FEAGAIGA FAAVA-O-MALO MA LE FAIGA-MALO O LE ELEELE SA.

18 August 2016, 12:00AM

E ui lava ina telegese le tuputupu a’e o le faitau aofa’i o tagata, le pa’ū o le tamaoaiga o le lalolagi ma le ganea o le polokalame o galuega lautele mo Samoa i le 1880, ae o le vaaiga aoao- sa tumau pea ona lelei e pei ona faaalia i le tuuina ifo o le Ma’a Faavae o le Malumalu Tele o le Ekalesia Katoliko i Apia i le 1884-lea sa faaaoga i ai ma’a sa la’u mai e se taavale faa-nofoa-afi mai le Mauga o Vaea. 

O le fale maoa’e fogafale-lua i le nofoaga o Tama’ita’i Sa i Savalalo- na fausia i le 1881-lea na fau ai e le Konesula o Wilfred Powell se fale fogafale-tasi manaia i se fausaga masani faa-Kolone ma le Pasefika- e nofo ai. O Matafele lea sa avea ma vaega autu o fefaatauaiga i le Taulaga, na faatama’ia e se afi ia Ianuari 1889 lea na pogai ai se galuega tele tau le toe fausia o fale. Na faatama’ia uma e lea afi le Ofisa o le Konesula o Siamani, Falepuipui, Fale Faamasino, Falesa o tagata Samoa, Central Hotel, fale o pisinisi a Rosenberg ma Grevsmuhl, le fale o Dr. Knappe ma le fale sa mau ai Nelesoni.

 E faaopoopo atu i le toe fausia o fale na faatama’ia e le Afi, isi fale na fausia ina ua mavae lea mala, o le Fale Talavai o Swann, fale o ata tusi a John Davis ma le Falemeli, Faleoloa o B.W.Gurr ma le fale falaoa i Matafele, le fale talimalo o Grevsmuhl e igoa o le Zur Stadt Hamburg e soso’o ma le Ofisa Konesula o Siamani, le pisinisi a T. Trodd i le tulaga o le Fale Faamasino tuai, le faleoloa fou o le DH & PG i Matafele e faafesaga’i ma le ofisa Konesula o Siamani, faaopoopoga fou a Fabricius i lona fale talimalo i Apia ma le Ofisa Konesula o le Iunaite Setete o Amerika i Vaiala- na faua e McArthur & Co ma Peter Paul. 

O le Ofisa fou lenei o le Konesula Amerika sa matauina o se fale uiga ese i lea taimi- ona o le tulutulu o le fale autu- e toso faa-umi i fafo i luga a’e o lona poletito e 12 futu. O ona faamalama e ui mai ai le ‘ea malu i totonu- sa fau i lalo ifo o le poletito ma o le malosi o ona fusi i faaputuga-laupapa-e le o se fausaga lea e masani ai. O le tele o fale fou e le o ni fausaga e ta’i-lua foga-fale ma sa faapea nisi- e le lelei, lava atoatoa, ma e manaia pe a faatutu i luga pou, ia e i ai faamalama tete’e ma ia lava poletito e fausia i la’au o le Kauri pine. 

Na matua sui e le ‘apa atofale fasi laupapa ma le lau sa ato ai fale ma sa faatulaga fale-e tusa ai ma le tulafono a le Eleele Sa-ina ia mafai ai ona faatulaga le auala i luga o le sami. O foliga o le Taulaga ma ono upufai-sa ui atu i se tulaga fou toe fuata’ina e matua tele. 

PULEGA SOOFAATASI-O le Fono i Perelini na tulai mai ai se pulega-malo soo-faatasi e pulea to’atolu e Siamani, Amerika ma Peretania Tele-lea sa na pulea Samoa ma le isi sefulu tausaga i se tulaga to’afilemu. O sini autu o le Maliega i Perelini (Iuni 1889) ia taumafai e faaitiitia le faalagolago o le malo i sui o Ofisa Konesula, ia faamalosi le faamasinoga, toe faamaopoopo tupe a le malo, ia toe faatu le Komiti Faatonu o le Eleele Sa, ia tausi le filemu i le va o tagata Samoa, ma ia tuuina atu ni Papalagi faufautua ma faamoemoeina i le Malo o Samoa. 

O teuteuga e lua e aupito i sili ona taua o le Maliega i Perelini-o le faama’apeina lea o tagi a tagata Papalagi i eleele ma le faaitiitia o le aoga o le tupe Amerika i Saute.

O le teuteuga mulimuli na gausia ai le pule to’atasi a le D.H.& P.G. i fefaatauaiga tau le fesuiaiga o le aoga o tupe ma ua mau-alafia ai le ulufale mai o le Faletupe o Peretania. 

O le teuteuga e aupito i sili ona lavelave ona faamanuiaga ia Samoa- na mafua mai le Komisi o Eleele lea na faamae’aina ana iloiloga i le 1894, lea na teuteu ai finauga tau eleele ma faavae ai loa se faiga e resitala ai le pule o eleele, o se faiga lea faatoa sui talu ai nei.

18 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>