Selesele e La’auli fua o ana galuega lelei

751 Hits

La’auli Leuatea Polata’ivao.

La’auli Leuatea Polata’ivao.

Ripotia e Lanuola Tusani Tupufia

Fa’aliliu e Maiava 

 

Ua saunoa le sa avea ma Fofoga Fetalai o le Palemene, La’auli Leuatea Polata’ivao, ua fa’afiafiaina lava o ia, ina ua tofia e avea ma Minisita o le Matagaluega o Fa’ato’aga ma Faigafaiva.

E talitonu Lana Afioga, o lona vala’auina o le taui lea o ana galuega sa fa’atino, lona fa’atuatuaina ma le talitonuina o ia e le palemene o Samoa.

“E lagona lava le fa’agae’etia, e mafanafana fo’i lagona ona o fua lava sa luluina, e toe selesele mulimuli,” o le fa’aaliga lea a La’auli. 

 “E moni sa iai lava lo’u mana’o e fa’aauau la’u galuega o le Fofoga Fetalai, a ua iloa, o lea o le a tauavea e se tasi ua loa i le palemene. Ua ‘ou sauni fo’i mo le tofiga fou ua ‘aumai ma o le a taumafai malosi e si’itia le matagaluega o fa’ato’aga ma faigafaiva.”

O le matagaluega lea sa va’aia e le Faipule talu ai o Lefaga ma Falease’ela, o Le Mamea Ropati, lea e le’i leva atu ona tofia e avea o se tasi o sui o le Fono a Sui Tofia.

Na fa’afetaia ai e La’auli, le galuega tele sa feagai ai ma lea fo’i tamali’i i le tele o tausaga ma ua naunau ai e fa’aauau ai pea i le tulaga lelei o iai nei.

E fa’apei ona fa’aauau le lelei lea? Na ta’ua e le faipule mai Gagaifomauga Numera 3, o le a tilotilo i maketi i fafo e le o fa’aaogaina i le taimi nei. 

Na ta’ua,  talu ai o fa’ato’aga o le ivi-tu lea o le tamaoaiga o le atunu’u, e tele lava isi fa’amanuiaga lelei mo faifa’ato’aga o le atunu’u ae maise o ‘auala e fa’aleleia ai fefa’ataua’iga ma atunu’u i fafo. 

“’Ou te talitonu, ua tele ma anoanoa’i galuega ua faia e le Matagaluega i tausaga ua mavae ma o le isi la la’asaga lelei, o le sa’ilia lea o maketi lelei i fafo. Ni maketi e le gata mo fua o fa’ato’aga ae mo le vaega fo’i o faigafaiva… ma e anoano ituaiga i’a ‘ese’ese e le o fa’aaogaina ae mafai ona ‘auina atu mo maketi i fafo.” 

Na ta’ua fo’i e La’auli, e tofu Samoa uma ma ‘ele’ele e aga’i e galulue ai, pe faigaluega pe leai fo’i. E faigofie ai lava mea uma ae mo’omia lava “le galulue fa’atasi o tagata e taofi i’u-maea” mo le atina’eina o o latou aiga, o nu’u ma le atunu’u.

O La’auli o se tasi e siamupini i le taleni o le kuka, e fiafia tele e kuka ma fa’aaoga la’au ‘ese’ese e maua lava i lo tatou lotoifale.

O Lana Afioga, o le alo o se tasi o minisita tuai o le kapeneta, o se tasi fo’i o sui-fa’avae o le fa’afaletui a le HRPP, le Afioga a Polata’ivao Fosi Schmidt.

© Samoa Observer 2016

Developed by Samoa Observer in Apia