Toe manatu tasi - Amioga-tia’a faigata ona gagau

By Fa’aliliu e Maiava 20 May 2016, 12:00AM

Toe mafaufau tasi lava… O sau masani le ‘ave o masima i au mea’ai? Atonu fo’i ua masani ona fa’apea lou mafaufau, e le o ‘Oe o se tagata poto ma e le-mafai ona manuia lou olaga. Manatua, o au amioga masani, e i’u ina pulea ma fa’atonutonua lou olaga.

O mea lava tatou te faia so’o i aso ta’itasi, e avea ma mea tumau o o tatou olaga! Pei a o ‘upu masani: “O mafaufauga lava e toto i lou loto, o mea fo’i na e te selesele. Toto au fa’atinoga ona e selesele lea o au amioga ma masaniga.

Toto au masaniga, ona selesele lea i lou olaga.” E le ‘umi, ae avea a tatou amioga ia o se vaega ua pa’u-a’i o tatou tagata, ma i’u ina ‘ela ai la tatou va’ai, pe a fai o se mea sese.

Ona i’u ai lava lea ina tatou fa’aauau ai pea o fa’atinoga-sese, pei o le tala-pepelo, o le taufa’avalea ma le gaoi, o le faitatala, soso’o ai ma le ‘ona-‘onā fa’alausoso’o, o le paie ma isi mau amioga ua avea ma masani-leaga.

A’o le tala lelei la, e mafai lava ona e taofia au masaniga leaga ia ma suia ai lou olaga! Silasila fo’i, pei a ona e a’oa’o au masani leaga, e fa’apena fo’i ona a’oa’o ma iloa ni mea fou – pe a mana’o moni ai lava ae maise fo’i pe a maua le fesoasoani ma le malosi e te mo’omia.  

Na e silafia taumafaiga o le fia o’o i le masina, e sili atu le malosi (paoa) na mo’omia e una’i ai i luga le roketi ma ‘ave-‘ese atu mai le kalave o le ‘ele’ele, nai lo le malosi na mo’omia e malaga ai i le masina ma toe fo’i mai i le lalolagi – lea e ‘afa-miliona maila le mamao!

Ioe, o le tele lena ma le malosi tele o le kalave o le ‘ele’ele. O le mea mautinoa, e fa’apena tonu lava le malolosi o a tatou amioga sese o lo’o tosoa tatou i lalo pei o le kalave o le ‘ele’ele. O le taumafai la e taofia pe suia a tatou amioga ma masaniga-sese, e le o se mea faigofie.  

Na o Iesu Keriso lava e iai le malosi lea e te mo’omia, e una’ia ‘oe i luga ma amata alu-‘ese ai mai au masaniga sese. Ona fa’ato’a e sa’oloto lea e a’oa’o ma fa’amasani i amioga fou, amioga ma masaniga lelei e pei o le fa’amaoni i taimi uma, tautala ma le ava i isi tagata, fa’atasi so’o ma fiafia ma lou aiga, galue malosi ma fa’amaoni i au galuega, faitau le Tusi Pa’ia i aso uma ma alu i le lotu e a’oa’o ai le moni ma le fa’amaoni mai le Tusi Pa’ia, e uiga ia Iesu, le Tama ma le Alo.

O nei masaniga lelei uma fa’apea ma isi mea lelei, o le a e ola fiafia ai ma i’u manuia fo’i lou olaga. 

O lau susuga lava e faia le tonu. Manatua, a le suia nei au masaniga sese, o le a faigata lava ona suia lou olaga. E o’o ane i le taimi e tu’ua ai le ola nei, o le a e ola ai lava fa’apena e pei ona iai nei. Tatalo nei ia Iesu e fa’amagalo ‘Oe ona o au masaniga tuai, ou masaniga sese sa e ola ai.

Tatalo ia Na avatu ia ‘Oe le malosi ma le paoa e amata ai i Ona ala sa’o e te ola fiafia ai ma manuia. Leai se mea e toe popole ai. Toe mafaufau tasi lava…

By Fa’aliliu e Maiava 20 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>