Mana’omia se suāvai

Tusia Ulimasao Fata ,

40 Hits

Danny Fou o Leulumoega

Danny Fou o Leulumoega

O se olaga faigata tele e ono ai le aiga pe afai ae leai se suavai maua.

O lea le finagalo o Danny Fou o Leulumoega i le fa’atalatalanoaga ma le Fofoga o Samoa i le aso ananafi.

 “Ua o tatou iloa ma silafia uma le tele o le ‘a’afiaga o nai  o tatou aiga pe afai ae leai se suavai maua ma o se itu e ao lava ona o tatou silasila i  ai aua le aga’i atu ai le lumana’i,” Danny i le Fofoga o Samoa.

“E mo le silafia ai ua fai si leva o feagai nai o matou aiga i lenei vaega o le atunu’u ma lea tulaga ma o se itu faigata tele lea i lo’u iloa i ai.

“Ona e mafai ona leai se eletise ae a leai se suavai ona faigata ai lea o mea uma.

“E mana’omia le suavai i le faiga meaai, faapea foi le suavai mo le inu ia ae maise lava nai fanau.

O si o latou aiga o lo’o fa’alagolago lava i le timu.

“Ai lava o le alofa o le Atua lea e timu ai iinei i le tele o aso ae matou te le faamoemoe tele la i ai aua e le talanoa a sesi ma le finagalo o le Atua i lea aso i lea aso.

“Ia o le galuega tele le tau aumai o le suavai mo le fa’aaogaina i aso uma.

“O le uiga o la’u tala e pei o aso timu e fiafia tele ai si o matou pitonuu aua e pei e  maua ai le suavai lelei mo le tele o nai o matou aiga.

“O le itu mautinoa le maua ai o mea’ai aua o lo’o i ai le ma’umaga ae pei e faigatalavai aso uma le olaga ona o le leai o se suavai.

“O si aiga la lea e tala atu o matou, lea e agalelei mai i le latou suavai ma o latou foi lea sa maua mai ai a matou tane vai.”

“E pei o lea lava le tulaga o lo’o ua fai nei ma fa’afitauli ma e lagona lava le fiafia pe afai ae maua se aso timu.

© Samoa Observer 2016

Developed by Samoa Observer in Apia