O le anavatau ale Faletupe o le Pasefika i Saute o le tu’uina atu lea o le latou fesoasoani i fanau aoga e ala ini sikolasipi ua mafai ona latou ofoina atu i fanau aoga i tausaga uma.

O le vaiaso lenei e to’a 50 ni fanau aoga sa mafai ona fa’amanuiaina i nei sikolasipi.

O le tufatufaina o nei sikolasipi sa fa’apea ona fa’atautaia i le ofisa autu o le faletupe i Apia.

 “O le tausaga lenei e 190 tusi talosaga sa mafai ona fa’ao’o mai i le tatou ofisa,” o le saunoaga lea a le Pule o le faletupe i Samoa nei, Taitu’uga Maryann Lameko – Vaai.

“Ua fa’aopoopoina le fuainumera mai le tausaga ua mavae ma o le tasi nei o polokalame o lo’o ua mafai ona fa’atasi atu i ai le tatou faletupe.”

Sa ia fa’alauiloa fo’i o lenei polokalame ua mafai ona fesoasoani atu i fanau aoga o lo’o tulaga lelei a latou a’oa’oga.

"O i latou nei ua fa’amanuiaina i le asō sa filifilia lava e le laulau a fa’amasino e e tusa ai ma a latou galuega fa’atino, fa’apea ai ma ripoti fa’amaumau mai i puleaoga o aoga o lo’o a’otauina ai fa’apea fo’i ma ta’tinoga mai o latou matua.

 “I le mae’a ai la ona iloiloina auiliili o nei tusi talosaga sa fa’apea ona tu’uina o lea ua fiafia e fa’alauiloa atu e to’a 50 i latou ua mafai ona fa’amanuiaina i lenei polokalame.

"Talu mai le amataga o lenei polokalame, e ova atu ma le 300 tamaiti aoga ua fa’apea ona mafai ona fa’aauauina pea a latou aoga mo se taimi umi lava ona o le fesoasoani a le faletupe o le pasefika i Saute.”

Sa ave fo’i le fa’amalo ale tama’ita’i o Taitu’uga i fanau aoga ua mafai ona fa’amanuiaina a latou tusi talosaga.

 “O le fa’amoemoega lava ia mafai o le a avea nei fa’amanuiaga ma auala e fa’amanuiaina ai fanau aoga ua mafai ona manumalo.”

O se tasi o tama’ita’i Eneleata Laifa sa fa’afetaia le faletupe ona o le fesoasoani malosi i a te ia aemaise lava nai ona matua.

“Lagona lava le fiafia ona ua mafai fo’i ona maua lenei fa’amanuiaga mai le B.S.P. ma ua ou fiafia lava ona ua mafai ona fesoasoani malosi i la’u aoga aemaise ai o le fa’amama avega i nai o’u matua.

 “Ou te iloa e le faigofie ae fa’afetai i le pulega o le faletupe ona o lea ua mafai ai ona fa’auauina a’u aoga.

“Fa’afetai lava.”

O le tasi nei o auaunaga a le faletupe e fa’alauiloa atu ai i a Samoa atoa lo latou lagolagosua i tagatanuu o le atunuu.

O nei sikolasipi ua mafai ai ona fa’atupeina ai aoga mai le tulagalua seia o’o atu lava i kolisi maualuluga.

O se taimi muamua lenei ua mafai ai ona foai atu e le faletupe ni sikolasipi se 50 mo ni fanau aoga.

SUAFA O E NA FA’AMANUIAINA: 

Corallen Ulberg, Faasina Leaupepe Tariu, Asterios Savelio, Clement U. Lemana, Scloaina Leaupepe, Aquinas Hori Malu, Leida losefa, Daniel Tyrell, Venus V Vitale, Vasaloloa Filipo, Meri Elisara, Akesa Semisi, Phillip Mauala, Eneleata Laifa, Wilford Jonathan, Talalelei Vaoga, Daniel Lualua, Qara Anthony Taavao, Salamasina Teva Talamalvao, David Seko, Siaosi Galumalemana, Vilitai Fanua, Evolani Talamoni, Natasha Siutaia, Miracle Tafunal Sili, Gaylene Simone, Hemara Prettarosy Mullaga, Togisala Sauni, Sapule Tuua Lemana, Vaoiva Tanielu, Danica Burgess, Perolini Numla, Faafetai Ropati, Tiaoalii Ally Pita, Carita Vili, Anastacia Chan See,  Williebrielle Chang Foung, Mori Faafetai, Annya Laura Tama Ale, Maryrose Matatia, Faanaltaua Matatia , Salvation Sam Ling, Reuben Poe, Ualesi Tanielu, Su’a Levi, Regina Leilua, Soseflna Paiona, Penina Lemamea, Ana Louise, June Leva‘a and losefa  Wendt.