Le Fusu’aga Tele: ‘Auala e malo ai Lupesoli’ai

By Fa’aliliu e Maiava 21 May 2016, 12:00AM

LE A LE FA’AMOEMOE: Fetauiga a Parker ma Takam

FEA E FAI AI: Maota Tele i Manukau 

FEA E TAPUA’I AI: Silasila i le TV3 mai le 7 i le afiafi 

Ua fa’apu’upu’u e le tama-fusu Samoa i le paga-mamafa, o Lupesoli’ai La’auli Joseph Parker, le taimi e manatu, sa tatau ona matua tapenapena ai ma fa’amasani atili i le ta’aloga, a ua fa’ananau e se’e atu i tama-moni o le paga-mamafa i le lalolagi, lea o le a la iloilo i le afiafi nanei i le maota tele, o le Manukau Events Centre.    

O paga e lua mulimuli nei a Lupesoli’ai – o Jason Bergman i Apia nei ma Daniel Martz, e matua mamao ‘ese lava ma le 50 pito i luga o fa’asologa o tama-fusu i le lalolagi. O le sauni atu mo Takam – o se tasi iloga o le vaega e 10 pito i luga – o se la’asaga ma’ale’ale ua faia e le vaega o Pulega a Parker, le Duco Events.

O le mea moni, sa tatau ona iai nisi ana fusu’aga e fusu ai ma tama o le 20 pito i luga, e fa’amautuina ai lona lava-sauni mo le isi la’asaga i luga atu. 

Peita’i, o le tu’u-fa’atasia o fusu’aga i le vaega maualuga lea, e le o se mea e faigofie, lea sa matua faigata ai lava ia Stuart Duncan, ona tau sa’ilia tama-fusu e naunau moni e fusu ma Parker. 

O le manumalo talu ai nei o le tama-Peretania o Anthony Joshua o le siamupini a le lalolagi (IBF), ma le avanoa e lu’i ai ai le fusi lea i totonu o Peretania (pe a manumalo Parker nanei), ua suia atoa ai fuafuaga ia.

Ui i lea, ae moni lava ma fa’amaoni le fa’atulagana e le faia’oga o Kevin Barry o  Takam, lea na fa’apea ai, o Takam pe lua i le tolu la’asaga e sili i lo tama sa feiloa’i  muamua ma Parker. O Takam e sili mamao atu i tama uma sa fusu ma le siamupini o le WBC o Deonay Wilder fa’apea fo’i tama sa fusu ma le siamupini o le IBF o Anthony Joshua, ae le’i avea uma la’ua ma siamupini. 

O Takam, o se tasi e ‘alofia e le vaega lea o le paga-mamafa, o se tagata tino-lelei e le faigofie ona fa’aFaia’ina.l 

Moni ua 35 tausaga lona matua, ae o lo’o maloloina lava ma malosi lona tino ma ua aupito faigata ai i le taimi nei, ona o lona avanoa lea e fusu ai mo le fusi o le lalolagi.  Toe fa’aopopo atu iai ma le naunau ona ua lamalama fa’ai’u lona taumafai, o le a atili faigata ai ona fa’ato’ilalo. 

Ua 36 ana fusu’aga ae na o le 2 faia’ina, e fa’aluaina fusu’aga a Parker. Ua 166 ta’amilosaga a le tama-fanau a Cameroon sa o’o i ta’aloga a le Olimepeka, i le na o le 68 a Parker. O le 40 o ia ta’amilosaga i le lua tausaga talu ai, sa fetaui ai ma nisi iloga e aofia ai Alexander Povetkin, Mike Perez, Tony Thompson ma Michael Grant.  O le matua tele lava o na ta’amilosaga na feto’ai ai ma tama-sasa’o e ono afaina moni ai.  

I le la fetauiga ma Povetkin – lea sa pine-‘auro i ta’aloga a le Olimepeka e pau lana faia’ina o le fetauiga ma Wladimir Klitscho, ma o se tasi fo’i o tama-fusu lelei o le paga-mamafa, sa malo ai lava Takami  i ‘ai i le amataga, e o’o lava i le ta’amilosaga 8. Moni na matua sela i le ta’amilosaga 9 ma taofia ai le fusu’aga i le lona 10, a’o le fusu’aga lea na manino mai, o se tasi o fusu’aga mata’ina i le tausaga e 2014, ma o le faia’ina lea i se tasi o tagata tu’itu’i-tetele pei o Povetkin, o se fa’ailoga o le malosi ma le lelei ae maise le tia’a tele o Takam. 

