E manuia pulega matai
O le talitonuga o Mareta Tauna i le Fofoga o Samoa o lo’o sologa lelei lava mea uma i totonu o si o latou afio’aga i Lepa.
“Ia e pei e pau lava le tulaga o lo’o ua i ai nei, ia o le taumafai lava lea e sailia sina tanevai mo si o matou aiga” o lana saunoaga mai lea i le Fofoga o Samoa.
“E pei ona silafia uma, ia e pei o le vai o le ola lea o le tagata, ae a leai la se vai ia e leiloa pe fa’apefea ona fa’atino le olaga nei.
E ui la i nei fa’afitauli ae o lo’o sologa lelei lava mea uma i totonu o le afio’aga.
“Ia o a’e e pei e manaia lava ma saogalemu le olaga i totonu o si o matou nu’u, aua ua masani lava ai aua e pei o nei lava na feola ane ai.
“I lo’u la ia iloa i ai, o lea le tulaga manaia o lo’o ua tatou va’ava’ai nei i ai, ina ia mafai ai lea ona faia o so’o se tulaga mo le lelei alu i luma o le olaga o lo’o ua tatou i ai nei.
“E pei la o totonu lava o nu’u, ia e malu puipuia ai so’o se vaega ma e leai ma se tasi e taumafai e fa’aali sona malosi aua e malu puipuia uma vaega uma lava.
“I a te a’u, ia o lea lava le tulaga o lo’o manatunatu i ai, ina ia lelei mea uma lava i le alofa ma le agalelei o le Atua.
“Aua e pei o le tele lava o afio’aga e tu ese ma le taulaga e leai lava ni a latou vaega e mafai ona fa’atinoina ona e leai ni pulega a ali’i ma faipule.
“Ae pei e malu mea uma mai nu’u ma afio’aga ta’itasi ona o le alofa o le Atua.