O lo’o i ai le mativa Samoa

By Vatapuia Maiava ma Ilia L Likou 19 September 2016, 12:00AM

O lea le finagalo o le tinā i a Saumamao Hunkin o Vaitoloa i le fa’atalatalano’aga ma le Fofoga o Samoa.

O le pine fa’amau o lona finagalo fa’aalia ‘pe a fua atu ai i le to’atele o nai tamaiti feoa’i solo i le taulaga ae le o i le aoga…o le mea moni, ua le lava le fa’asoa a matua.

“Ia o le taimi lenei e fa’alogo o lo’o ave le fa’aseā i matua, ma faapea mai e leaga matua, ae o le a ‘ea le mea o le ā mafai pe ā fai ua leai ni galuega a tagata ma ua le lava le fa’asoa i aso uma.

“O la’u va’ai i ai i le taimi lenei, o lo’o i ai le mativa i totonu o Samoa. Na ia fa’ailoa, e ui i le tulaga mativa e pei ona ua maitauina i le taimi lenei ae e tatau lava ona i ai se auala e mafai ai e so’o se tagata ona ola fiafia.

“O meataulima e faigofie lona fa’atinoina e pei ona i ai solovae, ie so’oso’o, o ‘ie’ie e te alu ao mai ma tago e galueaina, o vaega ia e le taumate o le ā fesoasoani tele mo le tele o vaega o le soifuaga nei.

“O le tiute fa’alematua lenā pe ā fai e moni le alofa i le atali’i ma le afafine, aua e feola ane e mafai e i latou ona atia’e o latou aiga.

“Ia feola ane o lo’o mafai ona tutusa avanoa ma fa’amanuiaga e mafai ona o latou maua.

“ Ioe, ua si’i i luga le tau o le soifuaga, ma ua tele lava ina le gafatia le tele o vaega  o lo’o ua i ai i le taimi lenei.

“O le mafua’aga lea e tatau ai lava ona  o tatou toe fo’i i tua ina ia mafai ona faia meataulima nei ua leva ona masani ai.

“ E pei ona ta’ua muamua ai…va’ai fasi ‘ie’ie e fai ai taga solo vae, su’isu’i ai na’i i’e soso’o, o vaega o lo’o mafai ona o tatou iloa e faigofie ona maua ma e faigofie lona fa’atinoina.

 “Ia e fa’atau atu ona maua ai lea o tupe, ma e amatamata atu lava i’ina ia ma e mafai ona o’o atu i se isi tulaga pe ā tu’u i ai le loto.

Na ia ta’ua o so’o se galuega lava, e ao lava i matua ona ave le fa’amuamua ma ta’imua i fa’ata’ita’iga lelei aua le lumana’i manuia o fanau i so’o se itu.

“O lea le naunauta’iga ua mafua ai fo’i ona ou faia galuega taulima lenei ma fa’atau atu ma a’oa’o atu ai la’u fanau ma so’o se tasi o lo’o mana’omia se fesoasoani mo le atina’eina o aiga.

By Vatapuia Maiava ma Ilia L Likou 19 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>