‘Ou te manatu, o le lelei lea ua iloa nei o Carlos Takam, o le a tele ai le mau fesili i malosi’aga ma isi metotia a Parker e le o iloa. 

Ua manino, e matua malosi tele le ali’i-Samoa ae fa’atoa 24 tausaga o lona soifua, e vavave tele ana meafaigaluega, ma malolosi ana so’a ma tu’i ae maise lava lona taumatau. Peita’i, e iai isi vaega na te mo’omia, e maua ai le fa’amoemoe o tulimata’ia, le fusi o le lalolagi.   

E lavatia e le ‘auvae o Parker ni tu’i malolosi?

E leai ni fa’amaumauga moni o lea mea talu ai, e le’i matua lavea tonu Parker i se tu’i, ae o nisi taimi i le fusu’aga nanei, o le a matua tigaina ai. O le ila ma le le-iloa e fua i le loto ma le malosi o le tagata-soifua peita’i o le tali atu ma le vavave o ana mea-faigaluega e toe maua ai le malosi o le mafaufau ma fa’afouina ai le malosi o le tino.  

A le-mafai e Parker ona tatalia ni pomu malolosi pei o Ray Mercer, e le o le i’uga la lea o le lalolagi. O lo’o fesiligia pea le malolosi o tu’i a Lennox Lewis fa’apea fo’i Wladimir Klitscho ae o o la malosi’aga e fusu ai ma tautu i le fuafuaga o se fusu’aga, na manuia ai ma o’o i le tumutumu o le lalolagi.

Ae a malosi le ‘auvae  o Parker, o se tulaga lelei tele lea a’o fa’asolosolo atu i isi tama-lelei o le paga-mamafa. 

A o sa’u lea va’ava’ai i le to’alua lea o le a fetaui nanei: 

 

Joseph Parker

Malosi’aga

• Saoasaoa tele ma vavave mea-faigaluega, le so’a, le tu’i ma le fetogia’iga o lima.

• Malosi tele le tu’i – a tau-tonu se mea nanei, e vave tu’ua le tifaga. 

• Lelei ma tele metotia i le fa’aaogaina o so’a ma tu’i – Sa fa’aauau pea ona fa’aopoopo e Kevin Barry metotia ‘ese’ese malolosi ia Parker, e aofia ai le fa’aaogaina o le agavale i le tino ma le ulu ma isi vaega e fa’alata ai ana paga a’o le’i oso se mea malosi. 

• Malosi: O se Parker ‘ese ua nei mai le lua tausaga talu ai, ua tupu ma ua matua lona tino. Ua iai le malosi e o-fa’atasi ma le saoasaoa o lima ae maise le manaia o lona fuaitino. 

• Kevin Barry – Sa Pine Siliva i le Olimepeka ma o se tasi ua iloga i faiva fa’aFaia’oga ma e le o alo-tamala i le fusu’aga lenei. Ua iai ana fuafuaga i le ta’aloga a Parker nanei, e le gata i le Fuafuaga A, a’o le B fo’i ma le C

• E lelei tele Parker e fa’alogo, e talitonu maua’i i fa’ai’uga a Barry ma ua iai lona malosi e fa’atino ai mea e fa’atonu atu e Barry e fai

 

Vaivaiga 

• Fa’atoa o’o lea i lea maualuga

• E le to’a: e iai taimi sa taumafai malosi ai Parker e fa’a’uma se tasi o ana paga sa iai – o lo’o taumafai pea e tau-fuafua le taimi e oso ai se tu’i-oti pe a faigata ma tau siliga ana so’a ma tu’i.  

• O le malosi e tete’e ai ma puipuia o ia, ma o se mea e ta’atele i tama-fusu, e vave lava ona osofa’i a latou ulua’i paga peita’i i le vaega lea e 10 pito i luga, e le tatau lava ona iai se mea-sese.

• Tu-le-ulu pe a alu se so’a po’o se tu’i ae maise le taimi ua uma se osofa’iga, e avanoa ai le ‘auvae mo tu’i ma so’a a sana paga.

• E le’i feagai lava ma se pogisa i ana fusu’aga ua mae’a. O se tulaga e le ma-iloa vagana lava ua fa’amalosia e o’o iai. 

 

Vaega e ono manumalo ai

• To’aga e so’o ma ‘ia vave – o le tulaga lea e iloa ai le taunu’uga o le  fusu’aga, e fua i le gafatia e Takam o le saoasaoa o so’a a Parker.

