Tagofia e le Fono a le Ekalesia, tulaga fa’a-Ta’ita’i

Tusia Deidre Fanene ma Fa’aliliu e Maiava ,

150 Hits

O agava’a ma mana’oga fa’aTa’ita’,i o vaega ia o lo’o laualuga i mata’upu o le Fonotaga Lona 20 a Ekalesia Fa’apotopotoga a Ieova i le Lalolagi o lo’o faia mai i Samoa i le vaiaso nei.

O le fonotaga lea – e usuia i tausaga ta’ilua, e tu’ufa’atasia ai ta’ita’i ma sui o ekalesia ‘ese’ese mai so’o se tafa o le kelope, e talanoaina atina’e e fa’aleleia ai ma si’itia galuega a le ekalesia aoao. 

O le tausaga nei, o lo’o ‘auai mai sui o ekalesia mai le Iunaite Setete o Amerika, o Niu Sia, Ausetalia, Amerika Samoa ma Samoa nei.

O le afiafi o le Aso Lua, na tatala aloa’ia ai lea fonotaga. 

I se talanoaga ma le Pule Fa’atonu o le Ekalesia mai Amerika (AOGUSA) na ta’ua ai e le Susuga a Tu’ugasala Fuga, e fa’atauaina e le ekalesia le lelei o ta’ita’i mo le fa’afetauia o lu’itau o feagai ai i lenei vaitau o le talutalu fou.

“Ua iai lo matou talitonuga, o le fa’afitauli aupito ogaoga lea ua feagai nei ma lenei vaitau – le Seneturi Lona 21, ae maise lava i le ta’ita’iga o ekalesia,” o lana fa’aaliga lea. 

“E mautu lo matou talitonuga, a fa’a’aupegaina lelei ta’ita’i, o le a fa’apea fo’i ona sologa manuia le ekalesia.

“Na matou amata i le fa tausaga talu ai, i le faia o a’oa’oaga mo ta’ita’i o le ekalesia. O le fe’au lava lea pei ona ta’ua i le taeao, o le fa’amoemoe ia ta’ape atu le fua-manusina, fo’i faife’au i a latou ‘aulotu ma amata tala’i atu, fa’ailoa fa’amatalaga talafeagai uma, i ta’ita’i o ‘aulotu ‘ese’ese.”  

Na fa’aalia fo’i e Fuga, o se mata’upu aoga tele, e le gata mo le Fa’apotopotoga a Ieova, ae mo isi fo’i ekalesia. 

Sa fesiligia fo’i i fa’afitauli o nei aso pe iai se sao o le ekalesia e fai ae saunoa, o le ekalesia, o se vaega e tatau lava ona tula’i ma ‘auai i so’o se vaega o le soifuaga.

“O le pule i le ola, o le filifiliga lava lea a le tagata aua, e sau mai le fatu o le tagata, le vaega tonu lava o lo’o galulue aga’i iai le ekalesia,” o lana fa’aaliga lea.

“A lelei lava le mafutaga ma so’otaga a se tagata soifua ma lona aiga, o ana uo, lona nu’u ae maise lo la va ma Le Atua,  ‘ou te iloa la, o le a le-fa’aaliali pe totoina fo’i ia mafaufauga leaga, o le pule i le ola.

 “E taua ai lava le sao o le ekalesia i le tulaga lea, ae maise i tupulaga talavou.

“E le gata fo’i i lea, ae tatau fo’i ona tatou a’oa’o atu mea tonu ma mea sa’o. E tatau ona tatou a’oa’o atu i tupulaga talavou, tulaga talafeagai e ola fiafia ai.

“E le fa’apea e na o le Tusi Pa’ia o lo’o matou laugaina, ae ao lava ona taumafai e tu’usa’o le fe’au ma a’oa’o atu i se ‘auala lelei ma tulaga talafeagai, e o’o ai le fe’au aua ni suiga lelei e tatau ona iai.”

Ae mo le fonotaga i lenei vaiaso, saunoa Fuga, o se avanoa lelei e tapua’i ma tatalo fa’atasi ai i le vaiaso atoa.

O lo’o usuia lea fonotaga i le Maota o le Harvest Hall i Lotopa, ma e fa’amae’a i le aso.

© Samoa Observer 2016

Developed by Samoa Observer in Apia