O le Faatonu o le Ofisa o Moliaga a le Malo (N.P.O), o Mauga Precious Chang na saisai ma molia ananafi. 

I lona ofisa i le Tofilau Eti Alesana Building, sa tiute ai Alii Leoleo o loo ofu toniga ma sui o le Tactical Operation Squad (T.O.S. i fafo ane-  e tuuina atu le tusi saisai. 

O le Alii Satini o Su’a Lemamea Tiumalu na ta’ita’ia lea vaega faatasi ai ma le fesoasoani a Satini Magalo Pule. A’o ta’ita’i ese mai o ia e Alii Leoleo, sa musu Mauga e fai sana faamatalaga-fai mai o le a feagai o ia ma lea mataupu e ala i lana loia. 

Na te le’i faailoa mai poo ai lana loia..I se taimi mulimuli ane, sa faamaonia e le Komesina o Leoleo o Fuiavailili Lincoln Keil moliaga e faasaga ia Mauga.  

 “Sa mafai e Leoleo ona faamaonia e faapea ua latou molia le Faatonu o le Ofisa o Moliaga a le Malo, Ms Mauga Precious Chang i le avetaavale faatamala ua manu’a ai se tasi ma le avetaavale mata’utia,” o lana faaaliga lea i totonu o se faamatalaga. “O le faaiuga ina ia molia –o le taunuuga lea o se suesuega a leoleo lea na toe iloiloina ai lea faila e se loia tau moliaga tuto’atasi. 

“Sa faailoa atu e Leoleo i le Faatonu ia Me ae le’i umi ona te’a atu lea faalavelave e aafia ai ni taavale se tolu na faaleagaina, ma na amata lea suesuega ma faatino ai loa moliaga. . Sa toe faamaonia atu foi ia te i ni nai vaiaso ua mavae e faapea ua ono mafai nei ona fai moliaga.

 “Ae ui o lea-sa toe tuuina atu lea mataupu mo se iloiloga tuto’atasi o faamatalaga molimau, lea ua mae’a i le taimi nei.”.  O le faamatalaga mai Leoleo sa le tuuina atu ai se aso mo lona tula’i i luma o le Faamasinoga. Ae ui o lea-e malamalama le Samoa Observer o le a tulai o ia i luma o le Faamasinoga i le aso 13 o Setema 2016..

Na toe ta’ua i le faamatalaga a le Komesina o Leoleo e faapea o le faaiuga ina ia molia Mauga na soso’o ai lea ma se manatu faale-tulafono tutoatasi na sailia e le Ofisa o le Loia Sili.

  “O lea loia tuto’atasi tau moliaga, o se loia tau moliaga e faamautu i Aukilani o Satiu Simativa Perese, na faaaoga e tusa ai ma le fautuaga a le Loia Sili ina ia mautinoa ai le tulaga tutoatasi, ma o le a galue tuusa’o o ia ma Leoleo.”

O le Alii Ofisa o Leoleo mo Nusipepa o Maotaoalii Kaioneta Kitiona na ia faailoa mai i le Samoa Observer e faapea o loo sa’oloto Mauga i tua se’ia aulia lona tula’i i luma o le Faamasinoga.