Toe mafaufau ae le’i lafoa’ia lau lapisi

By Vatapuia Maiava 20 September 2016, 12:00AM

O le fa’alapisi i nofoaga faitele aemaise o totonu o nu’u ma afioaga o se gaioiga lē talafeagai tele pe a fua atu ai i le taumafai ai o nisi o le mamalu o le atunu’u ma afio’aga ta’itasi e galulue  ina ia fo’ia lea fa’afitauli.

O lea le finagalo o se tasi o taule’ale’a o le afio’aga o Faleasi’u, Saua Le’aupepetele i le aso ananafi i le Fofoga o Samoa.

O lagona le fiafia na ia fa’ailoa ona  o lona talitonuga, afai ae le galulue fa’atasi e taumafai e fai se suiga i nei ituaiga gaioiga, o le ā avea Samoa ma se tasi o nofoaga e alofia e le to’atele o turisi mai fafo ona o le lē saogalemu o lona si’osi’omaga.

Na ta’ua e Saua, e le’o ni turisi o lo’o fa’alapisi ma so’ona lafoa’i lapisi i tafāala ae ō o tatou lava tagata.

“O le fa’afitauli muamua lava o le lē fa’aaogaina lelei o le mafaufau i le tele o taimi o le to’atele o’i latou o lo’o faia lea tulaga.” Saua i le Fofoga o Samoa.

 “O le tele o tagata o lo’o femalaga’ai i luga o le auala e pei na o  le lia’i mai lava o lapisi i fafo ma pei e foliga mai e le mamafa i a te’i latou a latou gaioiga o lo’o faia.

 “O le tele o taimi o lo’o matou taumafai ai e fa’amāmā le tele o vaega o lo matou nu’u nei ae pei e foliga o lo’o fa’atupula’ia i latou o lo’o faia pea lea amio lē talafeagai i le tele o le mamalu o le atunu’u.

“Ua alualu fo’i ua le mālie i le tele o taimi…ua matua’i leai lava se galulue fa’atasi.

Na ia fa’ailoa ua uma galuega o lo’o taumafai ai aua lava le tu’u fa’aitiitia o vaega nei, ae ua le mafai lava le to’atele o tagata e le’o amana’ia  a latou taumafaiga.

 “E pei ona outou taga’i atu i le pito lea i tai, ia na’o le tau’ai mai lava i fafo o ipu papa’e nei.

 “E pei e manaia fo’i ae i ai ni nai fa’ailoilo e ta’u atu ai tagata se fe’au ina ia aua le fa’alapisi ae ia fa’aaoga lelei le mafaufau na fo’ai mai e le Ali’i.

 “O le lapisi e tatau ona alu i totonu o kalone lapisi ae le o le so’ona lafoa’i solo ma le mataga  o tafāala, o le mafaufau lena e tatau e so’o se tagata soifua ua uma ona ave ai e le Atua le mafaufau ina e fa’aaoga lelei…ua amata ona sau le lelava i nei ituaiga faiga fa’apenei.

 “O lo’u iloa lava i ai, a galulue fa’atasi , e le taumate le sologa lelei o mea uma, aua o le mea moni lava, e le alu alu se turisi sau fa’agasu solo ma fa’alapisi, o tatou lava lea e mafua ai ona lapisia solo o tatou laufanua.

 “O le mea moni e leai se malosi o se isi e tamo’e saosaoa atu i tua o se ta’avale e tuli pe afai o lo’o iloa o lenā ta’avale na lelea mai ai se lapisi…e pau le tulaga lelei e tatau ona fai o ni Polokalame fa’alauiloa mo tatou tagata.

 “Ou te ofo a’u ia, aua o nei mea na o tatou iloa mai lava mai lo tatou  laiti…a uma ona ‘ai lau mea’ai ona e alu lea e tu’u i totonu o le lapisi ae le’o o le pule lava o oe i le mea e fa’ata’atia ai.

By Vatapuia Maiava 20 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>