Sui le igoa – Palu

19 February 2016, 12:00AM

Tusia - Sarafina Sanerivi 

Faaliliu e Seagaitumaua Tupuola

 

Ua tapā e le taita’i o le Tautua Samoa Party, Palusalue Faapo II, le Palemia o Tuilaepa Sailele Malielegaoi –ina ia sui le igoa o lana pati.

“E ese ai ma le faaigoaina o le Pati e Puipuia Aia Tatau a Tagata (H.R.P.P.), ua tatau ona latou suia lea igoa i le Human Rights Corrupt Party (H.R.C.P.), o le faaaliga lea a Palusalue. Na ta’ua e Palusalue lea itu I le faagasologa o le fono faa-vaiaso a lana Pati ma sui o nusipepa ananafi.

Ina ua talosagaina ina ia faamanino mai  le itu na ia ta’ua o “faiga pi’opi’o” e tusa ai ma lona ta’ua o le pulega a le Palemia o Tuilaepa, ae fai mai Palusalue o lana upu e faasino i le “faaaoga sese ma le faaaoga e le talafeagai ai o puna’oa a le malo mo le manuia o sui auai o lana lava vaega.”

“E talitonu le Tautua e leai se isi upu e sili atu ona lelei e faamatala ai lea tulaga i lo “faiga pi’opi’o,” o le faaaliga lea a Palusalue. Na ta’ua e le taitai o le Itu Agai le mea moni e faapea o Minisita Lagolago o loo latou faaaogaina lava taavale a le malo, ae o lea ua leva ona faata’ape le Palemene. “O lea lava latou te faaaogaina sese puna’oa  a le malo ma aseta a le malo,” o le faaaliga lea a Palusalue.

 “O loo faaaoga pea lava e Minisita Lagolago taavale a le malo ma o loo maua pea o latou totogi. O loo latou faaaogaina ia taavale i le taimi nei e avea ma ala tau femalagaina mo a latou tagata palota ma faatosina tau faiga-palota. O nei tagata e matua leai lava ni mafaufau.” Fai mai Palusalue o ia ituaiga o amio e le tatau ona faatagaina talu ai e afaina ai tagata e leai se sala.

“O loo latou faia nei mea uma ae o lea e tilotilo atu tagata uma ia i latou,” o lana faaaliga lea.O se mea lea ua fai ma faatiga. Ou te ofo e vaai atu i lenei ituaiga o amioga a Minisita Lagolago, latou te iloa lelei lava ua le tatau ona latou toe faaaogaina puna’oa a le malo ae o lea lava latou te faaaogaina ia mea.  “Ae peitai, o le itu e sili ona faanoanoa ai e faapea o lea e tilotilo atu tagata ia latou amioga faapea foi ma le Atua. O soo se tasi lava e mata’u i le Alii e le tatau ona amio faapea, latou te filifili i taimi uma e fai le mea sa’o. Ae o nei faiga ua faamaonia ai e faapea o nei tagata e le matata’u i le Atua ma e le fefefe ia te Ia.”

Fai mai Palusalue o ia faiga matuia tau le faaaoga sese o le paoa ma punaoa lautele o se tasi lea o mafuaga ua tonu ai ia i latou ina ia molia le H.R.P.P. i le Faamasinoga. O lona mana’o ia faamamā le ‘ea ma o le latou faaiuga ina ia molia le malo e le o faavaeina i luga o soo se fuafuaga leaga. “Pau lava le mea matou te manaomia o le amitonu mo tagata uma ma matou te manana’o e fai le mea sa’o,” o le faaaliga lea a Palusalue.

“O le molia o i latou i le Faamasinoga o lona uiga e le gata ina tatou palā, palā, palā i nei mea ae leai se mea o faia i ai. O le a matou tuuina atu i le Faamasinoga na te faia le tonu mo le mea e sili ona lelei ma sa’o atoatoa mo i tatou.”E talitonu Palusalue ua leva ona umia e le H.R.P.P. le paoa. “Ua umi le taimi talu ona latou umia le paoa ma ua aliali mai e peiseai ua pulea i tatou e se tagata e pule to’atasi,” o lana faaaliga lea.  “

“ O se tulaga faanoanoa lea talu ai le anoano o a latou sui faatutu-talu ai-latou te manana’o uma lava e tofo i le suamalie o faamanuiaga e maua mai le H.R.P.P.” E matua auai foi le taitai muamua ma o se sui faatu mo le faiga-palota, o Vaai Papu. “Ua o’o i le taimi e sui ai le igoa o le latou pati faa-polokiki,” o lana faaaliga lea.. I le avea ma Sui muamua o le Pati a le H.R.P.P., e talitonu Vaai e matua le fetaui lava ona faaigoa lea pati o le Pati e Puipuia Aia Tatau a Tagata. 

“E mafua lenei tulaga ona e ese ai mai le puipuia o aia tagata a tagata, e le gata ina latou faaaoga sese aia tatau a tagata, ae o loo latou soli foi aia tatau a tagata,” o lana faaaliga lea. “O le pogai lena e le o toe tatau ai ona toe faaigoa i latou o le Pati e Puipuia Aia Tatau a Tagata, ae tatau ona faaigoa, o le Human Rights Corrupt Party.” Sa le mafai ona maua mai se tali mai le malo ananafi.

19 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>