Manatu o le Fa’atonu - O se Faavalevalea poo se faiga maoa’e?

191 Hits

Tusia - Mata’afa Keni Lesa

Faaliliu e Seagaitumua Tupuola


Ia-o lena Samoa ua outou silasila i ai. O le mea lilo a le Palemia o Tuilaepa Sa’ilele Malielegaoi o lea ua aumai i fafo ma le ato ma o lea ua malamalama mea uma.

E faasino la matou faaupuga i le taligā o le faalauiloa mai o lana Sui Palemia ma le 11 ua filifili mo lana Kapeneta fou.

O le mea lea-tuu maia i matou e faaaoga lenei avanoa e molimoli atu ai le faamalo i le Palemia o Tuilaepa e tusa ai ma lana filifiliga o Minisita o le Kapeneta mo le isi lima tausaga.  

O le mea moni- e eseese uma lava a tatou faauigaina ma uiga faaalia-ae pei lava ona ataata mai, o le tulaga lava lea ua i ai nei.

E faapito lava lo matou mana’o-ia momoli atu le faamalo ma le faafetai i le Sui Palemia tama’ita’i muamua, o Fiame Naomi Mataafa-e tusa ai ma lona tofiga. O se la’a maoa’e lenei i luma e tusa ai ma le unaiga mo le tulaga tutusa o tagata i totonu o aupa o le paoa i totonu o lenei atunuu. O se taimi lenei e tatau ia i tatou uma lava ona sami ma faamanatu. 

Tama’ita’i e ma alii, e le faapea ua na o se mea moni le faapea o Fiame o se tamaita’i lea ua na faia lenei tofiga e avea ma ma’a faamanatu. O lea Tama’ita’i o se ta’ita’i e matua faaaloalogia faatasi ai ma agavaa faamaonia ma itu lelei –ia ua mafua ai ona ia maua lea tulaga.

O lea tulaga o se mea e matua uiga ese ma faatupu malosi e tusa ai ma lea tulaga. O le isi itu, o nei tulaga uma le mautinoa sa si’omia ai le tulaga o le Sui Palemia i luma mai o le Aso Faraile, ua matou matua fiafia lava ona ua mafai ona faatumauina le mafaufau tonu.  E ese ai mai ia Fiame ma le Sui Palemia, matou te talitonu ua fai e Tuilaepa nisi o filifiliga poto e tusa ai ma le tele o galuega. Silasila la mo se faata’ita’iga i le tofiga o Sili Epa Tuioti i le tulaga o le Minisita o Tupe.

Ua manino mai o ia lava le filifiliga moni ma matou te mautinoa lelei-ua ia Sili se silasila mamao, poto masani ma vaega faavae tau galuega e fesoasoani ai e aveese Samoa mai tulaga faigata ma le pagatia ua tatou i ai nei.

O le toe fo’i atu o Papalii Niko Lee Hang i le Kapeneta e avea ma Minisita o Galuega, Fela’ua’iga ma Galuega Tetele-o le isi lea fuafuaga poto faatasi ai ma le faaiuga ina ia tuu atu Lautafi Fio Purcell e faaauau le faagasologa lelei ua na faia i le Matagaluega o Pisinisi a le Malo.

O se mea e le talafeagai mo i tatou pe a tatou le faailoa atu e faapea sa i ai lava na mea iti ua faate’ia ai-ma atonu o ni tofiga ia e faanonou ai le vaai ma ni fesili-ae peitai-o le natura lava lena o nei mea. E ui lava ina le mafai e se tagata e to’atasi ona fai ia sa’o i taimi uma nei mea, ae a tuu i le tasi itu, e le mafai lava ona e faafiafiaina tagata uma lava. I le tulaga aoao, o se filifiliga e matua paleni ma le poto. O se filifiliga lea e mafai ona tatou faapea na fai e tusa ai ma ni tulaga e matua faigata lava-aemaise ai lava le afaina ai o le maopoopoga o le pati. 

.O le mea moni, ina ua fai e le Palemia o Tuilaepa lea faasilasilaga faalauiloa, na ia ta’utino lava le tele o ia faafitauli. “Ou te fia faailoa atu e faapea o lea filifiliga ua matua faamaonia lava lona faigata pe a fua i le taua o le mautinoa o se iloiloga paleni o le tele o itu -e aofia ai tomai tau le tagata lava ia, poto, mea na te mafaia, tausaga o le poto masani tau polokiki, se sao talafeagai i le atunuu ma le aloa’ia e itumalo ia e le’i i ai lava ni o latou sui i totonu o le Kapeneta,” o lana faaaliga lea. “O filifiliga matou te faia e amulī ona avea ma matou matafaioi, ma ua ‘ou matua iloa lelei e faapea o le o mai faatasi o se amataga lea.

