Fa’amuamua fanau
E le’i faigofie le olaga o le tamā i a Ete Toala i le tausiga o lona aiga aemaise o lana fanau i aso ua mavae.
Na maua le fa’atalatalanoaga a le Fofoga o Samoa ma Ete na ia fa’ailoa ai e fai mea uma i le lototele ma le alofa.
O Ete e to’aono le fanau ma ua fai fo’i fanau o lana fanau.
“Ia e fai la’u tala i la aso, e le’i faigofie fo’i le taimi na fai aiga ai, aua e le fa’apea e te alu atu ua ta’atitia mai uma mea uma i ou luma e tapena ai oe mo le atina’eina o lou aiga.
“E tatau lava ona matua tapena i mea uma , aua e le faigofie le olaga faito’alua, o le olaga galue sa fa’apea ona ola mai ai ia o lea lava le tulaga na taumafai mai.
“O le a le la ma le timu ia sa taumafai lava aua lava le fanau ia manuia lo latou ola, o le ola lava lea e tatau ona va’ava’i ai aua le lelei alu i luma o le soifuaga o lo’o ua tatou ola ma fiafia i ai.
Na ia ta’ua e tatau lava i matua ona ave le fa’amuamua i fanau.
“Ia e pei o lea lava le agaga ua i ai le taimi lenei, aua a manuia fanau ia e manuia fo’i aiga, o le uiga o la’u tala o le taimi tatou te fa’atamala ai o lea le tulaga o le a o’o i ai.
O lona finagalo e amata maim ea uma i totonu o aiga.
“O le uiga o la’u tala a lelei lava le koleniga o fanau mai aiga ia e matutua ane fo’i e le toe mafai ona te’a ese mai.
“O lea e ao lava ona ave ai pea le upu fa’amalosi mo latou ola tuputupu a’e , o lea fo’i le tulaga na ave i la’u fanau, afai lava e mana’o le tamaititi e manuia.
“Ia fai le mea lea e fai atu e fai, e ao ona to’’a’aga i aoga, ma ia aua ne’i fa’alagolago lo latou malosi ae to’a’aga e tatalo e manuia ai.