Ia ola fiafia

By Ilia L. Likou 18 September 2017, 12:00AM

O le maua ai o le fa’atalatalanoaga a le Fofoga o Samoa ma le ali’i o Apisaloma Siliato o Gagaifo Lefaga na ia fa’ailoa ai le agaga fa’afetai ona o le mafai ai lea ona maua ai pea le malosi e fa’aauau ai feau, tiute ma galuega i lea aso i lea aso.

 “Ia o le taimi lenei, o lo’o o’o nofo i le fale ia ma  fa’aaoga lelei le lauele’ele e ala lea i ma’umaga ona e pei ona silafia ai e fai lava sina telē o la matou fanua ia o lo’o tua lava i ai le tele o taimi.

“O nisi o si o matou aiga, e o e faigaluega ae pei o la’u ia lea masani i aso uma o le taumafai lava lea e  fesoasoani i so’o se tulaga e mafai ona o’o i ai aua  o manuia ia mo le to’atele.

“O le ala fo’i lea e le’o suea ai lava se galuega e pei e manaia lava le nofo ai le fale aua o mea lelei uma lava mea uma aua le aga’i i luma o le soifuaga o lo’o ola ma soifua ai nei.

Na ia fa’ailoa o le olaga lenei e le taua le faitio.

“E le’o lea le tulaga e tatau ona i ai, ae o le ola e iloa ona ola ma o e galulue, o le olaga ua tatou iloa uma lava le faigata.

“Afai na o le nofonofo ma faitio le mea e fai i aso uma, e leiloa la po o fea o le a alu i ai le olaga o lo’o ua i ai nei.

O le taimi lenei o lo’o i ai le isi ona ma’umaga i Aleisa.

“E pei lava ona ta’ua muamua o le ola galue lava le mea e pito sili ona taua, a leai ni galuega ia e leiloa po o le a le mea o le a fai.

“Ae o lo’u iloa i ai, ia taumafai pea ina ia lelei le aga’i ai luma le lumanai aua o vaega nei mo le lelei lautele o le atunu’u aemaise lava i totonu o nai o tatou aiga.

O le tau o le soifuaga o lo’o i ai nei? – ia tatou o ia fa’apea!

“E leai se isi e mafai ona toe tu ma tete’e atu i suiga ua i ai nei le tau o le soifuaga e pau lava le tulaga ia nofo uta ai ma fa’atino o so’o se tulaga e mafai ona fesoasoani i ai le tulaga e pei ona ua i ai.

By Ilia L. Likou 18 September 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>