a’o le faatonuga-ia o muamua lava-e saili le Fau e valuvalu ona a’a. E valuvalu atu- ae tautala mai le Fau-lea o loo lafi ai Vave. Fai mai le Fau-“a o’o i le ao-ona lua o lea e sasa le ma’a lale e tu mai-ona tafe mai lea o le vaitafe

. A tafe mai alia ma to mai timuga, ona tafea mai lea o le lauulu o le tama o Taemanutava’e-lea e faufau tane i ai le teine. Ona lua fetagofi loa lea- noanoa le foga i la’au.” Ua o’o i le po-ona ta’oto’oto lea o le toeaina ma lona afafine. Ua fati ane lau o le Fau ua evaeva ai ma momoe.

Fai mai le toeaina i lona afafine-“Talosia suga ia tau-Tupu lou gafa.” O le evaevaga lea a le toeaina ma lona afafine-ua ala ai ona maua le upu o le “Eva i le Laufau Malū”. Ona usu lea o Taemanutava’e i le teine lenei o Leautu- faae’e le gafa e to’afa tama ma le teine e to’atasi.

O tama ia o loo ta’u nei o-“Tu’itu’i o le Gato’aitele-o Fata ma Maulolo, ma tama ia o Vaafuti ma Vaafa’i ma lo latou tuafafine o Luafatasaga. Usu Malietoa ia Luafatasaga faae’e le faga o Malietoa Uilematutu poo Malietoa Faigā. Ona faapea lea o le toeaina-“se ua aoga ma evaevaga ma lo’u afafine i lalo o le Fau- o lea ua tau-Tupu lo’u gafa. 

Ae o le tala taoto lava ia-aua o loo ta’oto i Fuifatu faavae o le Faasaleleaga. O Fuifatu o le Malae o le Toto-e pei ona silafia uma e Samoa. O gatai atu o Fuifatu- o loo i ai Paepae-‘Alā -e faapea o ulupoo na o tagata. O gauta o Fuifafu –o loo tau saili e Safotulafai le mea o loo i ai foaga tetele e lua e faapea -sa faamata ai auupega a le Faasaleleaga pe a foli tau mo fafo.

O iina la i Fuifatu, o Toa uma lava e to’ilalo o latou itumalo i le Faasaleleaga, o iina e tafu ai le vai vevela e fufui ai fatu o tagata-ona avane lea ua tali ai le sua a le Faasaleleaga ma Safotulafai. Peitai-o le taofi faa-Sa Letufugā-o iina e lava e ta’i ai le sua a Letufuga. E lē ta’ia i se niu poo se taisi-ae ta’i i le fatu o le tagata. E fufui i le vai vevela ona ave lea e ta’i ai le sua!

By Fuimaono Na'oia Fasavalu Touli F. Tupua - Suaga a le Vaatele 15 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>