E taua le vai ma e mana’omia tele
O le maua ai o le fa’atalatalanoaga le Fofoga o Samoa ma Vaosea Sonalote, 34 tausaga le matua le soifua mai le afioaga o Vaitele ma Samalaeulu Savai’I o lo’o ia fia mana’omia se suavai.
Na maua le fa’atalatalanoaga fa’atoa manava mai le tamā mai lana galuega.
Sa ia fa’amatala I le Fofoga o Samoa o lo’o sologa lelei lava mea uma I si ona aiga e pei o le vai lava o lo’o fia mana’omia.
“O le popolega lava ia te a’u o si a’u fanau e le’o iai se suavai I si o matou aiga.
“O a’u ou te faigaluega i le ofisa o Fa’atoga I nei Vaitele, o le totoina o so’o se tuaiga fuala’auaina lava e pei ona lua tagatagaa’I atu ai.
“Ia o a’u foi le alagatupe o lo’o fa’amoemoe iai e ese mai le tinā o lo’u to’alua, ma o lo’o totogi foi e totogi fa’atasi lava i totogi le malo ta’I lua vaiaso ma totogi.
“Ou te ta’utino atu foi o le leai o se suavai o le leai o se seleni.
“O le suavai mai lava I tuaoi o lo’o maua ai sina suavai mo mea’ai ma nisi o vaega e mana’omia ai le suavai.
“E pei na le pau na o sina fa’afitauli o lo’o iai nei. Ae o mea uma o lo’o lelei lava.
“Ou te toaga lava ou te faigaluega aua le tausiga o si a’u fanau. Aua e leai lava se tamā lalo le la lenei e le faia mea uma mo lona aiga.
“O a’u foi ia e laki lava aua ou te nofo latalata mai la’u galuega e leai la se tulaga e popole ai I se pasese po se mea’ai. E la’ala’a mai lava le galuega ma toe la’ala’a foi le fale.
“Pei na fai atu le taimi ua sola, e leai lava ni fa’afitauli tele na’o le vai lava.
“O le popolega masani lava ia ona o le fanau, aua o lenei lava e taumafai atu lava le tulaga e mafai ai ona maua se suavai lata mai.
Sa taua e Vaosea o lana ulumatua e 6 tausaga le matua le soifua ma e le’o taitai ona malamalama le tigaina ma le polaga o lo’o ia nei.
“E mana’omia lava le vai, ma e ui lava na ou iloa e umi lava se taimi maua se suavai ae lelei lava ona fa’aola atu o lo’o o’u moe miti ai nei.
Mo se tasi e fia fesoasoani ia Vaosea ma si ona aiga, e maua le feso’otaiga I le 7517909.