‘Oli’oli ma Fiafia le Fa’au’uga o Faife’au i le Malumalu o le Ekalesia Metotisi

By Ilia L Likou 18 July 2016, 12:00AM

O lagona o le fiafia ma le fa’aeaina sa iai le Malumalu o Uesele a le Ekalesia Metotisi i Fale’ula ananafi, a’o fa’amanatu fiafia ai le fa’au’uga o faife’au fou e to’alima ma o latou faletua. 

I lea sauniga na matua fa’atumuina i sui o aiga, o uo ma sui o le ekalesia  metotisi, na saunoa ai le Peresetene o le Ekalesia Metotisi, le Susuga a Lafai Apineru, e fa’amalosi’au i ‘au’auna a Le Atua ua fa’au’uina, ina ia tumau pea lo latou fa’atuatua i Le Atua i le Lagi.

O faife’au ua fa’au’uina, sa fa’au’uina mai le Kolisi Fa’afaife’au a le Ekalesia i Piula, i le lima tausaga talu ai, a’o ananafi la, o le isi la’asaga fou mo lo latou vala’auina e tautua le galuega a le Le Atua i ‘aulotu ‘ese’ese o le a tofia iai. 

 O se tasi o faife’au sa fa’au’uina, le Susuga a Taeono Latu Amani, na fa’afiafiaina ona ua na ‘ausia lea tulaga maualuga o lona soifua tautua.

“E vi’ia lava Le Atua lo tatou Matai Sili, aua seanoa o Ia, tatou te le aulia lenei aso matagofie,” o lana fa’aaliga lea.

“Mo o matou aiga uma ma uo, fa’apea le Ekalesia Metotisi uma, fa’afetai tele mo la tou lagolago ma a tou talosaga molia.” 

E fa’apea fo’i le fa’afetai a le Susuga a Siaki Haini, ona o le Alofa o Le Atua ma le lagolago a ona aiga ma uo, ua taunu’u ai le folauga i lea vaega o le tautua mo le ekalesia.

 “O se malaga ‘umi na’ua sa feagai ma matou uma, e fa’afetaia ai lava Le Atua Soifua, ona o mealelei uma ua Ia saunia mo a’u nei ma lo’u to’alua ae maise le ‘aufa’au’u ma le ekalesia aoao,” o lana fa’aaliga lea.

“Ua filifilia matou nei e tautua ma e leai se isi mea ae o le fa’amoemoe i le Atua e ta’ita’i ma fa’atonu mai matou i le mea silisili e tatau ona fai.

O le fa’au’uga i le aso ananafi, o se vaega lea o le koneferenisi fa’aleTausaga a le ekalesia Metotisi na fa’amae’aina i le Aso Sa lava ananafi.

By Ilia L Likou 18 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>