O le galulue faatasi o se laasaga lea i luma i le manuia. “O le agaga o le mafuta faatasi ua ‘ou faia ai le fautuaga e faapea mo i latou ia o le a le filifili mo tofiga faa-Minisita-o i latou ia e le lava atoatoa-o isi lava avanoa e auauna ai e anoano i totonu o taualumaga faa-Palemene ma faiga masani.” O le mea moni e faapea talu ai na agai atu le atunuu i le palota i le lua vaiaso talu ai. o lea filifilia sa tuuina atu i ni talanoaga se tele, manatunatuga ma le le malilie faatasi pe o ai o le a faatumuina ia nofoa o loo fia maua e tagata uma. 

Sa matua siitia e le Palemia o Tuilaepa lea tulaga le mautinoa ina ua na teena ona faailoa mai pe talanoaina lana filifiliga ma soo se tasi se’ia o’o i le taimi na ia faia ai lea faasilasilaga i le Aso Faraile. Faapea la o oe o le sui auai o le faa-faletui a le H.R.P.P.mo le lua vaiaso talu ai-e ese ai mai ia Tuilaepa, le Fofoga Fetalai fou o le Palemene ma lona Sui? Mafaufau la i faamoemoega o tagata, mea sa faanananu  i ai, vevesi ma le popole. O le mea mautinoa-atonu sa tele ni taimi o le le mautinoa mo sui auai e o’o mai i le taimi na fai ai le faalauiloa. 

O le fia maua o se fesoasoani i o latou foliga ina ua valaau o latou suafa e matua tau tele lava. Ae peitai-o le mea moni lenei, o le manatu e faapea e mafai e se tagata e to’atasi ona ia maua se pule e matua tele o le a faatagaina ai o ia na te pulea mea uma lava ma tuu ai pea tagata uma e fai a latou mate- e matua tau faafefe lava. Matou te talia e faapea o le fuaitau  ‘tagata pule toatasi” ua uma ona faate’a ma teena i taimi uma e lana pulega ae a tilotilo i atiina a’e i le faagasologa o o le lua vaiaso talu ai, aemaise ai lava le itu i nei tofiga, matou te faailoa atu ma le faaaloalo matou te le auai pe talia.

O se faata’ita’iga uiga ese o se tagata e to’atasi ua ia te ia se paoa e matua tele e pogai mai isi sui o le vaega ia e leai lava se isi faiga e maua mai ai-ae na o le taofi o a latou manava ona o le popole i le ola. 

Ona tatou o’o mai ai lea i le tulaga ua o’o i ai le Sui Palemia muamua a Tuilaepa, o Fonotoe Pierre Lauofo.

E tatau ona faailoa atu e faapea o le faaiuga ina ia matua aveese lava o ia mai le Kapeneta e tatau ona avea ma se tasi o tulaga faaletonu aupito i tele tau polokiki i le tala faasolopito o lenei atunuu. E matua leai lava soo se mea faapea o lenei ituaiga na tupu mai muamua. Matou te ioe e faapea sa le tonu le mafaufau o Fonotoe i nisi o mea na aafia ai i le faagasologa o le fonotaga mulimuli a le Palemene ma e tumau pea ona i ai se tau e ao ona totogi..Ae o le matua fulitua lava ia te ia-tusa lava pe sa tuuina atu ia te ia se tiute faa-Minisita Lagolago mulimuli ane-ae o le mea moni lava lea o le po i foliga.

O se mea tiga lea.O le mea moni lava lea. Ia, o le a la le mea na tupu ai? E ono mafai ona avea lenei mea e amulī ona gau ai lea o le tua o le kamela? Poo ua na ona tatou molimauina ai se isi faiga uiga ese mai le tusi a Master Tuilaepa? O le mataupu mulimuli, o le aveeeina lea o Faumuina Tiatia Liuga mai le Kapeneta o se mea lea ua mautinoa. Ua tatou maua ai le faamoemoe e faapea ua nofo sauni le Palemia o Tuilaepa e fai le mea sa”o.  

I le taimi nei-tatou faamoemoe ia o le a le galo i nei tagata le lipoti a le Pule ma Su’etusi Sili ma le lipoti a le Komiti a Alii Ofisa o le Palemene. O le a sou manatu? Ia outou maua Samoa se Aso Sa to’afimalie, ma ia faamanuia atu le Atua!

 


© Samoa Observer 2016

Developed by Samoa Observer in Apia