Leai se vai leai foi se Eletise

By Fetalai Tuilulu’u 21 April 2017, 12:00AM

Na afea e le Fofoga o Samoa le tinā ia Suiga Iakopo i le aso ananafi mo sona finagalo i le tulaga o iai le olaga o Samoa i lenei vaitau, ma na ia fa’aalia ai o lo’o faigata le olaga i le taimi lenei mo ia, ona o lo’o tau amata si o latou aiga. 

“E le’i leva ona matou me’i mai i le nofoaga lea ua matou iai,” o le fa’aaliga lea a Suiga. 

“E pei ona tou tagataga’i mai, e le’o mautṻ le fale o le aiga nei, ona e le’i leva ona matou nonofo iinei.”

Na ia ta’ua foi, o le isi tulaga e faigata ai, o le leai o se suavai maua mo i latou i le taimi nei. 

“O le taimi nei, e le’o mafai ona o’o mai le suavai i le matou fale. E le’i talosagaina le paipa mo le matou fale, ona o le leai o se seleni e toso mai ai le paipa. 

“Na tausaili foi ni kalone e tu’u ai vai, ae na’o le lua paelo o lo’o fa’aaoga i le taimi nei. 

“O le taimi la lenei, o lo’o la’u mai a matou vai mai le paipa o le matou aiga o lo’o nonofo mai i le isi pito o le fanua. 

“Ae e mo’omia lava ni vai aua feau e fai i totonu o le aiga, aemaise foi o le taumafa. E iai foi le fa’atoaga kapisi ma tamato, ae mo’omia lava le iai o le vai aua le fa’atoaga.

“E iai foi si au tama lea ua alu i le aoga, e mo’omia lava a la se suavai mo le matou aiga.”

E le gata i lea na ta’ua e Suiga , o le isi o fa’afitauli o lo’o feagai ai nei ma lona aiga, o le leai lea o se pa e si’o ai lana togala’au aina mai le fa’aleaga e meaola. 

“O le atina’e lea o lo’o fa’amoemoe iai le manuia o si o matou aiga.

“O le fa’ato’aga kapisi ma tamato. Peita’i, e tele ina fa’aleaga e moa ma isi meaola ona e leai se pa e si’o ai.”

Na ia ta’ua foi, e le’o se mea faigofie le tōtōina o kapisi. 

“E mo’i lava e faigofie i le vaai a nisi, ae e faigata le tausiga ma le va’aiga ina ia fua ma ola lelei.

“E tele foi lava ina fa’aleagaina e anufe, ma isi manu. 

“Ae ua fai lava lea ma a’u fe’au masani i aso uma, le va’ai lelei o le toga kapisi aua olo’o maua mai ai se seleni e tausi ai le fanau ma le aiga.”

By Fetalai Tuilulu’u 21 April 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>