Talosagaina lava le tulaga tau suavai

By Aruna Lolani 21 May 2017, 12:00AM

Na fa’aalia e se tama i le Fofoga Samoa,  Pio Fesola’i, 40 le matua ole soifua mai le nu’u o Faleas’u Sapulu, le faigata o le leai o se suavai maua mo ia ma lona aiga.  

O le aiga o Pio e fa’amoemoe i latou mo le suavai mai le aiga i le a’ai.  

“Ua fai lava sina umi o matou nonofo i lenei itu ma o se fa’afitauli lava lea sa matou feagai ai mai la aso,” o lona manatu fa’aalia lea ile Fofoga Samoa ile aso ananafi. 

“O le taimi nei ia o lo’o mana’omia pea e matou se tane vai aua e pei ole aiga i le nu’u i tai le tele na aumai ai a matou vai. Ia vagana lava pe’a timu ia fa’ato’a maua fo’i lea o vai a matou a ia.  

“Ua uma ona matou lipotia lenei mata’upu ile Matagaluega ole Vai, ma latou faimai e matou te fa’atalitali aua e tele lava le galuega e fai i mea fa’apea. 

“Ia o lea la ua o’o mai le taimi nei e leai lava se mea o faia. 

“Ua talosaga fa’afia lava ae e tumau lava le tali “Onosai o lo’o fa’asolo atu”

“O lea la ou te aioi atu ai ma le loto maualalo, po’o ai lava se tasi e mafai ona fesoasoani mai lenei mataupu.” 

O lo’o mana’omia lava e lenei tama se suavai.  

“Ou te tautino atu, e le’o se mea faigofie le aumai ina o vai ma isi nofoaga i aso uma. 

“Ua ova ma le sefulu tausaga o fai lenei vaega peitai e leai lava se suiga o iai. 

“Ou te iloa lelei foi e leai lava se galuega alofa le malo o faia, e leai lava se uiga. 

“Amuia e o lo’o maua le vai ae leiloa mai le mea nei. 

“Ae o la’u galuega masani lea i aso uma o le la’u ina o le vai, aua e le mafai ona tu’u la’u fanau iti e o e aumai a matou vai.  

 “Ia o lea e te va’ava’ai mai, ia o paelo lava ma talone ia e fa’aaoga e sefe ai a matou vai. 

E mana’omia lava se tane vai po’o se alaga paipa fo’i mo lo matou lava aiga ae le gata foi lea o si o matou pito nu’u i nei ina ia aua ne’i o matou toe fa’amoemoe fua i isi tagata.

 E mana’omia le suavai mo tamaiti aoga aemaise le faiga o mea’ai.   

“O le tele o taimi e le lava fo’i le matou seleni.” 

“O le maumaga lava o lo’o fa’amoemoe iai si o matou aiga nei. 

 “Ia ma o lo’o matou taumfai pea atina’e atu le matou fale lenei,” o lona manatu fa’aalia lea. 

 “O le fale lea a le matou aiga ma ou te mana’o lava, e lava lenei fale e avea ma meatotino a la’u lava ia fanau. 

 “O la’u a ia talitonuga, matou te mafai tele ona matou taumafai i mea ua matou maua i le taimi nei ae o le vai lava o lo’o mana’omia ai se fesoasoani tele.  

 “O lo’o lelei mea uma ae matou te mana’omia lava se fesoasoani ile vai. 

By Aruna Lolani 21 May 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>