TALATUU O FAGASA-TUTUILA

21 May 2016, 12:00AM

O Fagasa e taoto tonu lava i le itu i sisifo o Pagopago i luga o se faga itiiti. O ona tala atu i sisifo o loo i ai foi le isi faga-ma o loo ta’oto ai se nuu itiiti o Fagatele lea e faasino i Fagasa-ma o ona tala atu o Fagale’a, ona soso’o ai foi lea ma le isi nuu itiiti.

O lona itu i sisifo sa masani ona lua ona matafaga e pei o Asu ma Aoloau, ma ua maua ai le itumalo o Satoa. O le itu i sasa’e o Fagasa- o Vatia lea e matua matomato lava lona gataifale-ma e leai ni tagata e nonofo ai.

O Fagasa poo le ‘faga e sa’-e ta’uta’ua tele i ona i’a oso e igoa o “mumua” ia e masani ona o ane i le matafaga ia Fepuari poo Novema i tausga uma ma e masani ona fasi matea e tagata pe a o atu.

E lē o le matafaga la lenei o Fagasa a’o le matafaga o Asu- lea na fai ai le fasi tele i le 1878 ina ua fasia e tagata Samoa le ‘auva’a o le Alii Folau o De la Perouse. Fai mai la le talatuu o Fagasa sa tausi ai se Tuna tele i totonu o se vaieli ma e faapea o le “Tuna Sa”.

O Upu Taoto la o Fagasa e faapea: “Tulouna Oulua Nofoa; Tulouna lau Susuga Alo; Tulouna lau Afioga Tupuola; Tulouna Lealaisalanoa; Tulouna lau Susuga Fuimaono; Tulouna le Alii o Aiga-o lau Susuga Tuinei; Tulouna Outou Tulafale-o Tua, Soi ma Sala.

FOFO MA ITULAGI: O Sua ma le Vaifanua e i le itu i sasa’e o Tutuila, a’o Fofō ma Itulagi e i sisifo. E pei ona mua’i ta’ua o itumalo nei e lua e aofia i le malo o Tutuila. O Satoa lea o loo faamauina o le itumalo lona iva-ae ua na o se vaega o Fofō; ae peitai- ua ese lona faatulagaina iinei ina ia mafai ai ona aofia i itumalo e iva.

E pei foi o Fagaitua le nofoaga autu o Sua, e ta’u foi o le ‘alataua’ ma ua avea ai ma nofoaga autu o Fofō, e pei o Leone lea e ta’ua foi o le Alataua, O lona uiga la- e aliali mai e i ai le taimi sa ta’ua ai Fofō atoa o le Alataua, i le faafeagai ai ma Itulagi ma sa faaigoa ai o le ‘Ma’upū ‘e pei o Fagaloa

FOFŌ: E aofia ai Leone ma itumalo laiti e lua o Samatua ma le Tapua’iga. O le Aoao Tetele la o Fofō e faapea: Tulouna Oe le Alataua; Tulouna lau Susuga Tuitele; Tulouna lau Afioga Fa’ivae; Tulouna Oulua Matua  o Olo ma Leoso; Tulouna Oulua na Taumafa Alofi ia te Oe le Alataua; Tulouna lau Susuga Ilaoa ma lau Afioga Toomata; Alala mai Lau Tofa le Matua o Salāve’a; Tulouna Le Samatua ma le Tapuaiga.!

O le Alataua e faasino ia Leone o le Malae lea; o Olo ma Leoso o Tulafale ia o le Alataua; o Toomata e faalupe o le Faasisina e pei ona fai i Solosolo-Upolu- ma e afio i Nua; o Sa Lavea o le Aiga o Lavea i Safotu Savaii. 

LEONE: O Leone e taoto i se faga faa-taamilo e faasaga i sauté sisifo, o lona itu i matū lea e papa’u ma e gaoā i le ‘amu. O iinei e i ai nuu o Amaluia ma Falesau. O Sasa’e o le matafaga e ta’oto ai Vailoa, poo le malae lea o le itumalo o Itulagi; ma o iinei le nofoaga autu o itumalo e lua ma e felataa’i lava e pei lava o Palauli ma Satupa’itea i Savaii.

O totonu o le maota o Tuitele o loo tausi ai se ma’a e igoa o le “Maa o Taemā”-fai mai o iinei na taunuu i ai Taema ae le o Poloa. i le tasi itu- o iinei na nofo ai Pili i le faagasologa o lana malaga i sisifo e pei ona molimauina e Misi Situpe.

O le tele o sootaga a Leone e afua mai Savaii, aemaise ai lava o Samata ma Faia’ai, lea foi fai mai o loo i ai se alii e suafa ia Leone.

O Upu Taoto la o Leone fai mai:-“Tulouna Oe le Alataua; Tulouna lau Susuga Tuitele o le Faatui; Tulouna lau Afioga Fa’ivae o le Malu o le Fale; Tulouna Ma’ava o Ilaoa ma To’omata; Tulouna lau Susuga Avegalio; Tulouna lau Afioga Save; Tulouna Oulua Matua o ‘Olo ma Le’oso; Tulouna Fiu ma Maiava; Tulouna lau Tofa Salave’a; Mamalu mai Oe le Alataua.O le alo la o Tuitele na usu i ai Lilomaiava Naiiliili e mafua ai lea sootaga.

O Tuitele ma Fa’ivae o Aiga tetele ia o Leone. O le maota o Fa’ivae e faaigoa o le ‘sulufaiga’ e pei lava o le maota o Tofaeono i Vaiala Apia. O le laoa o Leoso e faaigoa o le ‘Faletele i Sisifo; o Fiu ma Maiava o ‘avefeau ia a Matua o ‘Olo ma Leoso mo le Fono tele a le itumalo. O Fiumalosi e mai Samata ma Maiava mai Matautu i Upolu: o Sa Lavea e faasino i le aiga o Lavea.

21 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>