1. Matauina i Tala Fou ni ulutala fai mai-“Ua saisai ma molia le Faatonu o le Ofisa o Moliaga a le Malo-ma o lea la tama’itai o Mauga Precious Chang. Fai mai la o lea tulaga sa faatino e Alii Leoleo ma le Tactical Operation Squard. Fai mai la o lea gaoioiga sa taiulu ai le Alii Satini o Lemamea Tiumalu faatasi ai ma le fesoasoani a le Alii Satini o Magalo Pule…! Fai mai la o le ‘avetaavale faatamala ua mafua ai lea tulaga. Ia o mea lava faapenei-o mea lava e masani ona tutupu i le soifuaga nei-ma atonu e leai lava ma se isi e sao ai! E aliali mai la i tala fou na saisai mai lava si tamaitai loia mai lona ofisa. Ia-atonu o se mea lenei e lei mafaufauina e lea tamaitai-ae a tu’u foi i le tasi itu-o le tulafono lava o le tulafono-ma o i tatou uma lava e i lalo o le tulafono! Ia –afai lava ua tula’i mai lenei faalavelave i sia tamaitai o le atunuu-ia onosa’i o le tulafono lava o le tulafono-ma na fai faapitoa lava mo i tatou uma! O le a sou taofi? 

2. Matauina foi i Tala Fou fai mai ua molia le Pule o Leoleo poo le Komesina-o Fuiavailili Egon Keil e tusa ai ma le saisai sesē o se tagata o le atunuu i le Maketi i Fugalei i le tausaga talu ai-ma o le a tulai o ia i luma o le Faamasinoga Sili i le aso 29 o Aokuso e tali atu i ia moliaga. O lea la tulaga na faamaonia e le Ofisa Sili o Faamasinoga ma Pulega Tau Faamasinoga o Papalii John Taimalelagi…. Ia-o mea faapenei-e masani lava ona tutupu i le soifuaga nei-aemaise ai lava pe a tatou le mataala. O le a la sou taofi?

3. Matauina foi le tulaga uiga ese o le faamanatuina o le Aso o Tamā talu ai nei. O lea tulaga ese-e iloa lava i foliga vaaia o ata pu’e o lea aso-le fiafia ma le olioli o tamā ma tinā-ona o lea aso. Afai la e taua soo se tamā i totonu o soo se aiga-e le taumate la o le pogai lea o le tulaga uiga ese o le faamanatuina o lea aso. E le gata la ina fiafia tamā-ae ua vaaia ai foi ma le olioli o nai tina. O le aoga la o lea aso-o se faamanatu lea i tamā uma o Samoa-o le taua o le latou matafaioi i totonu o soo se aiga. Ma e pei lava ona saua soo i le va-ae o le upu moni lava-a “lelei se tamā-o se aiga fiafia foi lea.”Aisea? Leaga o ia na fanauina –o ia na tausia ma faaaoga ma a’oa’o ma le isi lava anoano. Afai la e tumau pea le tama i lena tulaga-e le pine ona ia selesele i le fiafia o le faamanuiaina-pe a manuia lana fanau i soo se itu tau aoaoga poo galuega-aemaise ai lava-o le mafutaga faifai pea ma latou fanau ma fanau a latou fanau…! O le a sou taofi? 

Matauina foi i Tala Fou se ulutala fai mai “o se fesoasoani i alii ina ia tuuina atu le malosi i tama’ita’i…..! Fai mai la le tala sa potopoto ni alii mai ni nuu eseese ina ia aoaoina pe faapefea ona latou fesoasoani atu-e tusa ai ma le malosi tau tamaoaiga o fafine nofo tane….! Fai mai o lea aoaoga sa tuuina atu e le Samoa Victim Support Group-ma sa faatūtū i sui o nuu. Fai mai o le vaiaso talu ai na maua ai e alii mai itumalo o Lotofaga ma Lepa le avanoa e auai i lea aoaoga e faasino i le Tulaga Tutusa o le alii ma le tamaitai. O le faamoemoe e tasi- o le fia faaleleia o latou tulaga ma faateleina lo latou iloa e uiga i le malosi tau tamaoaiga o tamaitai……! Fai mai sa faalogoina i lea faamoemoe upu lelei faale-aganuu ma le faale-agaga-aemaise ai o se tuu-a-lalo- “ ina ia faaaloalo lelei i tamā o aiga….! Ia-afai la o le ‘i’o lea o le faamoemoe-e le taumateina la le taua tele o lea fuafuaga…! O le a sou taofi?