Moni e fa’atoa tasi le masina talu ona mae’a Faiga-Palota Lautele, ae foliga mai o le a fa’avavau ai pea talu le mau talosaga o fa’asea ma fa’amasinoga o le a fa’aauau pea ona tagofia e le Fa’amasinoga. 

Ae pei lava ona silafia, o nei vaega uma ua fefinaua’i ai nei, sa fa’atino lea i tua i taimi o faiga-palota ma o le tele fo’i o nei gaosa, e afua ona o le le-fa’amaoni, le le-fuafua-tatau ma le so’ona-fai, o mea e foliga ua pa’u-a’i o tatou lava tagata.

Ae o lo’o iai lava nai fafatala fa’aleIloga, o nisi e fa’ale-ano lava iai, a’o nisi fo’i e fai matilatila lava ma foliga e afua lava mai tama-matutua i le taulaga ae maise fo’i i tagata-ta’ito’atasi ma aiga, o fono a nu’u ae maise fo’i nisi e una’ia tu’usa’o nisi o lo’o fa’ananau iai ma ia manumalo a latou sui-fa’atutu.

Ae malie la, ona o fa’alalolaloga ma aioiga, o talosaga fo’i ma fa’ato’esega ua faia e matai ma aiga ina ia toe fa’aui ai i tua talosaga ua i le fa’amasinoga, o nisi ia o tala ma fa’aaliga ua tilofia nei i afio’aga ma itumalo ae maise lenei atunu’u, i nai vaiaso ua mavae nei. 

Ia o’o ane loa i le fesili tele, e uiga i se tusi-saisai mai Amerika Samoa, mo se ali’i-loia ua tofia nei e avea ma Minisita o Fa’amasinoga ma le Fa’afoeina o Tulaga Tau Fa’amasinoga, o Fa’aolesa Katopau ‘Ainu’u.

Ola ola se leaga!

E le’i tulaga mai lava lenei mata’upu i se tulaga mautu, e foliga o lo’o matua nunumi ma le-malamalama ai lava le Ofisa o le Loia Sili i Amerika Samoa, lea e tatau ona fitoi tonu iai le mata’upu.  

Lea na ta’ua e le Loia Sili o Talau’ega Eleasalo ‘Ale, e le se matafaioi lea a lona ofisa, le fa’ataunu’uina o lea Poloa’ia (Tusi-Saisai) ma e foliga mai, e le’i fa’atinoina lava lea tulaga atonu “ona e le o iai i ga-ō le tagata tonu o mo’omia.” 

Atonu e le o fa’apea mai le Loia Sili, a iai ni tu’ua’iga fa’asaga ia ‘Oe ma tatau ona tula’i i le fa’amasinoga e tali iai, ae e ninimo ‘ese, e tumau pea ia fa’amaumauga se’ia vagana ua faia iai o se fa’atatau.

Po’o le a lava po’o le a, e foliga mai ua alagatatau lava ona toe iloilo lelei, fa’amalosia ma toe lalaga i luga fa’atinoga ma le galosoga o galuega nei a le Fa’amasinoga. 

I le lomiga lenei, o lo’o iai se isi fo’i tala i se mata’upu tauFaiga Palota – ua i luma nei o le Fa’amasinoga.  

Le mata’upu lea o lo’o a’afia ai nisi se to’alua, o lo’o tu’ua’ia i le tu’uina atu o tupe i le itumalo o Gaga’emauga Numera 3. Lea na matua tutui ai e le Ali’i Fa’amasino, le loia o lo’o tula’i ma ia ali’i, ona o le matilatila o le le-lava o ana tapenaga ma le-ilafia ai moliaga fa’asaga i ana tama uma e to’alua. 

Ioe, ua ma’umau atoa ai taimi o le Fa’amasinoga, ae maise la le leaga o le ‘au’aunaga a lea loia mo ana tama sa tula’i ai, ma e matua le-talia lava e a tatou Fa’amasino. 

O le mea moni, e silia i le 100 mata’upu ma su’esu’ega e feagai ma Leoleo i vaiaso ta’itasi, ma o le tele o  mata’upu nei e o’o i luma o le Fa’amasinoga, e leai lava se avanoa e toe fa’atali ai mo se mea fa’apea. 

Ae mo tatou la ua leva o fa’afofoga ma malamalama i aiaiga ma tulafono ua tausaga o fa’ata’oto ma fa’ailoa fa’alausoso’o mai mo nei faiga-palota, ua tatou ioe-atoatoa ai, i le le-fiafia o le fa’amasino. 

Manuia lenei vaiaso i fe’au ma galuega!