O le va’aiga o le si’osi’omaga, o se tiute lea mo tatou uma. E le na’o le to’atasi sesi e feagai ma lea tiute.

O le manatu fa’aalia lea o Setefano Epati Patolo mai Vaiala i lana fa’atalatalanoaga ma le Fofoga o Samoa i le aso ananafi.

I le tele ai o timuga i le aso ananafi, ae sa le to’ilalo lenei tama mai le fa’amamaina o le lapisi i luma o lona maota.

Sa ia ta’ua e Setefano i le Fofoga o Samoa, o ia e le fiafia tele i se si’osi’omaga ae le fa’amamaina.

 “O lea e lelei le timu e fai ai galuega fa’apea, aua a la fo’i e leai sesi e toe fia fealua’i mai fafo i le vevela.

“E lelei fo’i le timu mo mea toto aua latou te mana’omia fo’i le suavai.

 O Setefano o se tama i se fanau e to’avalu ma o le tiute fa’atama lava ia o le fesoasoani atu i le fanau i so’o se auala na te mafai.

O lana fanau ua faigaluega uma ma ua fai fo’i a latou aiga ae o lo’o tausi matua pea latou i le latou tama.

“O lo’o maua a e lo’u soifua le manuia ae o le fa’amamaina a o le si’osi’omaga o se galuega fa’amalosi tino i lo’u tino.

“A o ta nofonofo fo’i pe ta te fa’alogo atu ua le toe iai so ta aoga i lenei lalolagi.

“E taua a ia tatou ona tatou fa’amama ma fa’amanaia o tatou si’osi’omaga aua o le tatou atunu’u o le tasi lea o atunu’u e omai ai tagata e tafafao.

“E mo’i a e fai a tatou galuega ae mo so’o se atunu’u a, o le tumama i le si’osi’omaga o se galuega mo ona tagata uma.

“O se auala fo’i lea tatou te maua ni avanoa se tele aua le lelei ma le manuia o a tatou fanau i le lumana’i.”