Fa’amanatu le atoaga o le 22 tausaga o le Sinalei!
O le Sa na se’i mavae atu nei sa fa’amanatuina ai le atoaga o le 22 tausaga o le faletalimalo a le Sinalei.
O lenei fa’amanatuga sa faia lea i le matāfaga lava o le faletalimalo, ma e ova ma le 150 tagata sa mafai ona auai atu i lea fa’amoemoe.
O lenei patī tele sa vala’aulia aloa’ia ai ma le fa’ili lauiloa o le Ardijah ina ia latou fa’afiafia i lea fa’amoemoe tele.
O se fa’amoemoe sa fa’aalia ai le agaga fiafia o le aiga galulue malosi o Annandale, Tuatagaloa Joe, Sose ma Nelson Annandale o e na galulue maosi i le atina’eina o lenei pisinisi mai tausaga e tele.
Sa ta’ua e Nelson Annandale i le Samo Observer o lenei fiafia i luga o le matafaga o se auala sili lea ona talafeagai e fa’amanatu ai le aso fanau o le faletalimalo ona o Samoa ua lauiloa mo ona matafaga.
“I le maitau atu e le tele ni mea e tutupu i luga o le matafaga ae o lea e i ai nei matafaga mananaia iinei.
“Sa tai tutusa lava le famanatuina o le aso fanau o le faletalimalo i le tausaga ua mavae atu nei, ae ona o le tapenga i le tausaga na te’a nei e le’i lava le taimi e tapena ai.
“O lenei la tausaga ua matou filifili ai ina ia lelei ma telē se fiafia e fai o le ala lea ua matou vala’auliaina ai Ardijah ina ia omai e fa’afiafia i lenei tausaga.”
O le fa’amanatuina o le aso fanau na amata mai i le Aso Faraile na te’a nei ina ua fa’afiafia fa’apitoa ai Ardijah i le faletalimalo.
O lenei fa’ili e omai mai Aukilani, Ni’u Sila ma o lo’o faia lava e nisi o tama fanau mai le atu polenisia.
Sa ta’ua e Annadale, o le sa mafai ona toe fo’i mai ina ia fesoasoani i lona tinā o Sose Annandale i le atina’eina o le pisinisi sa ia fa’ailoa mai le telē o le lumana’i o le faletalimalo.
“O le fa’amoemoe lea ua i ai o le a toe fa’aleleia le faletalimalo ma ia toe fa’agasolo lelei le auaunaga ina ia ogatasi ma le tulaga o lo’o matou taumafai atu i ai.
“O le fa’amoemoe lea e i ai ina ia matou ausia le numera tasi mai le fa fetu lea e tulaga ai ina ia avea ma faletalimalo silisili ona lelei i tulaga uma lava (Five Star).
“O lea fa’amoemoe e mana’omia lava le pulupulu lima fa’atasi, ae mafai lava ona fai.
“E o’o fo’i i le itu tau fa’afiafiaga o lea e i ai le fa’amoemoe ina tele ni itu e fa’alauiloa ai lenei faletalimalo e le gata i Samoa nei a’o tagata tafafao mai fafo.
“O le aso Faraile la na se’i mavae atu nei sa faia ai se sa’iliga tupe.
“Sa fa’atautaia lea sa’iliga tupe i le nofoaga o lo’o i ai le togala’au a le faletalimalo.
“O le setiina o lea fa’amoemoe sa fai i luga o se tala mai tusi faitau a tamaiti “Alice in Wonderland” ae i le itu fa’ale tagatanu’u o Samoa ina ia fa’alauiloa atili ai le ituaiga faletalimalo ma le eseese o matou mai isi o matou uso.”
Sa ia ta’ua fo’i o le fa’amoemoe ina latou fa’atuina se matati’a e le’i faia muamua i Samoa nei.
“O fuafuaga fa’ata’atitia na a le faletalimalo aua le alualu i luma o lana auauanaga.
“O le matou itulau i luga o auala fa’atekonolosi sa mataliaina i le tausaga e 1995.”
Sa ta’ua e Sose Annadale lona fa’agae’etia ina ua mafai e le faletalimalo ma lana auauanaga ona aulia mai nei tausaga e tele.
Sa fa’ailoa mai fo’i e Allison Churn i le Samoa Observer o se agaga fa’afetai ua ia mafai ona auai mai i lea fa’amoemoe.
“O le mafutaga fa’aleaiga lenei fa’amoemoe ma ua fiafia lava le loto ua mafai ona auai mai, e o’o i la’u fanau e ese le fiafia i le matafaga a iinei i Sinalei.
O se loia mai Hawai’i o Noel Vitale sa ia ta’ua fa’atoa logoina iai le po a’o loma ai lenei fiafia.
“O le tasi nei o faletalimalo pitoisili ona lelei i a Samoa atoa, ma o le agaga fa’afetai ona ua mafai ona fa’atasi mai i lenei fiafia tele.”