Mai le Tusi o le “Suaga a le Vaatele”

O le Taaloga lenei i aso anamua sa faapitoa lava i Tupu ma Tamalii o le atunuu, ma-sa so’o le atunuu o seu ai tamalii i aso ua mavae. Ua tatou maua faamatalaga i le seuga a Malietoa ma Mageafaiga-aemaise ai aiaiga o lea seuga-e pei ona la malilie faatasi i ai. O le la tuuga-tala a’o le’i alo seu fai mai-“afai o le ‘seu-a-lalo,”e lē o le “to’aga o le taeao”-a’o “lupe o le laufanua,” ae afai o le a seu-a-luga, o “lupe o le vanimonimo.” O loo ta’ua foi le seuga a Tupu ma le Faa-Tamasoāli’i a le Tautai o le Namo e pei o Lefaoseu ma Ulumū. O le vai-tausaga o lenei fa’agā-tama o Iuni i tausaga ta’itasi, ma e tele tapenaga mo lenei faamoemoe. 

E masani ona faavai le tele o mea tuā’olŏ a se nu’u ma suavai o mea aano-auā toetoe lava aafia tagata uma o se nuu-i ia tapenaga aemaise ai le saunia o nofoaga mo le seuga i le vaomatua. 

E matua fau fale e nonofo ai mo se vaitaimi e faitau masina-a’o faagasolo le seuga. A uma ona teuteu faamamā le nofoaga mo le faamoemoe-ona se’e lea o Alii o le Seuga-ua nofoia faasolosolo le faa-taamilosaga o le nofoaga ua faamamā, e ta’ito’atasi ma lafi i lalo o se fale –seu poo se laau faapuloulou, o ona tafatafa ane le upega seu, ae ‘u’u i lona lima se la’au(tula) o loo tu ai se lupe ola. O le lupe lea (mailei) ua uma ona a’oa’o-ia felelei faa-taamilo ae o lona vae o loo nonoa ai le tasi pito o le manoa-ae o le isi pito-o loo nonoa i le (tula) poo le la’au o loo tu ai le lupe. 

O le manoa lea e nonoa i le vae o le lupe- e ta’u o le “lauvae.” E tofu le tagata ma lana lupe e faalele,  e le umi ae foliga mai lenei nofoaga o se “fagaga-lupe”. E felelei solo lupe e peiseai o loo fafaga, ona tosina mai ai lea o le lupe o le vaomatua. A felelei mai la lupe o le vaomatua-o le tagata lava e pito i ai-o le a sii loa lana upega ma seu le lupe. 

O le tagata e tele ana lupe e seu ma maua—o ia lea e manumalo. E tele taumafa o le a faa-meaalofa i ai e ana uo, ma faapea ona ia tufa atu i e sa tauva-a ua le manuia. Ona avane lea o isi lupe ua tunu-pa’u ae tusa isi pe faaola foi e fai ma lupe mailei. O le mau a Aopo fai mai-o le alii o Etau ua maliu-o lona faiva lea o le seu lupe. Sa a’oa’oina e lona tamā-talu ai o lea afioaga-e tamaoaiga tele i le vaomatua-ma o lea na avea ai le faiva o le seu-lupe –ma galuega fai i aso uma. 

E tamaoaiga lona vaomatua i la’au e pei o talie, asi, tavai, ‘a’auli, anume, puapua ma isi lava laau ia e ofaga i ai-ma ‘a’ai ai lupe. A fua tele mai ia laau, ona tetele foi lea o le lupe-talu ai-o le tele o nei laau e fua i fuata-o lea e pogai ai le upu faa-Samoa o le “fuaga ma le foaga.” O lona uiga, e tofu le fuata ma lupe e fofoa ai.

Fai mai e sili ona lelei lupe laiti ia e pu’e mai ofaga pe a fai ma lupe e mailei mai ai lupe o le vaomatua. E faigofie ona a’oa’o faatusatusa i lupe e maua mai seuga, E tu’u lupe nei i totonu o le faga-ae a tu’u i fafo e faalele, ona nonoa lea o le “lauvae”. 

O laau e faatutū ai lupe e ta’u o le “tula.”E a’oa’o lupe nei ia masani i le manoa lea e nonoa i lona vae, ia felelea’i i luga ma lalo, ia tu i luga o le tula ma tagi e faatosina mai ai lupe o le vaomatua. Sa avea lupe mailei ma fagafao ma sa faapelepele i ai Alii-Seu. 

Sa masani ona fafaga i talo vela poo ‘ulu pe a mama-ona faa-laiti lea fuafua i fua o laau e ‘aina e lupe. O le talo sa fafaga ai lupe nei-i aso ua mavae e tusa ai ma le talatuu a Savaii fai mai o lona igoa o le “Pula’au” O le talatuu fai mai na usu le alii o Pulusau o le Faasaleleaga i le tasi taeao e seu ae fai i lona faletua o Sina-vau-o le malama-e nofo ma mama se talo mo ana lupe. Ua te’a ese le alii ae pagā lea-e na o le tasi lava le talo vela sa totoe i le fale. 

Sa taumafa e Sina le talo ae galo ona tuu se fasi tala e mama ma lupe a lona alii. Ua fefe tele Sinai  le mea ua tupu-ma ua sola ese ai loa. 

Ina ua taunuu le sola’aga i le mea e igoa o Nofoa-sa lagona e Sina le luluti o le tiga-fanau-ona o le faletua o loo maua i le ma’itaga. Sa taoto loa Sinai  lalo o se laau i tafā-ala. Ua faatetele ona tiga, a’o le taimi lea o loo malaga ane i le ala le alii o Manilaulau. Sa valaau i ai Sina ina ia alofa na te fia maua se fesoasoani. Sa alu ane i ai Manilaulau e fesoasoani, ma ina ua ola le tama’ita’i, o le ‘mama a le lupe’ Ona ave lea ua tanu ae tupu a’e ai le talo o le “Pula’au.” 

E le tasi se lupe mailei e mana’o i ai se alii, aua o le tele o lupe mailei ua aoaoina lelei, o le manuia foi lea o le seuga ma atili mamalu ai. Afai o le a fai se Tia-Seu, e masani ona filifilia se nofoaga lelei i le vaomatua-ia latalata i se tuāi’a-lea e faifogie ai ona iloa mai ai e lupe o le vaomatua-lupe mailei pe a faalele. 

Ona faamamā lea ma teuteu lea nofoaga ia laugatasi e avea ma Tia, lea o le a fau ai faleseu e lalafi ai le ‘au-seu, Afau o se tuāi’a-e ‘oso’oso le pito i luga-o le a solofa i lalo ona avane lea e fai ai le Tia. O Tia foi e fau i vaega o le vaomatua e ofaga i ai lupe. 

O se tasi o Tia i Aopo e i luga o le Lava i se laolao i le va o laau tetele.