Tu’u atu le tauau o le B.S.P. mo e na a’afia i le afā o Gita

Tusia Deidre Tautua-Fanene ,

45 Hits

Peresetene o le Koluse Mūmū o Samoa Lei’ataua Jerry Brunt ma le Pule o le Faletupe i Samoa nei, Taitu’uga Maryann Lameko-Vaai.

Peresetene o le Koluse Mūmū o Samoa Lei’ataua Jerry Brunt ma le Pule o le Faletupe i Samoa nei, Taitu’uga Maryann Lameko-Vaai.

Ua taua’aoina atu e le Faletupe o le Pasefika i Saute se fesoasoani e tusa lona tau ma le $20,000 pe a fa’atupeina i le Koluse Mūmū a Samoa.

O nei fesoasoani e aofia ni meatotino e fa’aaogaina i taimi o fa’alavelave fa’afuase’i, mea tau vaila’au, o vai taumafa ma isi lava meatotino.

O lenei foa’i sa taua’aoina atu e le Pule o le Faletupe, Taitu’uga Maryann Lameko-Vaai i le Peresetene o le Koluse Mūmū i Samoa, Lei’ataua Jerry Brunt.

Sa fa’aalia e Taitu’uga o lenei foa’i o se latou fesoasoani lea mo le atunu’u i taimi o mafatiaga.

“O le auga tonu lava o le foa’i i lenei aso o se matou sao mo le atunu’u aemaise ai le Fa’alapotopotoga ale Koluse Mūmū i Samoa, i le latou galuega fitā o lo’o fai nei o le taumafai lea e a’apa atu i nai aiga ua mafatia ona o faiga le alofa a Gita.

FA’AFETAI LAVA: A’apa atu le Faletupe o le Pasefika i Saute mo e na a’afia i faiga le alofa a Gita.
FA’AFETAI LAVA: A’apa atu le Faletupe o le Pasefika i Saute mo e na a’afia i faiga le alofa a Gita.

“E fa’amuamua lava e le B.S.P. le auaunaga mo le atunu’u aemaise ai le saogalemu o tagata lautele ma manaoga o lo’o feagai ma nai tatou tagata, aemaise lava i totonu o Samoa nei.

“O taimi fa’apenei o fa’alavelave fa’alenatura e fesoasoani tele ai lava le tatou faletupe ina ia toe fa’afo’isia le ola manuia o nai o tatou tagata.

“O nei meatotino o le a mafai ona fesoasoani ai i nai o tagata aemaise lava i latou sa telē le a’afiaga o le afā i latou nofoaga e le gata i Upolu nei ae fa’apea fo’i ma motu tele o Salafai.”

O le talitonuga o Taitu’uga o se lagona fiafia fo’i ia i latou ona ua mafai ona latou tu’uina mai se fesoasoani e so’oso’o tauau ai ma le koluse mūmū auāle nofolelei o le atunu’u.

Sa fa’afetaia e Leiataua lenei fesoasoani tele ua foa’ina e le faletupe ina ia fesoasoani ai i nai aiga ma tagata o lo’o mana’omia se fesoasoani.

© Samoa Observer 2016

Developed by Samoa Observer in Apia