1. Matauina i le itulau i luma o le Samoa Observer ananafi- se ulutala mata’utia fai mai-“O LE MEA MONI MATAGA” ma o lea ulutala e faasino i se tina ma ona foliga-fai mai ua sui atoa ina ua uma ona fasi faamo’amo’a e se pagota na sola ese mai le falepuipui….!

A silasila toto’a la i foliga o lenei tina-faamata o le a se lagona o le tua’a o lenei tamaitai-ona tuagane ma lo latou aiga atoa? Afai o le tamaitai Samoa o le tama faapelepele a soo se aiga Samoa-ma o le “Tama Sa” a soo se aiga o Samoa-o le a sa outou silasila i lenei faalavelave? Faamata e talia e soo se aiga o Samoa lenei ituaiga o faiga faatautala?

O lona uiga- e avatu fanau faapelepele a isi aiga e fai ma polotu’i a isi tagata? Afai la o le alii lea na fasia lea tina o se pagota na sola i tua ma le falepuipui-o le a la se mea a le Malo o fai i lenei faalavelave? O le uiga o le fesili-afai o le Malo o lona tiute lea o le loka o pagota i le Falepuipui-o le a faapefea la ona taui le toto maligi o lenei tamaitai?

O le a se isi faiga o fai i lenei pagota-ae o se atalii o ai? E mafua le fesili ona a tilotilo i manu’a o lenei tamaitai-o le upu moni lava e tusa ai ma le ulutala o lenei tala fou-“Ua sui atoa e lea pagota foliga o lea tama’ita’i-o lona uiga e maliu lava lea tina ma nei ma’ila’ila! O le a la se faiga e tatau ona fai e le Malo i lenei pagota faatautala? Afai la ua matua afaina lenei tina ae leai se mea a le Malo o fai i ai-e toe afaina ai foi nisi tina se to’atele! O le a la le pogai e sosola so’o ai i tua nei pagota?

Afai e le o mafai e Leoleo ma le Falepuipui ona faatino o latou tiute ia o loo maumau ai tupe a le atunuu i o latou totogi-ua tatau ona faamalolo ae aumai ni Papalagi mai fafo e faafoeina le Falepuipui-ona faatoa maua lea o se suiga lelei-e mautinoa ai le saogalemu o le atunuu i taimi uma.

O le isi fesili-o fea o i ai ni filifili ma isi mea e saisasi ai pagota faafitauli? Ia manatua la-afai ua matua afaina sia tina i faiga a lea pagota-o le upu moni-e toe fai foi i isi tina ma tamaitai-aua ua iloa lelei lava e lea pagota-e leai lava se isi mea e mafai e le Malo ona fai ia i latou-vagana ai le loka i le falepuipui-lea e pule lava le pagota ia ma le taimi e fia alu ai e tafao i fafo. Afai la e le o mafai e le Malo ona togafiti lenei faafitauli faigofie-a faapefea la ona ia mafaia ona togafiti faafitauli lavelave? O le a sou taofi?

2. Matauina i Tala Fou fai mai ua tapuni le Su’esu’ega itagata lautele-ma o lea suesuega e faasino i galuega a Alii Faamasino o le Faamasinoga o Fanua ma Suafa. Afai la ua tapunia le atunuu-o le a le pogai? Ae o fea ni Komisi Su’esu’e ua tatala i tagata lautele e ese ai mai tagata molimau e mana’omia.

O le fesili la-aisea la ua faamuamua ai le Komisi Su’esu’e i Alii Faamasino o le Faamasinoga o Fanua ma Suafa-ae le faamuamua ona fai se faiga i le Lipoti a Alii Ofisa o le Palemene lea na suesueina ma faamaonia faiga pi’opi’o a le Malo? Ua manino mai e vave tele le oso a le Malo e su’esu’e isi tagata ae le mafai ona su’esu’e ia lava ia te ia!

O le a la le pogai? O le tali o le fia mamā ina tele ae matua leai lava se manogi mamā! O fea la o i ai le sa’o o nei mea? Aisea ua le gagana ai le ‘au-atamamai  ma le ‘au-fia talaia ? Masalo ua taunuu le upu a le isi toeaina-fai mai-“A ua e iloa se mea- ona e filemu lea! O le a sou taofi? 

3. A matau atu i Tala Fou i aso uma ma manatu faaalia-e anoano ulutala ma finagalo faaalia e uiga i atiina a’e e mafai ona faatumauina! E le o mautinoa la poo a tonu ‘atiina a’e ia e mafai ona faatumauina’. Pe o ni atiina a’e tau le vaomatua ma le siosiomaga, soifua maloloina lautele poo le a lava.

A tilotilo la i le tele o atiina a’e ua faatino i totonu o le atunuu-e peiseai e na ona amata lava ona faa-taatia ai lea! E le tau laulauina atu la ia atiina ae-aua o loo mafai lava ona silasila i ai le atunuu ma fai le latou faaiuga! Ae a fua lava i le fua lautele-afai lava la o i ai ni atiina e o loo mafai ona faatumauina-ailoga e tele! Ae afai o se taumafaiga lea o loo faatauaina-e tatau la ona matua fai -ina ia mafai ai ona faatumauina i taimi uma! O le a sou taofi?