• Vave osofa’i Takam i le amataga e vave  fa’ailo iai lona malosi, e fa’avaivaia ai fo’i ma le-toe fia latalata atu.

• Matua la’u iai mea uma, fesuisuia’i mea mo’i ma mea na ona fa’afua ma fuafua – una’i le so’a ma taumafai ia tali mai Takam, sui le ala-fusu ma va’ava’ai avanoa e vavevave iai ma tu’u-sa’o iai lima.

• Fautuaga fo’i lea mo Takam, ia lelei le puipui i le amataga, to’ato’a lelei ma lava le onosa’i, o le tu’uga mamao e le o se tu’uga-pu’upu’u. Taumafai ia maua ni avanoa, ‘aua le fa’amalosia.

• Fusi ma fa’alagolago i le tagata pu’upu’u – o le tauga-pulu le mea o le a fai po’o ai e malosi, fa’aaoga le malosi e tete’e ai

• Fa’aita Taka ona o ‘au-ato ma tu’i so’ona sasau mamao ma va’ai e soso’o so’a ma tu’i e tali atu ai pe a u’u tele mai

 

Carlos Takam

Malosi’aga

• Ua masani i fusu’aga o le maualuga lea

• O se tama-fusu lelei e mafai ona fa’aaoga lona tomai e to le sela ma koma, ma su’esu’e fo’i  malosi’aga o isi tama-fusu

• Ua tele le silafia o le ta’aloga, tele fo’i metotia e mafai ona sui ai le fusu ma ana fuafuaga pe a vevesi ma osofa’ia malosi

• Lelei lana puipui ma malo le ‘auvae

• Lelei tele le fusu i totonu (fa’atau-tino)

• Lelei le agavale ae maise pe a fusu aga’i i le tino (itu)

• Masani e fusu i ta’amilosaga mulimuli ae maise i nisi o tama-fusu lelei sa latou fufusu muamua 

 

Vaivaiga

• E fai si tuai ana tali ma le ‘alo pe a vave ma saoasaoa so’a ma tu’i a ana paga, e mafai ona lavea pe a fusu-vala ma koma ai, ae tali i so’a ma tu’i-fa’afua – maua ai avanoa e osofai ai

• Tele ina pa’u i luma pe a le-paleni pe a fusu i luma, ae maise i ta’amilosaga ogatotonu ma le fa’ai’uga o fusu’aga, ma avanoa ai mo tu’ui ma so’a.

• E malosi ae le o se tagata e malosi sana tu’i-oti. O le tele o na paga-oti e maua i ta’amilosaga mulimuli pe a o’o ina fa’asoloatoa le alu o lima. 

• E seasea o’o ni ana tu’i pe a misi tu’i a ana paga – e mo’omia le tu-lelei o ona vae fa’atoa fou se tu’i

• Ua masani e fusu savali i luma i taimi uma ma e ono matau-gofie ai lona mana’o ma fa’afetoa’ia vave ai.

 

Vaega e ono manumalo ai 

• ‘Alo’alo ma so’a ae savali i totonu ma taumafai ia le-paleni Parker ae tau’ai iai so’a ma tu’i i le tino ma le ulu

• Fusu ma ia o’o tu’i ma so’a ia Parker pe a misi ana tu’i ma so’a, ma fa’aaoga tatau avanoa na

• Ia lelei puipuiga i le amataga. Ia lava le onosa’i ma to’ato’a lelei, le-iloa pe o mana’o le Samoa ia vave uma le fusu’aga ma so’ona alu ai i le atoa  e ono vave vaivai ai.

• Tulituli i le tulimanu, fusu aga’i i le tino ma fa’ailo fo’i lona tagata-tele ma mamafa i le ali’i 24 tausaga.

• Tipi le malologa ae siaki po’o tumau pea le malosi o Parker

• Pe a vala, ia iloa lona ‘umi ma taumafai ia fusu-a’apa Parker. 

 

 ‘O se fusu’aga ‘ou te manatu e malo ai Parker, peita’i e le o se su’ega faigofie, e iai ona popolega ona o lo’o tulimata’ia e tama-fusu uma. O le a ‘ou i tafatafa o le maea i le vaega-fa’asalalau i le fa’ai’uga lenei o la’u tautua – aua o le tulaga tonu lava lena o fusu’aga nei a tama-matutua, o le paga-mamafa a le lalolagi. 

By Fa’aliliu e Maiava 21 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>